అభివృద్ధికి కేరాఫ్‌గా కొల్లాపూర్‌

స్వరాష్ట్రం ఏర్పాటుతోనే కొల్లాపూర్‌ నియోజకవర్గం అభివృద్ధి దిశగా పరుగులు పెడుతున్నది. ఎనిమిదేండ్ల కాలంలో బీడు భూములకు ఎంజీకేఎల్‌ఐ ప్రాజెక్టుతో సాగునీరు అందిస్తుండగా.. పీఆర్‌ఎల్‌ఐ ప్రాజెక్టు పనులు శరవేగంగా జరుగుతున్నాయి. రైతులకు నిరంతరం విద్యుత్‌ సరఫరాతోపాటు మండలంలోని ఎల్లూరు వద్ద రూ.980కోట్లతో మిషన్‌ భగీరథ ద్వారా ఏడు మండలాల్లోని 132 గ్రామపంచాయతీల్లో ఇంటింటికీ నల్లా ద్వారా శుద్ధజలాన్ని అందిస్తున్నారు.

• ఇంటింటికీ నల్లా నీరు
• సాగునీటితో పండుగలా వ్యవసాయం
• హర్షం వ్యక్తం చేస్తున్న అన్నదాతలు
• పట్టణ అభివృద్ధికి రూ.కోట్లు మంజూరు

కొల్లాపూర్‌, ఏప్రిల్‌ 17: స్వరాష్ట్రం ఏర్పాటుతోనే కొల్లాపూర్‌ నియోజకవర్గం అభివృద్ధి దిశగా పరుగులు పెడుతున్నది. ఎనిమిదేండ్ల కాలంలో బీడు భూములకు ఎంజీకేఎల్‌ఐ ప్రాజెక్టుతో సాగునీరు అందిస్తుండగా.. పీఆర్‌ఎల్‌ఐ ప్రాజెక్టు పనులు శరవేగంగా జరుగుతున్నాయి. రైతులకు నిరంతరం విద్యుత్‌ సరఫరాతోపాటు మండలంలోని ఎల్లూరు వద్ద రూ.980కోట్లతో మిషన్‌ భగీరథ ద్వారా ఏడు మండలాల్లోని 132 గ్రామపంచాయతీల్లో ఇంటింటికీ నల్లా ద్వారా శుద్ధజలాన్ని అందిస్తున్నారు. నియోజకవర్గం అభివృద్ధికి ఎమ్మెల్యే బీరం హర్షవర్ధన్‌రెడ్డి రూ.వందల కోట్లను మంజూరు చేయించి పనులను పర్యవేక్షిస్తున్నారు. గతంలో సాగునీరు లేక సాగు చేయలేక పక్క రాష్ర్టాలకు వలసలు వెళ్లారు. కాగా పోరాడి సాధించుకున్న స్వరాష్ట్రంలో అన్ని రంగాల్లో కొల్లాపూర్‌ దూసుకెళ్తున్నది. విద్య, వైద్యం, సాగు, తాగునీటి రంగాల్లో పరుగులు పెడుతున్నది. నాడు ఇంటర్‌ చదువు ముగిశాక, డిగ్రీ చదవాలంటే సుదూర ప్రాంతాలకు విద్యార్థులు వెళ్లాల్సి ఉండగా ఇప్పుడు ఇబ్బందులు తప్పాయి. పల్లెలకు బీటీరోడ్లు, పల్లె ప్రకృతివనాలు, వైకుంఠధామాలు, హరిత నర్సరీలు, జీపీలకు పక్కా భవనాలు ఏర్పాటయ్యాయి.

నియోజకవర్గంలో ఇప్పటి వరకు పూర్తయిన కొన్ని పనుల వివరాలు..

• రామాపూర్‌ వద్ద రూ.5కోట్లతో మాతాశిశు సంరక్షణ కేంద్రం ఏర్పాటు
• రూ.9.50కోట్లతో నార్లాపూర్‌-మారెడుమాన్‌దిన్నె చిన్నవాగు పై హైలేవల్‌ వంతెన నిర్మాణం
• 9.50కోట్లతో పెంట్లవెల్లి-మల్లేశ్వరం వాగుపై చెక్‌డ్యాం, హైలేవల్‌ వంతెన ఏర్పాటు
• ముక్కిడిగుండం-మొలచింతపల్లి మధ్య ఉడుముల వాగుపై రూ.6కోట్లతో చెక్‌డ్యాం, హైలేవల్‌ వంతెన నిర్మాణం
• చుక్కాయపల్లిలో రూ.5.5కోట్లతో మీని ట్యాంక్‌బండ్‌
• రూ.22కోట్లతో పీజీ కాలేజీ, బాయ్స్‌, గర్ల్స్‌ హాస్టళ్లు
• రూ.12కోట్లతో ప్రభుత్వ డిగ్రీ కాలేజీ
• రూ.9.5కోట్లతో పెంట్లవెల్లిలో చౌటచెరువు మినీ ట్యాంక్‌బండ్‌ పనులు
• రూ.143కోట్లతో సింగవట్నం చెరువు నీటితో గోపల్‌దిన్నె రిజర్వాయర్‌ను నింపి 10వేల ఎకరాల చివరి ఆయకట్టుకు సాగునీరందించే గ్రావిటీ కెనాల్‌ తవ్వకాల పనులు
• కొల్లాపూర్‌లో రూ.25లక్షలతో గ్రంథాలయ భవనం, కాంప్లెక్స్‌ నిర్మాణాలు
• కొల్లాపూర్‌లో రెవెన్యూ డివిజన్‌ కార్యాలయం ఏర్పాటు
• చిన్నంబావి, పెంట్లవెల్లి మండలాల ఏర్పాటు
• ఎంజీకేఎల్‌ఐ జొన్నలబొగుడ రెండో లిఫ్ట్‌ ప్రారంభం
• నియోజకవర్గ అభివృద్ధికి రూ.130కోట్ల ప్రత్యేక నిధులు
• రూ.15కోట్లతో సింగవట్నం లక్ష్మీనర్సింహ్మస్వామి ఆలయ పునర్నిర్మాణం
• కొల్లాపూర్‌లో రూ.2కోట్లతో డివైడర్‌, చౌరస్తాల ఏర్పాటు
• పాన్‌గల్‌కు వ్యవసాయ సహాయ కార్యాలయం మంజూరు
• కొల్లాపూర్‌కు ఉద్యాన పాలిటెక్నిల్‌ కళాశాల మంజూరు
• పాన్‌గల్‌ మండలం కొత్తపేటకు గురుకుల కేంద్రీయ విద్యాలయం మంజూరు
•  కోడేరులో ప్రభుత్వ జూనియర్‌ కళాశాల ఏర్పాటు
• ప్రతి మండలంలో కేజీబీవీ ఏర్పాటు
• ప్రతి క్లస్టర్‌లో రూ.25లక్షల వ్యయంతో రైతువేదికల ఏర్పాటు
• సోమశిలలో రూ.23కోట్లతో కాటేజీలు, హరితహోటల్‌, నదిలో విహరించేందుకు లాంచీల ఏర్పాటు