ఉమ్మడి నల్లగొండను సస్యశ్యామలం చేస్తాం

ఉమ్మడి నల్లగొండ జిల్లాలోని సాగునీటి ప్రాజెక్టులను పూర్తి చేసి సస్యశ్యామలం చేస్తానని, అది తన ధర్మమని రాష్ట్ర నీటి పారుదల శాఖ మంత్రి నలమాద ఉత్తమ్‌ కుమార్‌ రెడ్డి అన్నారు.

• చెక్‌డ్యామ్‌ల నుంచి ప్రాజెక్టుల వరకు అన్నీ పూర్తి చేస్తాం
• బునాదిగాని, పిల్లాయిపల్లి, ధర్మారెడ్డి కాల్వలకు ఎన్ని నిధులైనా ఇస్తం
• భూసేకరణ బాధ్యతలను ఎమ్మెల్యేలు తీసుకోవాలి
• నీటి పారుదల శాఖ మంత్రి ఉత్తమ్‌కుమార్‌రెడ్డి
• రెవెన్యూ మంత్రి పొంగులేటితో కలిసి నీటి పారుదల పనులపై సమీక్ష
• ఎంపీ, ఎమ్మెల్సీ, ఎమ్మెల్యేల హాజరు

యాదాద్రి భువనగిరి, ఆగస్టు 30 (నమస్తే తెలంగాణ) : ఉమ్మడి నల్లగొండ జిల్లాలోని సాగునీటి ప్రాజెక్టులను పూర్తి చేసి సస్యశ్యామలం చేస్తానని, అది తన ధర్మమని రాష్ట్ర నీటి పారుదల శాఖ మంత్రి నలమాద ఉత్తమ్‌ కుమార్‌ రెడ్డి అన్నారు. చెక్‌డ్యామ్‌లు మొదలుకుని లిఫ్ట్‌ ఇరిగేషన్లు, ప్రాజెక్టుల వరకు అన్నీ పూర్తి చేస్తామన్నారు. శుక్రవారం భువనగిరిలో జరిగిన భువనగిరి పార్లమెంట్‌ నియోజకవర్గ స్థాయి నీటి పారుదల పనులపై రెవెన్యూ శాఖ మంత్రి పొంగులేటి శ్రీనివాస్‌రెడ్డితో కలిసి సమీక్షించారు.

అంతకుముందు అనాజిపురం శివారులోని బునాదిగాని కాల్వను మంత్రి, ఎమ్మెల్యేలతో కలిసి పరిశీలించారు. సమీక్షలో భువనగిరి పార్లమెంట్‌ పరిధిలోని సాగునీటి ప్రాజెక్టుల పనులను పవర్‌ పాయింట్‌ ప్రజెంటేషన్‌ ద్వారా అధికారులు వివరించారు. ఈ సందర్భంగా మంత్రి ఉత్తమ్‌ మాట్లాడుతూ బునాదిగాని, పిల్లాయిపల్లి, ధర్మారెడ్డి కాల్వల పూర్తికి ఎన్ని నిధులైనా మంజూరు చేస్తామన్నారు. బునాదిగాని కాల్వకు రూ.269 కోట్లు, పిల్లాయిపల్లి కాల్వకు రూ.86 కోట్లు, ధర్మారెడ్డి కాల్వకు రూ.133 కోట్ల అవసరమన్నారు.

సాగునీటి ప్రాజెక్టుల కోసం అవసరమైన భూసేకరణను ఎమ్మెల్యేలు పూర్తి చేయాలని కోరారు. భూసేకరణ అనంతరం సంవత్సరంలో పనులు పూర్తి చేయొచ్చన్నారు. ముఖ్యమంత్రి ఆలోచన మేరకు మూసీ ప్రక్షాళన జరుగుతుందన్నారు. భవిష్యత్త్‌లో భువనగిరి ప్రాంతానికి దేవాదుల నుంచి లక్షల ఎకరాలకు సాగునీళ్లు వస్తాయని, దేవాదుల ప్రాజెక్టుకు అధిక ప్రాధాన్యమిచ్చి రెండేండ్లలో పూర్తి చేస్తామని తెలిపారు.

2026 మార్చి నాటికి దేవాదుల పూర్తి : మంత్రి పొంగులేటి

దేవాదులకు ప్రాజెక్ట్‌కు 16 ఏండ్ల క్రితం సోనియాగాంధీ శంకుస్థాపన చేశారని, 2026 మార్చి నాటికి దేవాదుల ప్రాజెక్టును పూర్తి చేస్తామని మంత్రి పొంగులేటి శ్రీనివాస్‌రెడ్డి తెలిపారు. సోనియా గాంధీతో ప్రారంభోత్సవం చేసి జాతికి అంకితం చేస్తామన్నారు. దేవాదుల ద్వారా 6 లక్షల ఎకరాలకు సాగు నీరు అందుతుందన్నారు. 45 రోజుల్లోపు రాష్ట్రంలో ఇందిరమ్మ ఇండ్లకు నిర్మాణానికి శ్రీకారం చుడుతామన్నారు. సమావేశంలో నీటి పారుదల శాఖ స్పెషల్‌ సెక్రటరీ ప్రశాంత్‌ జీవన్‌ పాటిల్‌, కలెక్టర్‌ హనుమంతు కే జెండగే, డీసీపీ రాజేశ్‌చంద్ర, అడిషనల్‌ కలెక్టర్లు గంగాధర్‌, బెన్‌షాలోమ్‌ పాల్గొన్నారు.

స్థానిక ప్రజాప్రతినిధులు కోరినవివి..

ప్రభుత్వ విప్‌ బీర్ల ఐలయ్య మాట్లాడుతూ.. ఆలేరు, భువనగిరి ప్రాంతాలకు సాగునీరు అందించి అభివృద్ధి చేయాలని కోరారు. తపాసుపల్లికి నీరు అందిస్తే రాజపేట సస్యశ్యామలం అవుతుందన్నారు. కొండపోచమ్మ సాగర్‌ ద్వారా ఇంకా 20 చెరువులు నింపే అవకాశం ఉందని, ఆ పనులు చేపట్టాలని, యాదగిరిగుట్ట గండి చెరువుకు కూడా నీళ్లు ఇవ్వాలని కోరారు.

• బునాదిగాని, పిలాయిపల్లి, ధర్మారెడ్డిపల్లి కాల్వలను చివరి వరకు పెంచితే దీర్ఘకాలం ఉపయోగకరంగా ఉంటాయని భువనగిరి ఎంపీ చామల కిరణ్‌ కుమార్‌ రెడ్డి అన్నారు. భూసేకరణ జరిగితేనే ప్రాజెక్టులు ఫలిస్తాయని చెప్పుకొచ్చారు.
• గంగా నది ప్రక్షాళన తరహాలో మూసీని ప్రక్షాళన చేయాలని ఎమ్మెల్సీ తీన్మార్‌ మల్లన్న కోరారు. స్వచ్ఛమైన తాగు నీరు కోసం ప్రతి పాఠశాలకు నిధులు కేటాయించాలన్నారు.
• కాల్వల పనులు వెడల్పు చేస్తున్నారని, తద్వారా ఏడింతల నీళ్లు అధికంగా వచ్చే అవకాశం ఉందని, మంచి కాంట్రాక్టర్లను నియమించి పనులను త్వరగా పూర్తి చేయాలని భువనగిరి ఎమ్మెల్యే కుంభం అనిల్‌ కుమార్‌రెడ్డి కోరారు. బస్వాపూర్‌ 90 శాతం పూర్తి అయిందని, తిమ్మాపూర్‌, బస్వాపూర్‌ నిర్వాసితులకు ఆర్‌ఓఆర్‌ కింద నష్టపరిహారం నిధులు ఇవ్వాలని విజ్ఞప్తి చేశారు.
• ఆసిఫ్‌నహర్‌ కాల్వకు రూ.5 కోట్లు కేటాయించాలని, ఎస్సారెస్సీకి కాల్వలకు నీళ్లు వదిలి చెరువులు నింపాలని తుంగతుర్తి ఎమ్మెల్యే మందుల సామేల్‌ కోరారు.
• బస్వాపూర్‌ ద్వారా ఈ ప్రాంతానికి గోదావరి జలాలు తీసుకొస్తే రైతులకు న్యాయం చేసిన వారమవుతామని మునుగోడు ఎమ్మెల్యే
  కోమటిరెడ్డి రాజగోపాల్‌రెడ్డి అన్నారు. మూసీ జరుగుతున్న నష్టాన్ని నివారించాలన్నారు.
• నాలుగు మండలాలకు సాగునీరు అందించే శివన్నగూడెం ప్రాజెక్టు పనులు పూర్తి చేయాలని ఇబ్రహీంపట్నం ఎమ్మెల్యే మల్‌రెడ్డి రంగారెడ్డి కోరారు.
• పానగల్లు నుంచి ఐటిపాములకు నీళ్లు వస్తే చెరువులు నింపవచ్చని, కాబట్టి సాగు నీరు విడుదల చేయాలని నకిరేకల్‌ ఎమ్మెల్యే వేముల వీరేశం కోరారు.
• ధర్మసాగర్‌ నుంచి గండిరామారం లిఫ్ట్‌ పనులు చేయాలని జనగామ ఎమ్మెల్యే పల్లా రాజేశ్వర్‌ రెడ్డి కోరారు. దీని ద్వారా 90 వేల ఎకరాలకు నీళ్లు వస్తాయని, రూ.207 కోట్లతో పనులు చేయవచ్చని చెప్పారు. 500 చెరువులను కూడా నింపవచ్చని, నిధులను మంజూరు చేయాలని విజ్ఞప్తి చేశారు.