జూరాలకు ఉధృతంగా వరద

• 93 వేల క్యూసెక్కుల ఇన్‌ఫ్లో
• 19 గేట్లు ఎత్తి దిగువకు నీటి విడుదల
• కొనసాగుతున్న విద్యుదుత్పత్తి
• లక్షా 10 వేల క్యూసెక్కుల ఔట్‌ఫ్లో

ఆత్మకూరు: ఉమ్మడి జిల్లా వరప్రదాయిని జూరాల రిజర్వాయర్‌కు వరద ఉధృతంగా వస్తుంది. ఎగువన కురుస్తున్న వర్షాలకు ఆల్‌మట్టి, నారాయణపూర్ రిజర్వాయ ర్లు పూర్తి నీటిమట్టం సామర్థ్యం చేరుకోగా దిగువకు నీటిని విడుదల చేస్తున్నారు. నారాయణపూర్ నుంచి 20 గేట్ల ద్వారా 1, 20,800 లక్షల క్యూసెక్కుల ఔట్‌ఫ్లో కొనసాగుతుండగా జూరాల ప్రాజక్ట్‌కు 93 వేల క్యూసెక్కుల ఇన్‌ఫ్లో నమోదయ్యింది. దీంతో మధ్యాహ్నం వరకు 13 గేట్లు ఎత్తి ఉండగా సాయంత్రానికి 19 గేట్లను ఎత్తి 75,943 క్యూసెక్కుల నీటిని దిగువకు విడుదల చేశారు.

ఎడమ కాలువకు 820 క్యూసెక్కులు, కుడి కాలువకు 672, సమాంతర కాలువకు 1,000, భీమా (సెకండ్)కు 750 క్యూసెక్కుల నీటిని విడుదల చేస్తున్నారు. 31, 365 క్యూసెక్కుల నీటిని విద్యుత్ ఉత్పత్తికి విడుదల చేస్తుండగా ఎగువ, దిగువ జలవిద్యుత్ కేంద్రాలలో 11 యూనిట్లలో విద్యుత్ ఉత్పత్తి జరుగుతోంది. ఎగువ జూరాలలో 5 యూనిట్ల ద్వారా 9.927 మి.యూ ఉత్పత్తి జరుగగా మొత్తంగా 166.306 మి.యూ ఉత్పత్తి జరిగింది.

దిగువ జూరాలలో 6 యూనిట్ల ద్వారా 4.665 మి.యూ ఉత్పత్తి జరుగగా మొత్తంగా 182.758 మి.యూ విద్యుదుత్పత్తి జరిగింది. ప్రాజక్ట్ పూర్తి స్థాయి నీటిమట్టం 9.657 టీఎంసీలు కాగా 8.107 టీఎంసీల నీటిమట్టాన్ని నిర్వహిస్తున్నారు. ప్రాజక్ట్ నుంచి1,10,618 లక్షల క్యూసెక్కుల ఔట్‌ఫ్లో కొనసాగుతుంది.