రేపటి నుంచి దేవీశరన్నవరాత్రి ఉత్సవాలు

దేవీ శరన్నవరాత్రి ఉత్సవాలకు ఉమ్మడి జిల్లావ్యాప్తంగా సిద్ధ్దమయ్యారు. అన్ని ప్రాంతాల్లో అమ్మవారి విగ్రహాలను ప్రతిష్టించేందుకు భక్తులు మండపాలను సిద్ధం చేశారు. ఈ నెల 3 నుంచి 12 వరకు ఉత్సవాలు సాగనుండగా గురువారం మండపాల్లో అమ్మవారు కొలువుదీరనున్నారు.

• ఈ నెల 12 వరకు వేడుకలు
• విగ్రహాల కొనుగోళ్లు.. ముస్తాబైన మండపాలు
• అమ్మవారి ఆలయాలు ముస్తాబు

రామగిరి, అక్టోబర్‌ 1: దేవీ శరన్నవరాత్రి ఉత్సవాలకు ఉమ్మడి జిల్లావ్యాప్తంగా సిద్ధ్దమయ్యారు. అన్ని ప్రాంతాల్లో అమ్మవారి విగ్రహాలను ప్రతిష్టించేందుకు భక్తులు మండపాలను సిద్ధం చేశారు. ఈ నెల 3 నుంచి 12 వరకు ఉత్సవాలు సాగనుండగా గురువారం మండపాల్లో అమ్మవారు కొలువుదీరనున్నారు.

నల్లగొండ జిల్లాకేంద్రంలో రాక్‌హిల్స్‌కాలనీలో ఉత్సవాలను అత్యంత వైభవంగా నిర్వహించే ఏర్పాట్లు చేశారు. మరోవైపు దేవీ నవరాత్రి ఉత్సవాలకు నల్లగొండలోని అమ్మవారి ఆలయాలు ముస్తాబయ్యాయి. తులసీనగర్‌లోని భక్తాంజనేయ స్వామి ఆలయ ప్రాంగణంలోని సరస్వతి, మహాలక్ష్మీ ఆలయంతోపాటు పాతబస్తీ భక్తాంజనేయ సహిత సంతోషిమాత గుడి, కలెక్టరేట్‌ సమీపంలోని అయ్యప్ప దేవాలయంలో గల జ్ఞాన సరస్వతి ఆలయం, పానగల్‌, హైదరాబాద్‌ రోడ్డులోని మర్రిగూడ స్టేజీ వద్ద గల రేణుకా ఎల్లమ్మ ఆలయాల్లో ఉత్సవాలకు ఏర్పాట్లు చేశారు.

ఉత్సవాలు ఇలా..

• తొలి రోజు ఈ నెల 3న బాలాత్రిపురసుందరిగా అమ్మవారు దర్శనం ఇస్తారు. లేత కదంబ పూలు, తెలుపు రంగు చీరతోపాటు నైవేద్యంగా దద్దోజనం సమర్పిస్తారు.
• 4న గాయత్రీదేవిగా దర్శనం ఇస్తారు. చామంతి పూలు, పసుపు రంగు చీరతోపాటు నిమ్మకాయ, రవ్వకేసరి నైవేద్యంగా అందించారు.
• 5న అన్నపూర్ణదేవిగా అమ్మవారు సాక్షాత్కరిస్తారు. గులాబీ పూలు, అదేరంగు చీరతో అలంకరణ చేసి, పులిహోర నైవేద్యంగా సమర్పిస్తారు.
• 6న లలితా త్రిపురసుందరిగా దర్శనం ఇస్తారు. మందార పూలు, పసుపు, గంధం పొడి రంగు చీరతోపాటు పాయసం, తీపి పొంగలి నైవేద్యంగా సమర్పిస్తారు.
• 7న మహాచండీగా అమ్మవారి దర్శనం ఉంటుంది.
• 8న మహాలక్ష్మీదేవిగా దర్శనమిచ్చే దూర్గామాతకు పారిజాతాలు, ఆకుపచ్చ రంగు చీర సమర్పిస్తారు. క్షీరాన్నం నైవేద్యంగా అందిస్తారు.
• 9న సరస్వతీదేవిగా దర్శనం ఇస్తారు. తులసీ దళాలు, గోధుమరంగ చీరతోపాటు రవ్వకేసరి, పాయసం సమర్పిస్తారు.
• 10న దుర్గదేవిగా అమ్మవారు దర్శనమిస్తారు. కమలం పూలు, తెలుపు రంగు చీరతోపాటు కట్టెలపొంగలి నైవేద్యంగా సమర్పిస్తారు.
• 11న మహిషాసుర మర్ధినిగా దర్శనం ఇస్తారు. కనకాంబరం పూలు, ఎరుపు రంగు చీరతో పాటు పులిహోర నైవేద్యంగా అందిస్తారు.
• 12న విజయదశమి రోజున రాజరాజేశ్వరిగా అమ్మవారు దర్శనమిస్తారు. మందార పూలు, నీలం రంగు చీరతోపాటు చక్కర పాయసం నైవేద్యంగా సమర్పిస్తారు.