మంకీపాక్స్‌పై భయంవద్దు

దేశంలో మంకీపాక్స్‌ కేసులు భయాందోళనకు గురిచేస్తున్నాయి. ఇప్పటివరకూ 8 మంది ఈ వ్యాధిబారిన పడగా, ఒకరు మరణించారు.

• జాగ్రత్తలు పాటించండి
• కేంద్రం మార్గదర్శకాలు

న్యూఢిల్లీ, ఆగస్టు 3: దేశంలో మంకీపాక్స్‌ కేసులు భయాందోళనకు గురిచేస్తున్నాయి. ఇప్పటివరకూ 8 మంది ఈ వ్యాధిబారిన పడగా, ఒకరు మరణించారు. ఈ క్రమంలో మంకీపాక్స్‌ వ్యాప్తి నివారణకు పాటించాల్సిన మార్గదర్శకాలను కేంద్రఆరోగ్యశాఖ తాజాగా విడుదల చేసింది. వ్యాధిబారిన పడకుండా ఉండేందుకు ఏం చేయాలి? ఏం చేయకూడదు వంటి అంశాలను వివరించింది.

చేయాల్సిన పనులు

• మంకీపాక్స్‌ బాధితులను తాకినా.. వారికి దగ్గరగా ఉన్నా ఈ వ్యాధి సోకే ప్రమాదమున్నది. కాబట్టి, వ్యాధిగ్రస్తులను ఇతరులకు దూరంగా ఐసొలేషన్‌లో ఉంచాలి. బాధితుల శరీరంపై దద్దుర్లు పోయేవరకూ దీన్ని పాటించాలి.
• బాధితులు మూడులేయర్ల మాస్కు ధరించాలి. దద్దుర్లు బయటిగాలికి తగలకుండా చర్మాన్ని పూర్తిగా కప్పి ఉంచే దుస్తులు ధరించాలి.
• బాధితులకు దగ్గరగా వెళ్లాల్సి వచ్చినప్పుడు ముఖానికి మాస్కు, చేతులకు తొడుగులు వేసుకోవాలి. అనంతరం సబ్బు లేదా శానిటైజర్‌తో చేతులను శుభ్రపరుచుకోవాలి.
• బాధితులు ఉండే పరిసరాలు ఎప్పటికప్పుడు శుభ్రంగా ఉండేలా జాగ్రత్తపడాలి. ఫినాయిల్‌, డిస్‌ఇన్‌ఫెక్ట్‌ లిక్విడ్‌తో ఆయా ప్రాంతాలను శుభ్రం చేయాలి.

చేయకూడని పనులు..

• బాధితులు ఉపయోగించే దుస్తులు, టవళ్లు, పడకను కుటుంబంలో ఇతరులు వాడొద్దు.
• బాధితుల దుస్తులను మిగతావారి దుస్తులతో కలిపి ఉతక్కూడదు.
• మంకీపాక్స్‌ లక్షణాలు కనిపిస్తే బహిరంగ ప్రదేశాలకు వెళ్లొద్దు.
• తప్పుడు సమాచారం నమ్మొద్దు. బాధితులపై, అనుమానితులపై వివక్ష చూపించకూడదు.