స్టవ్‌.. వావ్‌ అనేలా!

రోజూ శుభ్రం చేసినా, సాయంత్రానికి మళ్లీ డర్టీగా తయారయ్యేది.. గ్యాస్‌ స్టవ్‌ మాత్రమే. ఇది ఎంత శుభ్రంగా ఉంటే.. వంటపై అంతగా ఆసక్తి పెరుగుతుంది. అయితే, స్టవ్‌ క్లీన్‌గా ఉంచడం కాస్త కష్టమైన పనే! ఎందుకంటే, నిత్యం వంట చేసే సమయంలో నూనెలు, ఉప్పులు-పప్పులూ అన్నీ దానిపైనే పడుతుంటాయి.

రోజూ శుభ్రం చేసినా, సాయంత్రానికి మళ్లీ డర్టీగా తయారయ్యేది.. గ్యాస్‌ స్టవ్‌ మాత్రమే. ఇది ఎంత శుభ్రంగా ఉంటే.. వంటపై అంతగా ఆసక్తి పెరుగుతుంది. అయితే, స్టవ్‌ క్లీన్‌గా ఉంచడం కాస్త కష్టమైన పనే! ఎందుకంటే, నిత్యం వంట చేసే సమయంలో నూనెలు, ఉప్పులు-పప్పులూ అన్నీ దానిపైనే పడుతుంటాయి. ఇక ఏదైనా పులుసో-కూరనో పొంగిపోతే.. అంతే సంగతులు! కానీ, కొన్ని సింపుల్‌ టిప్స్‌ పాటిస్తే గ్యాస్‌ స్టవ్‌పై ఉండే మొండి మరకలను ఇట్టే తొలగించొచ్చు.

• ఒక స్ప్రే బాటిల్‌లో రెండు గ్లాసుల నీళ్లు, ఒక గ్లాస్‌ వెనిగర్‌ కలపాలి. ఆ నీటిని స్టవ్‌పై స్ప్రే చేసి.. మెత్తటి వస్త్రంతో తుడిస్తే సరిపోతుంది. ఈ పద్ధతిలో గ్యాస్‌ స్టవ్‌ను రోజూ శుభ్రం చేసుకోవచ్చు.
• జిడ్డు మరకలను తొలగించడంలో బేకింగ్‌ సోడా సూపర్‌గా పనిచేస్తుంది. బేకింగ్‌ సోడాలో కొద్దిగా నీరు పోసి.. పేస్టులా తయారు చేసుకోవాలి. ఈ పేస్ట్‌ను స్టవ్‌పై ఉండే మరకలపై రుద్ది.. 20 నిమిషాలపాటు అలాగే వదిలేయాలి. ఆ తర్వాత ఓ తడివస్త్రంతో తుడిచేస్తే.. మరకలు మాయమవుతాయి. బేకింగ్‌ సోడాలో వెనిగర్‌ కలిపినా మంచి ఫలితం కనిపిస్తుంది.
• కొత్తలో బంగారంలా మెరిసే బర్నర్స్‌.. రానూరానూ నల్లగా మారిపోతాయి. కళావిహీనంగా కనిపిస్తాయి. వీటిని శుభ్రం చేయడానికీ ఓ పద్ధతి ఉంది. ముందుగా స్టవ్‌ ఆన్‌చేసి.. బర్నర్స్‌ను కాస్త వేడి చేయాలి. స్టవ్‌ ఆఫ్‌చేసి, బర్నర్స్‌పై కొద్దిగా నిమ్మరసం పిండాలి. ఓ 20 నిమిషాలు అలాగే వదిలేసి.. ఆ తర్వాత డిష్‌వాష్‌ లిక్విడ్‌తో శుభ్రం చేస్తే, కొత్తవాటిలా కనిపిస్తాయి.
• ఒక గిన్నెలో నీళ్లు తీసుకొని, అందులో ఒక టేబుల్‌ స్పూన్‌ ఉప్పువేయాలి. ఉప్పు నీటిలో బర్నర్స్‌ వేసి, ఓ 20 నిమిషాల పాటు బాగా మరిగించాలి. ఆ తర్వాత డిష్‌వాష్‌ లిక్విడ్‌తో
  కడిగేస్తే.. మరకలు తొలగిపోతాయి.
• ఒక గిన్నెలో టేబుల్‌ స్పూన్‌ చొప్పున ఉప్పు, బేకింగ్‌ సోడా తీసుకొని.. కొద్దిగా నీళ్లు కలిపి పేస్ట్‌లా తయారు చేయాలి. దీనిని స్టవ్‌మీది మరకలపై రాసి.. ఓ 20 నిమిషాలు అలాగే వదిలేయాలి. ఆ తర్వాత మంచి నీటితో శుభ్రం చేస్తే.. స్టవ్‌ మీది జిడ్డు, మురికి వదిలిపోతుంది.