Visit:
బెంగళూరు, అక్టోబర్‌ 31(నమస్తే తెలంగాణ ప్రతినిధి): బీజేపీ పాలిత కర్ణాటకలో కమీషన్ల దందా పరాకాష్టకు చేరుతున్నది. మంత్రులు, అధికారుల అవినీతి దాహానికి అంతు లేకుండా పోతున్నది. గతంలో బిల్లులు విడుదల చేయించేందుకు మంత్రి ఈశ్వరప్ప 40 శాతం కమీషన్‌ డిమాండ్‌ చేస్తున్నారంటూ ఓ కాంట్రాక్టర్‌ బలవణ్మరణానికి పాల్పడగా, తాజాగా అధికారుల వేధింపులకు తాళలేక.. తనకు కారుణ్య మరణానికి అనుమతి ఇవ్వాలంటూ హుబ్లీకి చెందిన బసవరాజు అమర్‌గోల్‌ అనే ఓ కాంట్రాక్టర్‌ ప్రభుత్వానికి దరఖాస్తు పెట్టుకొన్నారు. ఈ మేరకు రాష్ట్రపతి ద్రౌపది ముర్ముతో పాటు ప్రధాని మోదీకి లేఖలు రాశారు. తనకు రావాల్సిన బిల్లులను విడుదల చేసేందుకు అధికారులు ఏకంగా 40 శాతం కమీషన్‌ డిమాండు చేస్తున్నారని, ఇది దారుణమని అమర్‌గోల్‌ ఆవేదన వ్యక్తం చేశారు. ఈ విషయంలో జోక్యం చేసుకోవాలని అభ్యర్థించారు. లేకుంటే తనకు కారుణ్య మరణానికి అనుమతి ఇవ్వాలని కోరారు.
సీఎంను కలిసినా ఫలితం లేదు..
2020-21లో చిక్కమగలూరు జిల్లాలోని కాడూర్‌, ముదిగిర్‌ తాలుకాలకు రూ.1.12 కోట్ల విలువైన కొవిడ్‌ సామగ్రి పంపిణీ చేశానని బసవరాజు అమర్‌గోల్‌ తన లేఖలో తెలిపారు. అయితే ఇప్పటి వరకు దానికి సంబంధించిన బిల్లుల్లో 20 శాతమే క్లియర్‌ అయ్యాయని, మిగతా 80 శాతం బిల్లులు పెండింగ్‌లోనే ఉన్నాయని పేర్కొన్నారు. వాటిని క్లియర్‌ చేయాలని అధికారులను కోరగా, 40 శాతం కమీషన్‌ డిమాండ్‌ చేస్తున్నట్టు ఆయన వాపోయారు. ముఖ్యమంత్రి బసవరాజు బొమ్మైని, ఇతర ఉన్నతాధికారులను కలిసినా ఫలితం లేకపోయిందని ఆవేదన వ్యక్తం చేశారు. గత్యంతరం లేక ఈ లేఖ రాసి, ఈ కమీషన్‌ దందా వ్యవహారంలో జోక్యం చేసుకొని, తనకు న్యాయం చేయాలని కోరినట్టు అమర్‌గోల్‌ వెల్లడించారు.
