కాళోజీకి ఘన నివాళి.. న్యాయ‌వాదుల‌ రక్తదానం

ప్రజాకవి కాళోజీ నారాయణరావు ఆశయాలకు అనుగుణంగా సేవా కార్యక్రమాలు నిర్వహించడమే ఆయనకు అందించే నిజమైన నివాళి అని కాళోజీ తెలంగాణ జూనియర్ లేడీ అడ్వకేట్స్ వెల్ఫేర్ అసోసియేషన్ నల్లగొండ జిల్లా అధ్యక్షురాలు పి.భవాని అన్నారు. కాళోజీ 24వ వర్ధంతిని పురస్కరించుకుని...

రామగిరి, నవంబరు 13 : ప్రజాకవి కాళోజీ నారాయణరావు ఆశయాలకు అనుగుణంగా సేవా కార్యక్రమాలు నిర్వహించడమే ఆయనకు అందించే నిజమైన నివాళి అని కాళోజీ తెలంగాణ జూనియర్ లేడీ అడ్వకేట్స్ వెల్ఫేర్ అసోసియేషన్ నల్లగొండ జిల్లా అధ్యక్షురాలు పి.భవాని అన్నారు. కాళోజీ 24వ వర్ధంతిని పురస్కరించుకుని శుక్రవారం నల్లగొండ బార్ అసోసియేషన్ హాల్‌లో కాళోజీ తెలంగాణ జూనియర్ లేడీ అడ్వకేట్స్ వెల్ఫేర్ అసోసియేషన్, నల్లగొండ బార్ అసోసియేషన్ సంయుక్త ఆధ్వర్యంలో రక్తదాన శిబిరం నిర్వహించారు. ఈ సందర్భంగా భవాని మాట్లాడుతూ.. కాళోజీ తన కవిత్వం ద్వారా ప్రజల కష్టాలు, కన్నీళ్లు, ఆకాంక్షలకు అక్షరరూపం ఇచ్చిన గొప్ప ప్రజాకవి అని కొనియాడారు. అన్యాయాలు, సామాజిక అసమానతలను ప్రశ్నిస్తూ ప్రజల్లో చైతన్యం నింపారని పేర్కొన్నారు.

రక్తదానం మరొకరి ప్రాణాలను కాపాడే గొప్ప మానవతా కార్యక్రమమని, ప్రతి ఒక్కరూ స్వచ్ఛందంగా రక్తదానానికి ముందుకు రావాలని పిలుపునిచ్చారు. కాళోజీ ఆశయాలను స్ఫూర్తిగా తీసుకుని భవిష్యత్‌లోనూ సామాజిక సేవా కార్యక్రమాలు కొనసాగిస్తామని తెలిపారు. శిబిరాన్ని నల్లగొండ బార్ అసోసియేషన్ అధ్యక్షుడు ఏ.సతీష్ కుమార్, కార్యదర్శి బి.అశోక్ కుమార్ ప్రారంభించారు. మహిళా న్యాయవాదులు స్వచ్ఛందంగా రక్తదానం చేశారు. ఈ కార్యక్రమంలో బార్ అసోసియేషన్ ఉపాధ్యక్షులు పజ్జూరి స్వామిగౌడ్, నూకల సంధ్యారాణి, పలువురు సీనియర్, జూనియర్ న్యాయవాదులు పాల్గొన్నారు.