Visit:
సంగారెడ్డి, నవంబర్‌ 30(నమస్తే తెలంగాణ): అడ్డదారులు, అధికార దుర్వినియోగంతో సంగారెడ్డి నియోజకవర్గంలో సర్పంచ్‌ పదవులు కైవసం చేసుకోవాలని కాంగ్రెస్‌ కుటిల ప్రయత్నం చేస్తున్నది. దీనికోసం కాంగ్రెస్‌ అధికార దుర్వినియోగానికి పాల్పడుతున్నది. బరిలో నుంచి తప్పుకోవాలని అభ్యర్థులను బెదిరిస్తున్నారు. కాంగ్రెస్‌ నేతలు ప్రత్యర్థులపై రాజకీయ ఒత్తిడి తీసుకురావడంతో పాటు డబ్బుల ఆశచూపించి విత్‌డ్రా చేయించే కుట్రలు చేస్తున్నారు. అప్పటికీ లొంగకపోతే బరిలో ఉండాలనుకుంటున్న సర్పంచ్‌ అభ్యర్థులను పోలీస్‌స్టేషన్‌లకు రప్పించి పోలీసు అధికారుల ద్వారా నామినేషన్లు విత్‌డ్రా చేసుకోవాలంటూ బెదిరింపులకు పాల్పడుతున్నారు. సంగారెడ్డి మండలం తాళ్లపల్లి సర్పంచ్‌ అభ్యర్థి శ్రీజ ఘటనను ఉదాహరణగా చెప్పవచ్చు.
సంగారెడ్డి జిల్లా తాళ్లపల్లి సర్పంచ్‌ పదవి ఎస్సీ మహిళకు రిజర్వు అయ్యింది. సంగారెడ్డి నియోజకవర్గ కాంగ్రెస్‌ ముఖ్యనేత అనుచరుడు తాళ్లపల్లి గ్రామంలో చక్రం తిప్పతూ ఉంటాడు. కాంగ్రెస్‌ అధికారంలో ఉండడంతో సర్పంచ్‌ పదవిని ఏకగ్రీవంగా తన తల్లికి ఇప్పించాలని ప్లాన్‌ చేశాడు. సర్పంచ్‌ పదవికి నలుగురు గ్రామ నాయకులు వారి భార్యలను బరిలో దించేందుకు యత్నించగా, అన్నిరకాల ఒత్తిడి తెచ్చి వారు నామినేషన్లు వేయకుండా సదరు కాంగ్రెస్‌ నేత అడ్డుకున్నారు. దీంతో తన తల్లి సర్పంచ్‌గా ఏకగ్రీవం కావడం ఖాయం అనుకున్నాడు. కానీ, గ్రామానికి చెందిన శ్రీజ సర్పంచ్‌ అభ్యర్థిగా నామినేషన్‌ దాఖలు చేయడంతో ఆయనకు మింగుడు పడలేదు. శ్రీజ ఇంజినీరింగ్‌ ఫైనల్‌ ఇయర్‌ చదవుతున్నది. అదే గ్రామానికి చెందిన చంద్రశేఖర్‌తో రెండేండ్లుగా ప్రేమలో ఉంది.
గ్రామంలో సర్పంచ్‌గా పోటీచేసేందుకు ఎవరూ ముందుకు రాకపోవటంతో ఆమె పోటీకి ముందుకు రాగా తల్లిదండ్రులు ఒప్పుకోలేదు. దీంతో తన ప్రేమికుడు చంద్రశేఖర్‌ సహాయంతో శ్రీజ సర్పంచ్‌ పదవికి ఆదివారం నామినేషన్‌ వేసింది. అనంతరం చంద్రశేఖర్‌ను ప్రేమ వివాహం చేసుకుంది. ఈ విషయం తెలుసుకున్న కాంగ్రెస్‌ నేత ఆమెను బరిలో నుంచి తప్పించేందుకు పావులు కదిపాడు. తమ బిడ్డను కిడ్నాప్‌ చేశారంటూ చంద్రశేఖర్‌పై శ్రీజ తల్లిదండ్రులతో సంగారెడ్డి రూరల్‌ పోలీస్‌స్టేషన్‌లో ఫిర్యాదు చేయించారు. పోలీసులు ఫోన్‌చేసి రమ్మనడంతో శ్రీజ, తన భర్త చంద్రశేఖర్‌తో కలిసి ఆదివారం ఉదయం సంగారెడ్డి రూరల్‌ పోలీస్‌ స్టేషన్‌కు వచ్చింది.
తాను మేజర్‌నని, ఇష్టపూర్వకంగానే చంద్రశేఖర్‌ను పెళ్లి చేసుకున్నానని, తనను ఎవరూ కిడ్నాప్‌ చేయలేదని పోలీసులకు శ్రీజ స్టేట్‌మెంట్‌ ఇచ్చింది. సర్పంచ్‌ అభ్యర్థులకు నామినేషన్ల స్క్రూట్నీ ఉన్నందున తనను వెంటనే పంపించాలని పోలీసులను ఆమె కోరింది. స్టేట్‌మెంట్‌ ఇచ్చిన వెంటనే ఆమెను పంపించాల్సిన పోలీసులు, ఆమెను స్టేషన్‌ నుంచి వెళ్లనీయలేదు. కాంగ్రెస్‌ ముఖ్యనేత ఒత్తిడి మేరకు పోలీసులు ఆమెను స్టేషన్‌ నుంచి కదలనీయలేదు. స్క్రూట్నీ సమయానికి అభ్యర్థి వెళ్లకపోతే ఆమె నామినేషన్‌ను ఎన్నికల అధికారులు తిరస్కరిస్తారు. అదే జరిగితే కాంగ్రెస్‌ మద్దతుదారు ఏకగ్రీవ సర్పంచ్‌గా ఎన్నిక అవుతుందని భావించి, శ్రీజను పోలీస్‌స్టేషన్‌ ఉంచే ప్రయత్నం పోలీసులు చేశారు.ఈ విషయం తెలుసుకున్న సంగారెడ్డి ఎమ్మెల్యే చింతా ప్రభాకర్‌ హుటాహుటిన సంగారెడ్డి రూరల్‌ పోలీస్‌ స్టేషన్‌ వచ్చి పోలీసుల తీరుపై ఆగ్రహం వ్యక్తం చేశారు. కాంగ్రెస్‌ నేతల ఒత్తిడితో శ్రీజను పోలీస్‌స్టేషన్‌లో గంటలతరబడి ఉంచడం సరికాదని, వెంటనే స్క్రూట్నీకి పంపించాలని ఎమ్మెల్యే కోరడంతో పోలీసులు తప్పక శ్రీజను పంపించారు.
అక్కడి నుంచి నేరుగా కల్పగూరులోని ఎన్నికల అధికారి కార్యాలయానికి వెళ్లిన శ్రీజ స్క్రూట్నీకి హాజరు కావడంతో ఆమె నామినేషన్‌ను ఎన్నికల అధికారులు ఆమోదించారు. దీంతో తాళ్లపల్లిలో సర్పంచ్‌ అభ్యర్థిగా శ్రీజ బరిలో నిలిచారు. చదువుకున్న, గ్రామ సమస్యలపై అవగాహన ఉన్న తనను గెలిపించాలని శ్రీజ గ్రామస్తులను మీడియా ద్వారా కోరింది. శ్రీజ ఘటనపై సంగారెడ్డి డీఎస్పీ సత్తయ్య స్పందిచారు. నిబంధనల మేరకు తాము వ్యవహరించామని, తమపై ఎవరూ ఒత్తిడి చేయలేదని చెప్పారు. శ్రీజ తల్లిదండ్రులు తమ బిడ్డను చంద్రశేఖర్‌ కిడ్నాప్‌ చేశారని ఫిర్యాదు చేశారని, అందుకే శ్రీజను పోలీస్‌ స్టేషన్‌ రప్పించి స్టేట్‌మెంట్‌ తీసుకున్నట్లు చెప్పారు. స్క్రూట్నీకి వెళ్లకుండా శ్రీజను పోలీసులు అడ్డుకున్నారని, నామినేషన్‌ వెనక్కి తీసుకోవాలని ఒత్తిడి చేశారన్న ఆరోపణలను డీఎస్పీ ఖండించారు.
