Woman Lawyer | దేశంలో ఆన్లైన్ స్కామ్లు విపరీతంగా పెరిగిపోయాయి. సామాన్య ప్రజలే కాదు సినీ సెలబ్రిటీలు, రాజకీయ నాయకులు చివరికి న్యాయ వృత్తిలో ఉన్న వాళ్లు కూడా స్కామ్ల ద్వారా నేరగాళ్ల ఉచ్చులో చిక్కుకుంటున్నారు. తాజాగా ఓ మహిళా న్యాయవాదికి షాకింగ్ అనుభవం ఎదురైంది. కొందరు కేటుగాళ్లు కస్టమ్స్ అధికారులమంటూ (customs officers) బెంగళూరుకు చెందిన ఓ మహిళా న్యాయవాదిని (Bengaluru woman lawyer) బెదిరించి రూ.లక్షలు దోచుకున్నారు. నార్కోటిక్ టెస్టు పేరిట వీడియో కాల్లో ఆమెతో దుస్తులు తొలగింపజేసి వీడియో రికార్డు చేశారు. ఆ వీడియోతో బెదిరింపులకు పాల్పడ్డారు. దీంతో సదరు బాధితురాలు చివరికి పోలీసులను ఆశ్రయించింది.
బాధితురాలి ఫిర్యాదు ప్రకారం.. ఏప్రిల్ 5న ముంబై శాఖ కస్టమ్స్ అధికారులమంటూ కొందరు వ్యక్తులు సదరు మహిళా న్యాయవాదికి వీడియో కాల్ చేశారు. ఆమె పేరిట సింగపూర్ నుంచి ఓ డ్రగ్స్ ప్యాకేజీ (drugs package) వచ్చిందని బెదిరించారు. నార్కోటిక్స్ టెస్టు (narcotics test) పేరిట వీడియో కాల్లో ఆమెతో దుస్తులు తొలగింపచేసి వీడియో రికార్డు చేశారు. ఆ తర్వాత వీడియోను బహిర్గతం చేస్తామంటూ బ్లాక్మెయిల్ చేయడం మొదలు పెట్టారు.
ఆమె నుంచి రూ.10 లక్షలు డిమాండ్ చేశారు. అడిగినంత ఇవ్వకపోతే వీడియోను ఆన్లైన్లో అప్లోడ్ చేస్తామంటూ బెదిరింపులకు పాల్పడ్డారు. దీంతో బెదిరిపోయిన సదరు మహిళ చేసేదేమీ లేక నిందితులు కోరినట్టు నగదును ఆన్లైన్లో వారు చెప్పిన అకౌంట్కు బదిలీ చేసింది. ఆ తర్వాత ఏప్రిల్ 7న పోలీసులకు ఫిర్యాదు చేసింది. మహిళ ఫిర్యాదు మేరకు పలు సెక్షన్ల కింద కేసు నమోదు చేసుకున్న పోలీసులు దర్యాప్తు ప్రారంభించారు.
Also Read..
Raj Thackeray | ఎన్డీయేకు బేషరతుగా మద్దతు ప్రకటించిన రాజ్ థాకరే
Arvind Kejriwal | ఈడీ అరెస్ట్పై సుప్రీంకోర్టును ఆశ్రయించిన కేజ్రీవాల్