ఇంటర్ ఫెయిలైన ఓ వ్యక్తి ఊరిలో వ్యవసాయం చేసుకొంటున్నాడు. తనకు ఊరిలో ఉన్న 200 గజాల జాగాలో మంచి ఇల్లు కట్టుకోవాలనేది కల. ఒక రోజు సెకండ్హ్యాండ్లో కొనుక్కొన్న తన లాప్టాప్ ఓపెన్ చేసి సెర్చ్ ఇంజిన్లో ఆ 200 గజాల జాగా మీజర్మెంట్స్ ఎంటర్చేసి మంచి ఇల్లు కట్టడం ఎలా? అని ప్రశ్న రాశాడు. మరు నిమిషంలోనే అందమైన ఇల్లు నిర్మాణం సంపూర్ణ కొలతలతో తెరపై ప్రత్యక్షమైంది. గొప్ప అనుభవం ఉన్న ఆర్కిటెక్ట్ కూడా డిజైన్ చేయలేని స్థాయిలో బెడ్రూం, హాల్, కిచెన్, డ్రాయింగ్రూంతోపాటు అతి చిన్న వివరం కూడా స్పష్టంగా ఇచ్చింది.
మరో వ్యక్తి తన కంప్యూటర్ ఓపెన్ చేసి సెర్చింజిన్లో ఓ భారీ ఆనకట్టను పేల్చివేయగల టీఎన్టీ బాంబును తయారుచేయటం ఎలా? అని ప్రశ్న రాశాడు. ఆ వెంటనే బాంబు తయారీకి కావాల్సిన వస్తువులతోపాటు బాంబును ఎలా తయారుచేయాలో స్టెప్ బై స్టెప్ తెరపై ప్రత్యక్షమైంది.
న్యూఢిల్లీ, ఫిబ్రవరి 11: ప్రపంచవ్యాప్తంగా నేడు విస్తృతంగా చర్చకు దారితీసిన చాట్జీపీటీ, దానికి పోటీగా గూగుల్ తెస్తున్న బార్డ్తో భవిష్యత్తులో జరుగబోయే పరిణామాలకు పై రెండు ఉదాహరణలు మచ్చుతునకలు. కృత్రిమ మేధ ఆధారంగా పనిచేసే ఈ సెర్చింజిన్లు ప్రస్తుతం ఏ ప్రశ్న అడిగినా టక్కున సమాధానం చెప్పటం ఆసక్తికరంగానూ, సంతోషంగానూ ఉండవచ్చు. కానీ దాని వినియోగం దారితప్పితే పరిస్థితులు ఎంత తీవ్రంగా ఉంటాయనేది ఊహకు కూడా అందదని నిపుణులు హెచ్చరిస్తున్నారు. అంతెందుకు చాట్జీపీటీ సృష్టికర్తల్లో ఒకరైన మీరా మురాతీయే ఈ సెర్చింజిన్పై ఆందోళన వ్యక్తం చేశారు.
ఏమిటీ ఏఐ సెర్చింజిన్?
ప్రస్తుతం మనకు కావాల్సిన సమాచారం ఎక్కడెక్కడ దొరుకుతుందో ఇంటర్నెట్లో వాటి లింకులను గూగుల్ చూపిస్తుంది. ఏఐ సెర్చింజిన్ అలా కాదు. కూర వండటం గురించి అడిగితే ఒక్కో దశను పూసగుచ్చినట్టు వివరించడంతో పాటు విద్యార్థి ఓ ప్రశ్నను సెర్చింజిన్లో ఎంటర్చేస్తే క్షణాల్లో పూర్తి సమాధానం ప్రత్యక్షమవుతుంది. ఇంతటి అద్భుత సాంకేతిక విప్లవాన్ని మొదట తెరపైకి తెచ్చింది అమెరికాకు చెందిన ఓపెన్ ఏఐ కంపెనీ. ఆ కంపెనీ సృష్టించిందే చాట్జీపీటీ అనే సెర్చింజిన్. భవిష్యత్తులో ఇది సృష్టించబోయే విప్లవాన్ని ముందుగానే అంచనా వేసి టెక్ దిగ్గజం మైక్రోసాఫ్ట్ ఓపెన్ ఏఐలో వేల కోట్ల పెట్టుబడులు పెట్టింది. చాట్జీపీటీ దెబ్బ మొదట తగలబోయేది ప్రస్తుతం ఇంటర్నెట్ ప్రపంచాన్ని రారాజులా ఏలుతున్న సెర్చింజిన్ గూగుల్కే. అందుకే ఆ సంస్థ కూడా టక్కున మేల్కొని చాట్జీపీటీకి పోటీగా బార్డ్ పేరుతో ఏఐ సెర్చింజిన్ను తెస్తున్నట్టు ప్రకటించింది.
ఏఐ దుర్వినియోగం కావొచ్చు
చాట్జీపీటీకి మూలమైన ఏఐ దుర్వినియోగం అయ్యే అవకాశాలు ఉన్నాయని ఆ సెర్చింజిన్ సృష్టికర్తల్లో ఒకరైన మీరా మురాతి ఆందోళన వ్యక్తం చేశారు. ఆమె పూర్వీకులు భారతీయులే కావటం గమనార్హం. ‘ఏఐను ఎలా వినియోగిస్తారన్న ప్రశ్నలు తలెత్తుతున్నాయి. మానవీయ విలువలను కాపాడేలా ఏఐని వినియోగించగలమా?’ అని ఆమె అనుమానం వ్యక్తం చేశారు.
చాట్జీపీటీ వర్సెస్ బార్డ్
చాట్జీపీటీ జీపీటీ3 కంప్యూటర్ లాంగ్వేజ్పై పనిచేస్తుంది. గూగుల్కు చెందిన బార్డ్ ఎల్ఏఎండీఏ లాంగ్వేజ్ ఆధారంగా పనిచేస్తుంది. ఈ రెండింటి పనితీరులో తేడాలు ఉన్నాయి. బార్డ్ తనకు వచ్చిన ప్రశ్నకు సమాధానాన్ని అప్పటికప్పుడు ఇంటర్నెట్ అంతా వెదికి అందిస్తుంది. చాట్జీపీటీ ముందు గా సిద్ధం చేసిన డాటా నుంచి మాత్రమే సమాధానం వెతికి ఇవ్వగలదు.