అందానికి తేనె అద్దుదాం

అమోఘమైన రుచి, అరుదైన లక్షణాలు గల దివ్యౌషధం తేనె. సౌందర్యానికీ, ఆరోగ్యానికీ దోహదపడే సుగుణాల గని. అందుకే ఆహారంలోనూ, ఔషధాల్లోనూ తేనె వాడకం ఎక్కువ. ముఖ్యంగా వేసవిలో తలెత్తే సమస్యలకు చక్కని పరిష్కారం ఇది.

అమోఘమైన రుచి, అరుదైన లక్షణాలు గల దివ్యౌషధం తేనె. సౌందర్యానికీ, ఆరోగ్యానికీ దోహదపడే సుగుణాల గని. అందుకే ఆహారంలోనూ, ఔషధాల్లోనూ తేనె వాడకం ఎక్కువ. ముఖ్యంగా వేసవిలో తలెత్తే సమస్యలకు చక్కని పరిష్కారం ఇది. చర్మం జిడ్డుగా మారడం, జుట్టు జీవం కోల్పోవడం వంటి వేసవికాల సమస్యలకు తేనె మంచి ఉపశమనం.

• ఒక టేబుల్‌ స్పూన్‌ తేనెకు కొద్దిగా పాలు కలిపి ముఖానికి పట్టించి పదిహేను నిమిషాలపాటు ఆరనివ్వాలి. బాగా ఆరిన తర్వాత గోరువెచ్చని నీటితో కడగాలి. వారానికి రెండు మూడుసార్లు ఇలా చేయడం వల్ల నల్లని మచ్చలు, మొటిమలు తగ్గుతాయి.
• తేనెలో కొంచెం నిమ్మరసం కలిపి బ్లాక్‌హెడ్స్‌పై రాసి పదినిమిషాల తర్వాత కడిగేయాలి. తరచూ ఇలా చేస్తే బ్లాక్‌హెడ్స్‌ క్రమంగా తగ్గిపోతాయి.
• కాలిన గాయాలపైన తేనెను పూయడం వల్ల మచ్చలు పడవు. పెదాలను తేనెతో మర్దనా చేస్తే పొడిబారకుండా ఉంటాయి. తేనె మంచి మాయిశ్చరైజర్‌గా పనిచేసి చర్మకాంతిని పెంచడమే కాకుండా, మృదువుగా మారుస్తుంది.
• వెంట్రుకలు నిర్జీవంగా మారితే ఆలివ్‌నూనెలో తేనె కలిపి రాత్రి పడుకునేముందు వెంట్రుకలకు బాగా పట్టించాలి. మర్నాడు తలస్నానం చేయాలి. వారానికోసారి ఇలా చేస్తే వెంట్రుకలు చిట్లకుండా ఉంటాయి.