వరికొయ్యలు కాల్చితే ముప్పే!

: రోజురోజుకూ కూలీల కొరత పెరిగిపోతుండడంతో రైతులు వ్యవసాయంలో యంత్రాలను ఆశ్రయిస్తున్నారు.

• భూసారం దెబ్బతిని దిగుబడులపై ప్రభావం
• పర్యావరణానికి హాని
• కలియదున్నితే ఎన్నో లాభాలు

అందోల్‌/నిజాంపేట, నవంబర్‌ 27: రోజురోజుకూ కూలీల కొరత పెరిగిపోతుండడంతో రైతులు వ్యవసాయంలో యంత్రాలను ఆశ్రయిస్తున్నారు. వరికోతలకు హార్వెస్టర్లను విరివిగా వినియోగిస్తుండడంతో గడ్డి వినియోగం తగ్గిపోయింది. పశువులు ఉన్న రైతులు వరిగడ్డిని నిల్వ చేసుకుంటుండగా, మిగతా రైతులు పొలంలోనే వదిలేస్తున్నారు. తదుపరి పంటకు పొలాన్ని సిద్ధం చేసే క్రమంలో వరికొయ్యలతో పాటు వరిగడ్డ్డికి నిప్పు పెడుతున్నారు. రైతులు అవగాహన లోపంతో చేస్తున్న ఈ చర్యతో భూసారానికి ముప్పు పొంచి ఉందని వ్యవసాయశాఖ అధికారులు హెచ్చరిస్తున్నారు.

నిప్పుపెడితే కలిగే నష్టాలు..

• వరికొయ్యలను కాల్చడంతో వాతావరణ కాలుష్యం పెరుగుతుంది.
• విపరీతమైన వేడితో భూమి సారాన్ని కోల్పోతుంది. ముఖ్యంగా నత్రజని, పాస్పరస్‌ లాంటి పోషక పదార్థాల శాతం దెబ్బతిని దిగుబడి తగ్గిపోతుంది.
• భూమికి పీచు పదార్థంగా ఉపయోగపడే అవశేషాలు కాలిపోతాయి.
• పంటలకు అవసరమయ్యే ఖనిజ లవణాలు దెబ్బతింటాయి.
• మేలు చేసే సూక్ష్మజీవులు చనిపోతాయి.
• పొలాల్లో తిరిగే పాములు, ముంగిసలు, ఉడుములు, నెమళ్లు, తొండలు ఇలా అనేక రకాల జీవరాశులు చనిపోయే ప్రమాదం ఉంది. తద్వారా ప్రకృతి సమతుల్యత దెబ్బతింటుంది.
• గట్లు, మొరం గడ్డలపై ఉన్న పచ్చని చెట్లు కూడా ఈ నిప్పు కారణంగా ఒక్కోసారి బుగ్గిపాలయ్యే ప్రమాదం ఉంది.
• సమీప రైతుల పంట చేనులు దగ్ధమయ్యే అవకాశం ఉంది.
• ఆలస్యంగా కోతకు వచ్చే పంటలు, కల్లాలు దగ్గరే ఉంటే నిల్వ చేసిన ధాన్యం కాలిపోయే ప్రమాదం ఉంది.

కలియ దున్నితే ఎన్నో లాభాలు…

• వరి కొయ్యలు నేలలో కలియదున్నడంతో సేంద్రియ కర్బన శాతం పెరిగి దిగుబడులు 5నుంచి 10శాతం పెరిగే అవకాశం ఉంది.
• దుక్కి దున్నే సమయంలో సూపర్‌ ఫాస్పేట్‌ చల్లితే అవశేషాలు రెండు వారాల్లో మురిగి పోషకాలుగా అందుబాటులోకి వస్తాయి. ఫలితంగా డీఏపీ వాడకం సగం వరకు తగ్గుతుంది.
• కలియ దున్నితే దాదాపుగా ఎకరాకు టన్ను ఎరువు తయారవుతుంది.
• మొక్కలకు 2శాతం నత్రజని, 4శాతం పాస్పరస్‌ అదనంగా అందివస్తుంది.
• జింక్‌, మాంగనీసు, ఇనుము, క్యాల్షియం లాంటి సూక్ష్మధాతువులు అంది పంటకు మేలు చేకూరుతాయి.
• నేలలో కరగని మూలకాలను అనుకూలంగా మార్చుతుంది. నీటి నిల్వ పెరుగుతుంది.
• టన్ను గడ్డి కావాలంటే వరి పెరుగుదలకు 18.9 కిలోల పొటాషియం, 6.2 కిలోల నత్రజని. 1.1 కిలోల భాస్వరంతో పాటు కొంత మోతాదులో సూక్ష్మ పోషకాలు అవసరమవుతాయి. కొయ్యకాళ్లను భూమిలో కలియ దున్నితే గడ్డి ద్వారా పోషకాలు తిరిగి నేలకు చేరుతాయి.