YouTube | సీక్రెట్‌ వార్‌ డాక్యుమెంటరీపై యూట్యూబ్‌ నిషేధం.. ఎందుకంటే?

‘ఆస్ట్రేలియాలోకి చొరబాటుదారులు- ఇండియా సీక్రెట్‌ వార్‌' పేరిట ఆస్ట్రేలియాకు చెందిన ఏబీసీ టీవీ రూపొందించిన ఓ డాక్యుమెంటరీ ప్రసారాన్ని భారత్‌లో యూట్యూబ్‌ నిషేధించింది.

• YouTube | హైదరాబాద్‌, ఆగస్టు 2 (స్పెషల్‌ టాస్క్‌ బ్యూరో, నమస్తే తెలంగాణ): ‘ఆస్ట్రేలియాలోకి చొరబాటుదారులు- ఇండియా సీక్రెట్‌ వార్‌’ పేరిట ఆస్ట్రేలియాకు చెందిన ఏబీసీ టీవీ రూపొందించిన ఓ డాక్యుమెంటరీ ప్రసారాన్ని భారత్‌లో యూట్యూబ్‌ నిషేధించింది. కేంద్రప్రభుత్వం ఆదేశించడంతోనే తాము ఈ నిర్ణయం తీసుకొన్నట్టు ఓ ప్రకటనలో తెలిపింది. ఆస్ట్రేలియాలోని కొందరు సిక్కులను లక్ష్యంగా చేసుకొని ఇండియన్‌ ఇంటెలిజెన్స్‌కు చెందిన కొన్ని ఏజెన్సీలు పనిచేస్తున్నట్టు ఈ డాక్యుమెంటరీలో పేర్కొన్నారు.

లక్షిత వర్గం ఖలిస్థానీ ఉద్యమానికి సానుకూలంగా ఉండటంతో పాటు మోదీ ప్రభుత్వాన్ని పలుమార్లు విమర్శించినట్టు వెల్లడించారు. ఈ కారణంగానే ఈ డాక్యుమెంటరీని భారత్‌లో నిషేధించినట్టు తెలుస్తున్నది. కాగా, హర్దీప్‌ సింగ్‌ నిజ్జర్‌ హత్య, గోద్రా అల్లర్లకు సంబంధించిన బీబీసీ డాక్యుమెంటరీని కూడా గతంలో కేంద్రం నిషేధించడం తెలిసిందే.