రద్దీ నియంత్రణకు మార్గదర్శకాలు.. భారీ జన సమూహాలపై కేంద్రం జారీ

ధర్నాలు, భారీ జన సమూహాలను దృష్టిలో ఉంచుకొని కేంద్ర హోం శాఖ వాటి నియంత్రణకు కొత్త మార్గ దర్శకాలను సిద్ధం చేసింది. కుంభ మేళా, క్రీడల స్టేడియాలు, మత కార్యక్రమాలు, ఆధ్యాత్మిక నేతల ప్రసంగాలకు ఈ మార్గ దర్శకాలు వర్తిస్తాయి.

న్యూఢిల్లీ : ధర్నాలు, భారీ జన సమూహాలను దృష్టిలో ఉంచుకొని కేంద్ర హోం శాఖ వాటి నియంత్రణకు కొత్త మార్గ దర్శకాలను సిద్ధం చేసింది. కుంభ మేళా, క్రీడల స్టేడియాలు, మత కార్యక్రమాలు, ఆధ్యాత్మిక నేతల ప్రసంగాలకు ఈ మార్గ దర్శకాలు వర్తిస్తాయి. మత పరమైన అల్లర్లు, విద్యార్థుల ఉద్యమాలు, సామాజిక మాధ్యమ ప్రేరిత ప్రజాందోళనలకూ ఇవే వర్తించనున్నాయి. కార్మికుల ర్యాలీలకు ప్రత్యేక ఏర్పాట్లను ప్రతిపాదించారు.

జన సమూహాలను నియంత్రించే పద్ధతులు

జన సమూహాన్ని అరికట్టడానికి: విధ్వంస గ్రూపును చిన్న లేదా పరిమిత స్థలంలో వేరుగా ఉంచడానికి పరిమిత ప్రాంతంలో వారిని బంధించడానికి భవనాలు, దారులను ఉపయోగించాలి. ఎల్లప్పుడూ సురక్షిత నిష్క్రమణ మార్గాన్ని ఏర్పాటు చేయాలి. జన సమూహాన్ని చెదరగొట్టేందుకు: గోడలాగా ఉండే ఒకటి లేదా రెండు పోలీస్‌ లైన్లను ఏర్పాటు చేయాలి. ఒక ప్రదేశానికి వెళ్లే జన సమూహాన్ని దిగ్బంధం చేయడానికి, ఆ సమూహాన్ని నెమ్మదిగా వెనక్కు నెట్టడానికి ఈ పద్ధతిని పాటించాలి. ఇందుకోసం రక్షణ షీల్డ్‌లు, అవసరమైతే బారికేడ్లను ఉపయోగించాలి. జన సమూహాన్ని ఆపడానికి: పోలీసులు ‘V’ ఆకారంలో ఏర్పడాలి. దారి(ఉదాహరణకు అంబులెన్స్‌ కోసం) ఏర్పాటుకు జన సమూహాన్ని రెండు భాగాలుగా విడదీయాలి.