నీరటిగాడు

కవంటే... ఎవడనుకున్నారు భావాల నీటి ధారలను

కవంటే… ఎవడనుకున్నారు
భావాల నీటి ధారలను
అక్షరాల మడులకు మర్లేసే
కవిత్వ పంటల నీరటిగాడు

అక్షరాలను నాటినప్పటి నుంచి
కవిత్వ పాదాల మడికట్ల మీదుగా
పరికించి పరికించి చూస్తూ నడుసుకుంటూ పోతాడు
ఏడన్న అక్షరాలకు భావాల తడి తాకక వల్లిపోతా ఉంటే
అక్షరాలకన్నా ముందుగాల కవి
జీవిడిశినంతగా విలవిలలాడుతాడు

ఒక్కొక్క పాదం నిండు జీవంతో ఎదుగుతా ఉంటే
కలల పంటను ఊహించుకుంటూ తానూ
మందిలోనే నిండు కళ్లమోలే ఎలుగుతాడు

ఏ కవి శేన్ల అక్షరాలకు భావపు జల తగ్గినా
వీడు కాసింత భావపు నీటిని మర్లేద్దామనుకుంటాడు
ఏ కవి అక్షరాల పంట ఎండిపోతున్నా
వాడు గిలగిలలాడుతాడు
ఏ కవి అక్షరాల పంట నిండుగా పండినా
నిండుమనసుతో వాని కళ్లల్లో ఎలుగులు నింపుకొంటడు

వాడు శుద్దాలంకారపు పురుగుమందులు సల్లి
కవిత్వ పంటల సాగు చెయ్యడు
నిజ జీవిత అనుభవాల సహజ ఎరువులనేసి
పచ్చని బతుకు కవిత్వపు పంటలు సాగుజేస్తాడు
నేలంతా పచ్చని కవిత్వమై కళ్లు దెరిస్తే
ఆ కళ్లల్లో వాడు రేపటి కొత్త కలలు కంటాడు!

దిలీప్‌.వి
84640 30808