3,53,446 మందికి కంటి వెలుగు

కంటిచూపు సమస్యలతో బాధపడుతున్న వారికి వైద్య సేవలు అందించేందుకు ప్రభుత్వం కంటివెలుగు పథకాన్ని తీసుకొచ్చింది. 2018 ఆగస్టులో సీఎం కేసీఆర్‌ చేతుల మీదుగా పథకాన్ని ప్రారంభించారు.

• యాదాద్రి భువనగిరి జిల్లాలో విజయవంతంగా ముగిసిన కంటి వెలుగు కార్యక్రమం
• 86,272 మందికి కండ్లద్దాల పంపిణీ
• 44,436 మందికి ప్రిస్క్రిప్షన్‌ గ్లాసెస్‌.. ఉచితంగా మందులు

యాదాద్రి భువనగిరి, జూన్‌ 26 (నమస్తే తెలంగాణ) : కంటిచూపు సమస్యలతో బాధపడుతున్న వారికి వైద్య సేవలు అందించేందుకు ప్రభుత్వం కంటివెలుగు పథకాన్ని తీసుకొచ్చింది. 2018 ఆగస్టులో సీఎం కేసీఆర్‌ చేతుల మీదుగా పథకాన్ని ప్రారంభించారు. ఈ స్కీమ్‌ను ప్రభుత్వ ఖర్చుతో అన్నివర్గాల ప్రజలకు ఉచితంగా కంటి పరీక్షలు నిర్వహించి, మందులు, కళ్లద్దాలు, అవసరమైన వారికి శస్త్ర చికిత్సలు నిర్వహిస్తున్నారు. రెండో విడతకు కార్యక్రమాన్ని జనవరి 19న ప్రారంభించారు. జిల్లా వ్యాప్తంగా 421 గ్రామాలు, మున్సిపాలిటీల్లోని 104వార్డుల్లో శిబిరాలు ఏర్పాటు చేశారు. జిల్లాలోని గ్రామాలు, పట్టణాల్లో వంద శాతం కంటి వెలుగు అమలైంది. మొత్తం 3,53,446మందికి కంటి పరీక్షలు నిర్వహించారు. ఇందులో అత్యధికంగా 1,86,372 (52.73శాతం) మంది మహిళలు ఉండగా, 1,66,510 మంది పురుషులు ఉన్నారు. ట్రాన్స్‌జెండర్లు 461మంది పరీక్షలు చేయించుకున్నారు. ఓవరాల్‌గా 49,582 మందికి రీడింగ్‌ గ్లాస్‌లు అందించగా, 36,690మందికి ప్రిస్కిప్షన్‌ అద్దాలు పంపిణీ చేశారు. మరో 7,746 ఆర్డర్‌ చేశారు.

40ఏండ్లు పైబడ్డోళ్లకే కంటి సమస్యలు..
జిల్లాలో 2,59,426మందికి ఎలాంటి కంటి సమస్యలు లేనట్లు వైద్యులు తేల్చారు. 40 ఏండ్లు పైబడికి వారికి అధికంగా కంటి చూపు సమస్యలు ఉన్నట్లు గుర్తించారు. మొత్తంగా 49,582 మందికి రీడింగ్‌ గ్లాస్‌లు అందించగా, అందులో 44,689మంది 40 ఏండ్లు నిండినవారే ఉండడం విశేషం. ఇక మొత్తం కంటిపరీక్షలు చేయించుకున్నవారిలో ఎస్సీలు 54,928 మంది, ఎస్టీలు 20,720మంది, బీసీలు 2,38,968మంది, ఓసీలు 34,170, మైనార్టీలు 4,557మంది ఉన్నారు.