Maganoor Sub Station: మాగనూరు విద్యుత్ శాఖలో ‘బినామీల’ వసూళ్ల కలకలం !

Maganoor Sub Station: మాగనూరు మండలంలోని విద్యుత్ శాఖ పనితీరుపై విమ‌ర్శ‌లు వ‌స్తున్నాయి. విద్యుత్ లైన్ ఇన్‌స్పెక్టర్లు విధులకు సక్రమంగా హాజరుకాకుండా చుట్టపు చూపులా వచ్చి వెళ్తున్నారు. జిల్లా విద్యుత్ శాఖ ఉన్నతాధికారులు పట్టించుకోవడం లేద‌ని ఆరోప‌ణ‌లున్నాయి.

మాగనూరు: నారాయణపేట జిల్లాలోని మాగనూరు మండల విద్యుత్ శాఖ పనితీరుపై పలు ఆరోపణలు వ్యక్తమవుతున్నాయి. మండలంలో విద్యుత్ లైన్ ఇన్‌స్పెక్టర్లు విధులకు సక్రమంగా హాజరుకాకుండా ఏడాదికి రెండుసార్లు చుట్టపు చూపులా వచ్చి వెళ్తున్నారనే విమర్శలు వినిపిస్తున్నాయి. గత రెండేళ్లుగా ఇదే తంతు కొనసాగుతున్నా.. జిల్లా విద్యుత్ శాఖ ఉన్నతాధికారులు పట్టించుకోవడం లేదనే ఆరోపణలు స్థానికంగా చర్చనీయాంశంగా మారాయి.

కిందిస్థాయి సిబ్బందితోనే విధుల నిర్వహణ?

విద్యుత్ శాఖలో కీలక బాధ్యతలు నిర్వహించాల్సిన లైన్ ఇన్‌స్పెక్టర్లు తమ విధులను సక్రమంగా నిర్వర్తించకుండా, కిందిస్థాయి సిబ్బందితోనే పనులు చేయిస్తున్నారనే ఆరోపణలున్నాయి. దీంతో విద్యుత్ సమస్యల పరిష్కారం, వినియోగదారులకు అందాల్సిన సేవల పర్యవేక్షణపై ప్రశ్నలు తలెత్తుతున్నాయి. విధుల నిర్వహణలో నిర్లక్ష్యం జరుగుతోందా? ఉన్నతాధికారుల పర్యవేక్షణ ఎందుకు కొరవడిందనే సందేహాలు ప్రజల్లో వ్యక్తమవుతున్నాయి.

మీటర్లు, ట్రాన్స్‌ఫార్మర్ల పేరుతో అధిక వసూళ్లు

మరోవైపు, ఇదే పరిస్థితిని ఆసరాగా చేసుకొని విద్యుత్ మీటర్లు, ట్రాన్స్‌ఫార్మర్లకు సంబంధించిన పనుల విషయంలో కొందరు అధిక మొత్తాలు వసూలు చేస్తున్నారనే ఆరోపణలు వినిపిస్తున్నాయి. విద్యుత్ కనెక్షన్లు, మీటర్ల ఏర్పాటు, ట్రాన్స్‌ఫార్మర్లకు సంబంధించిన పనుల కోసం వినియోగదారులు అదనపు డబ్బులు చెల్లించాల్సి వస్తోందని పలువురు వాపోతున్నట్లు సమాచారం. అయితే ఈ ఆరోపణలకు సంబంధించి అధికారిక నిర్ధారణ కావాల్సి ఉంది. వసూళ్లు నిజంగా జరుగుతున్నాయా? జరిగితే వాటి వెనుక ఎవరున్నారు? అనే అంశాలపై సమగ్ర విచారణ జరగాల్సిన అవసరం ఉంది.

వివరణ కోరితే ఏఈ సెలవులో ఉన్నారంటూ సమాధానం

మాగనూరు విద్యుత్ శాఖలో నెలకొన్న పరిస్థితులపై మండల విద్యుత్ శాఖ అధికారిని వివరణ కోరేందుకు ఫోన్ చేయగా, మక్తల్ విద్యుత్ శాఖలో పనిచేస్తున్న ఓ వ్యక్తి ఫోన్ లిఫ్ట్ చేసి ఏఈ గారు సెలవులో ఉన్నారని సమాధానమిచ్చారు. దీంతో మాగనూరు విద్యుత్ శాఖ వ్యవహారాలపై సంబంధిత అధికారి వివరణ అందుబాటులోకి రాలేదు. ఏఈ సెలవులో ఉన్న సమయంలో మాగనూరు మండల విద్యుత్ శాఖ వ్యవహారాలను ఎవరు పర్యవేక్షిస్తున్నారు? వినియోగదారుల సమస్యలను పరిష్కరించే బాధ్యత ఎవరిది? అనే ప్రశ్నలు తలెత్తుతున్నాయి.

జిల్లా అధికారులు స్పందించేది ఎప్పుడు?

మాగనూరు మండల విద్యుత్ శాఖలో విధుల నిర్వహణ, సిబ్బంది హాజరు, మీటర్లు, ట్రాన్స్‌ఫార్మర్లకు సంబంధించిన పనుల్లో జరుగుతున్నాయంటున్న వసూళ్లపై జిల్లా విద్యుత్ శాఖ ఉన్నతాధికారులు దృష్టి సారించాలని స్థానికులు కోరుతున్నారు. లైన్ ఇన్‌స్పెక్టర్ల విధుల నిర్వహణపై తనిఖీలు చేపట్టి, వినియోగదారుల నుంచి అధిక వసూళ్లు జరుగుతున్నాయనే ఆరోపణలపై నిష్పక్షపాతంగా విచారణ జరపాలని డిమాండ్ చేస్తున్నారు.

విద్యుత్ శాఖలో పారదర్శకతకు పెద్దపీట వేయాల్సిన అధికారులు ఈ ఆరోపణలపై ఎప్పుడు స్పందిస్తారు? రెండేళ్లుగా కొనసాగుతోందని చెబుతున్న ఈ వ్యవహారంపై విచారణ ఎప్పుడు చేపడతారు? వినియోగదారులకు న్యాయం జరిగేలా చర్యలు ఎప్పుడు తీసుకుంటారు? అనేది వేచి చూడాలి.