చిత్రమైన లిఖితం

ఆ బాలిక పెన్సిల్‌ వర్క్స్‌ దిట్ట. ఆక్రిలిక్‌ కలర్స్‌తో క్యాన్వాస్‌ పెయింటింగ్‌లో ప్రత్యేక శైలిని కనబర్చుతూ ఔరా అనిపించుకుంటున్నది. ఓ వైపు చదువుకుంటూనే మరో వైపు సామాజిక దర్పణం పట్టేలా చిత్రాలు వేస్తూ రాష్ట్ర, జాతీయ స్థాయిలో అనేక బహుమతులు గెలుచుకున్నది మిర్యాలగూడ పట్టణానికి చెందిన లిఖిత.

• క్యాన్వాస్‌ పెయింటింగ్‌లో ప్రత్యేకం
• రాష్ట్ర, జాతీయ స్థాయిలో వరించిన అనేక బహుమతులు

ఆ బాలిక పెన్సిల్‌ వర్క్స్‌ దిట్ట. ఆక్రిలిక్‌ కలర్స్‌తో క్యాన్వాస్‌ పెయింటింగ్‌లో ప్రత్యేక శైలిని కనబర్చుతూ ఔరా అనిపించుకుంటున్నది. ఓ వైపు చదువుకుంటూనే మరో వైపు సామాజిక దర్పణం పట్టేలా చిత్రాలు వేస్తూ రాష్ట్ర, జాతీయ స్థాయిలో అనేక బహుమతులు గెలుచుకున్నది మిర్యాలగూడ పట్టణానికి చెందిన లిఖిత.

మిర్యాలగూడ పట్టణంలోని శాంతినగర్‌కు చెందిన కమటం మధు, దీప్తి దంపతుల కుమార్తె లిఖిత ప్రస్తుతం 8వ తరగతి చదువుతున్నది. ఆమెకు చిన్నతనం నుంచే చిత్రలేఖనంపై ఆసక్తి ఉండేది. అది గమనించిన తల్లిదండ్రులు పట్టణానికి చెందిన ప్రముఖ చిత్రకారుడు ఇనుగుర్తి విజయ్‌కుమార్‌ వద్ద చిత్రలేఖనం తరగతులకు పంపించారు. అక్కడ రెండు సంవత్సరాలుగా ఆయిల్‌ పెయింట్‌, డ్రాయింగ్‌, పెన్సిల్‌ వర్క్స్‌, వాటర్‌ కలర్స్‌, క్యాన్వాస్‌ పెయింటింగ్‌ నేర్చుకుంటున్నది.

ఈ క్రమంలో వివిధ విద్యాసంస్థలు నిర్వహించే రాష్ట్ర, జాతీయ స్థాయి పోటీల్లో పాల్గొని ప్రతిభ కనబరిచి అనేక బహుమతులు, పతకాలను గెలుచుకున్నది. లిఖిత వేసిన దాదాపు వందకుపైగా చిత్రాలు సామాజిక దర్పణం పట్టేలా ఆకర్షణీయంగా ఉన్నాయి. వాటర్‌ కలర్స్‌తో వేసిన చిత్రాల్లో ప్లాస్టిక్‌ నిషేధం, పల్లె వాతావరణం, సేవ్‌ వాటర్‌, సేవ్‌ ఎర్త్‌, పర్యావరణం, ఆడ పిల్లలపై వేసిన చిత్రాలు ఆలోచింపజేస్తున్నాయి. కాగా, తాను వేసిన చిత్రాలతో భవిష్యత్‌లో మిర్యాలగూడలో ఒక ప్రదర్శన ఏర్పాటు చేయాలని ఉన్నదని లిఖిత తెలిపింది.

లిఖిత సాధించిన పతకాలు

• 2022లో రంగోత్సవ్‌ సెలబ్రేషన్స్‌లో భాగంగా ముంబై వారు నిర్వహించిన జాతీయ స్థాయి కలర్‌ కాంటెస్ట్‌లో
  మెరిట్‌ అవార్డు సాధించింది.
• 2022లో సమగ్రశిక్ష అభియాన్‌ నల్లగొండ, డిపార్ట్‌మెంట్‌ ఆఫ్‌ స్కూల్‌ ఎడ్యుకేషన్‌ ఆధ్వర్యంలో నిర్వహించిన పోటీలో తృతీయ బహుమతి గెలుచుకుంది.
• కలాం యువ ఫౌండేషన్‌ వారు నిర్వహించిన ఆంధ్రప్రదేశ్‌ స్టేట్‌ లెవల్‌ డ్రాయింగ్‌ కాంపిటేషన్‌లో మెరిట్‌ అవార్డు పొందింది.
• 2023లో డ్రీమ్‌ ఆర్ట్‌ అకాడమీ విజయవాడ వారు నిర్వహించిన జాతీయ స్థాయి పోటీల్లో బంగారు పతకం సాధించింది.
• 2023లో యంగ్‌ ఇన్వాయిస్‌ ఇంటర్నేషనల్‌ హైదరాబాద్‌ వారు నిర్వహించిన ఆల్‌ఇండియా ఆర్ట్‌ కాంటెస్ట్‌లో మెరిట్‌ సర్టిఫికెట్‌ అందుకుంది.
• 2023లో శ్రీదర్శిని కళైకుడమ్‌ చెన్నై వారు నిర్వహించిన జాతీయ స్థాయి పోటీల్లో ప్రశంసా పత్రం అందుకుంది.
• 2023లో చోడవరం చిత్ర కళానిలయం విశాఖపట్నం వారు నిర్వహించిన ఆల్‌ఇండియా కాంటెస్ట్‌లో బంగారు పథకం సాధించింది.