శరీరం, మెదడుపై మానసిక ఒత్తిడిని తగ్గించేందుకు.. సంపూర్ణ ఆరోగ్యాన్ని సంపాదించుకునేందుకు యోగా ఒక దివ్యౌషధం. ఐదు వేల సంవత్సరాలకు పూర్వమే యోగా మన దేశ జీవన విధానంలో భాగమైపోయింది. శరీరం, మనస్సును సమతుల్యం చేసేందుకు చక్కటి మార్గం ఈ యోగా.
హుస్నాబాద్టౌన్, జూన్ 20: ఆరోగ్యమే మహాభాగ్యం.. సంపూర్ణమైన ఆరోగ్యాన్ని పెంపొదించేందుకు యోగా ఎంతగానో తోడ్పడుతుంది. ప్రతినిత్యం యోగా చేయడంతో ప్రతి ఒక్కరిని ఆరోగ్యంగా ఉంచేందుకు దోహదపడుతుంది.
పూర్వం కాలం నుంచే…
పురాతన కాలం నుంచి అధునిక కాలం వరకు యోగాతో జరుగుతున్న మేలును ప్రతి ఒక్కరూ గుర్తిస్తున్నారు. వేల సంవత్సరాల నుంచి యోగా మన జీవన విధానంలో భాగంగా మారింది. మారుతున్న ప్రస్తుత సమాజంలో ఉరుకులు పరుగుల జీవితాలు, మానసిక ఒత్తిళ్లను దూరం చేసేందుకు నేటి తరానికి ఈ యోగా ఎంతగానో ఉపయోగపడుతుంది. కండరాలను బలోపేతం చేస్తూ, శరీరం, మనస్సును దృఢంగా ఉంచుకునేందుకు యోగా మేలు చేస్తుంది.
యోగాసనాలు…
జీవితంలో ఊబకాయను తగ్గించుకోవడానికి తోడు రోగ నిరోధక శక్తిని పెంచేందుకు యోగాసనాలు ఎంతగానో ఉపయోగపడుతున్నాయి. ముఖ్యంగా మనం నిత్యం యోగాసనాలు, ధ్యానం చేయడంతో ఏకాగ్రతను పెంచుతూ శరీరంలో అన్ని అవయవాలకు రక్త ప్రసరణ మెరుగుపరుస్తుంది. పిల్లల్లో ఎదుగుదలతోపాటు ఆకలిని పెంచుతూ జీర్ణక్రియను సవ్యంగా ఉంచుతూ, జలుబు, దగ్గు, జ్వరం లాంటి రోగాలు కూడా దరి చేరకుంటా యోగా ఉపయోగపడుతున్నది. శ్వాస పద్ధతులు సక్రమంగా ఉంచుతూ, రక్త ప్రసరణను మెరుగుపర్చడం, థైరాయిడ్ తదితర వ్యాధులు దరి చేరకుండా ఉంటాయి. మనిషిపై ఒత్తిడిని తగ్గిస్తూ, జ్ఞాపక శక్తిని, ఆయుష్షును పెంచేందుకు నిత్య యోగా దోహదపడుతున్నది. సంపూర్ణ ఆరోగ్యానికి, జీవిత కాలం వ్యాధులు నయం కావడానికి యోగా ఎంతగానో ఉపయోగపడుతుందనేది సత్యం.
యోగా దినోత్సవానికి భారీ ఏర్పాట్లు
అంతర్జాతీయ యోగా దినోత్సవాన్ని పురస్కరించుకుని బుధవారం హుస్నాబాద్లో యోగా దినోత్సవాన్ని భారీగా నిర్వహించేందుకు ఏర్పాట్లు చేస్తున్నారు. స్థానిక ఎల్లమ్మ చెరువు కట్టపై నిర్వహించే యోగా కార్యక్రమానికి దాదాపు వెయ్యి మంది ప్రజలు పాల్గొనేలా ఏర్పాట్లు చేశారు. యోగాతో వస్తున్న ఫలితాలను ప్రజలకు చేరవేసేందుకు ఈ కార్యక్రమాన్ని పెద్ద సంఖ్యలో నిర్వహిస్తున్నట్లు మున్సిపల్ వైస్ చైర్పర్సన్ అయిలేని అనిత తెలిపారు.
15 ఏండ్ల నుంచి యోగా చేస్తున్నా…
15 సంవత్సరాలుగా యోగా చేస్తూ శారీరకంగా, మానసికంగా అనేక లాభాలు పొందాను. ప్రతి విషయాన్ని పాజిటివ్గా ఆలోచిస్తూ, శరీర బరువును తగ్గించుకున్నాను. ఒత్తిడిని అధిగమించి, వివిధ రకాల వ్యాధులకు దూరంగా ఉండటానికి నాకు యోగా బాగా ఉపయోగపడింది. యోగా అన్నింటి కన్నా ఉత్తమమైనది. మన ఆలోచనా విధానం, చేసే పనిలో శ్రద్ధ ఉండాలంటే యోగాయే మార్గం. సంపూర్ణ ఆరోగ్యం పొందాలనుకునేవారు యోగాతో మంచి ఫలితాలను పొందవచ్చు. – అయిలేని అనిత, వైస్ చైర్పర్సన్, హుస్నాబాద్
ఆరోగ్యంగా ఉన్నానంటే యోగానే కారణం
నేను మానసికంగా, శారీరకంగా ఆరోగ్యంగా ఉన్నానంటే అందుకు యోగానే కారణం. 12 ఏండ్ల నుంచి యోగా చేస్తున్నా. ప్రతిరోజూ ఉదయం లేవగానే 40 నిమిషాలపాటు యోగా చేస్తా. యోగాతో రోజంతా యాక్టివ్గా ఉంటా. ప్రస్తుత పరిస్థితుల్లో మానసిక, శారీరక ఒత్తిడిని తగ్గించుకునేందుకు ప్రతి ఒక్కరూ యోగా చేస్తే అన్నింటికీ మేలు. రాష్ట్రస్థాయిలో పలు కార్యక్రమాల్లో కూడా నేను పాల్గొన్నా. ప్రస్తుతం పనిచేస్తున్న మల్లంపల్లి పాఠశాలలో కూడా విద్యార్థులకు యోగా నేర్పిస్తున్నాం.
– చీకోటి మహేశ్, ఉపాధ్యాయుడు, హుస్నాబాద్