Canal Breach | సంగం బండ రైట్ లో లెవెల్ కాల్వకు గండి.. నీట మునిగిన పంట పొలాలు

Canal Breach | నారాయణపేట జిల్లా మాగనూరు మండలంలోని సంగం బండ బ్యాలెన్సింగ్ రిజర్వాయర్ రైట్ లో లెవెల్ కాల్వకు సోమవారం తెల్లవారుజామున గండి పడింది.

మాగనూరు : నారాయణపేట జిల్లా మాగనూరు మండలంలోని సంగం బండ ( Sangam Banda ) బ్యాలెన్సింగ్ రిజర్వాయర్ రైట్ లో లెవెల్ కాల్వకు సోమవారం తెల్లవారుజామున గండి (Canal Breach ) పడింది. పొలంలోకి నీరు ఎక్కువగా రావడంతో దాదాపు 30 ఎకరాల వరకు పంట నష్టం ( Crop Damage ) జరిగినట్లు వర్కూర్ రైతులు వివరించారు. లో లెవెల్ కెనాల్ కాల్వకు గత కొన్ని సంవత్సరాలుగా మరమ్మతులు చేయక నామమాత్రకంగా పెరిగిన తుంగను అక్కడక్కడ తీసి వదిలేస్తున్నారని ఆరోపించారు.

పూర్తిస్థాయిలో కాలువ పూడిక తీయకపోవడంతో కాల్వలలో చెత్త చెదారం అడ్డుపడడంతో కాల్వ కోతకు గురై గండ్లు పడుతున్నాయని రైతులు వాపోయారు. ఈ విషయాలపై పలుమార్లు సంబంధిత అధికారులకు దృష్టికి తీసుకెళ్లిన ఏ ఒక్కరు పట్టించుకోవడంలేదని, కాలువల వెంబడి బండి తోవలు కూడా చేసుకున్న సంఘటనలు ఉన్నాయని తెలిపారు. ఈ విషయాలపై ఏ ఒక్క అధికారి పట్టించుకోవడంలేదని రైతులు ఆవేదన వ్యక్తం చేస్తున్నారు. ఇప్పటికైనా గండీలను సరిచేసి సాగునీరు వృధాగా పారకుండా చర్యలు తీసుకోవాలని కోరారు.