ఔషధ వృక్షం

అతడు తన గాయాలకు ఆమెను ఔషధ వృక్షంగా హృదయంలో నాటుకున్నాడు

అతడు తన గాయాలకు
ఆమెను ఔషధ వృక్షంగా
హృదయంలో నాటుకున్నాడు

ఆమెకు మొలిచాక తెలిసింది
ఓ కథకి పునాదినని
ఓ కలకు తీపి నిద్రనని..

కానీ ఓ అబద్ధంలా ఈ నిజం
కాలంతో యుద్ధం చేస్తున్నా

ఆమే రాత్రి అతడికి
అతడే పగలు ఆమెకు

ఏ కలకు జత కూడని నిజంతో
క్షణమాగని వీరి ప్రయాణంలో

అతడు ఎంత నడిచినా
ఆమె దూరమే
ఆమె ఎంత దూరంగా ఉన్నా
అతడు దగ్గరే

ఇదే లోతుగా
జీవనదిలా ప్రవహించే
ఇష్టం ఒడ్డున

ఒంటరిగా
ఎవరికి వారే
ఇంకొకరి వైపు పొంగుతుంటారు!

– చందలూరి నారాయణరావు 97044 37247