Holi Celebrations |  హోలీ ఆడేందుకు రెడీ అవుతున్నారా? ముందు ఈ జాగ్రత్తలు తీసుకోండి

Holi Celebrations | చిన్న, పెద్ద తేడా లేకుండా అందరూ ఆనందోత్సాహంగా జరుపుకొంటారు. హోలీని రంగుల పండుగ లేదా కాముని పండుగగా పిలుస్తారు. హోలీ రోజున నీటిలో రంగులు కలిపి ఒకరిపై ఒకరు చల్లుకుంటూ సరదాగా గడుపుతారు.

Holi Celebrations | చిన్న, పెద్ద తేడా లేకుండా అందరూ ఆనందోత్సాహంగా జరుపుకొంటారు. హోలీని రంగుల పండుగ లేదా కాముని పండుగగా పిలుస్తారు. కొంత మంది గిరిజనులు ఈ పండుగ సందర్భంగా వారం రోజుల ముందు నుంచే దుకాణాలు, తెలిసిన వారిని డబ్బులు అడుగుతుంటారు. హోలీ రోజున నీటిలో రంగులు కలిపి ఒకరిపై ఒకరు చల్లుకుంటూ సరదాగా గడుపుతారు.

తండాల్లో ముందస్తు సంబురాలు..

త్రిపురారం : సాధారణంగా హోలీ ఒక్కరోజు మాత్రమే జరుపుకునే పండుగ. కానీ, పలు తండాల్లో గిరిజనులు సంప్రదాయ దుస్తులు ధరించి నృత్యాలు చేస్తూ వారం రోజులపాటు సంబురాలు జరుపుతారు. తమ జాతి నాయకులు, అధికారుల ఇండ్లకు వెళ్లి కానుకలు సేకరిస్తారు. వాటితో మూడు, నాలుగు తండాలకు ఒక కుల పెద్ద కుటుంబం వద్ద హోలీ సంబురాలను ఘనంగా నిర్వహిస్తారు. స్వతహాగా అడవి నుంచి తీసుకొచ్చిన కట్టెలతో మంట ఏర్పాటు చేసి రాత్రంతా ఆడిపాడుతారు. ఈ వేడుకలకు తండాల్లో నివసించే వారే కాకుండా పట్టణాల్లో నివసించే వారు కూడా వస్తారు.

రసాయన రంగులతో చర్మవ్యాధులు..

వసంతకాలం వాతావరణంలో చోటుచేసుకునే మార్పులతో వ్యాధులు ప్రభలుతాయి. ఆ సమయంలో సహజ సిద్ధమైన రంగులు శరీరానికి ఔషధంలా పనిచేస్తాయి. పూర్వం నిమ్మ, కుంకుమ పువ్వు, పసుపు, బల్వాలతో సహజ రంగులను తయారు చేసి హోలీ ఆడేవారు. కాలక్రమేణా రసాయనాలతో తయారు చేసిన రంగుల వాడకం పెరిగి సహజ రంగుల వాడకం తగ్గింది. రసాయన రంగులతో ఈ పండుగ ఎంత ఉల్లాసాన్ని నింపుతుందో.. అంతే విషాదాన్ని మిగుల్చుతుంది. రంగుల్లో వాడే రసాయన పదార్థాలతో శరీరానికి హాని కలిగే అవకాశాలు ఎక్కువగా ఉన్నాయి. కళ్లమంటలు, ఆస్తమా, చర్మవ్యాధులు సంభవిస్తాయని వైద్యనిపుణులు చెబుతున్నారు. నలుపు రంగుల్లో లెడ్‌ ఆక్సైడ్‌ ఉంటుందని, ఇది మూత్రపిండాలను పాడు చేస్తుందని, వెండి రంగులో ఉండే మెర్క్యురీ సల్ఫేట్‌తో క్యాన్సర్‌ సోకే అవకాశముందని హెచ్చరిస్తున్నారు. ఆకుపచ్చ రంగుల్లో ఉండే కాఫర్‌ సల్ఫేట్‌ ద్వారా ఎలర్జీతోపాటు శాశ్వత అంధత్వం వచ్చే అవకాశం ఉంది. పొడిగా ఉండే రంగుల్లో జిలెటిన్‌ పైలట్‌ కలవడం వల్ల మైకంతోపాటు ఆస్తమా, అంధత్వం వచ్చే అవకాశం ఉందని శాస్త్రవేత్తల పరిశోధనలో తేలింది. అందువల్ల హోలీ పండుగలో రసాయన రంగులకు బదులు సహజ రంగులు వాడడం ఎంతో శ్రేయస్కరం.

హోలీలో తీసుకోవాల్సిన జాగ్రత్తలు

• రసాయన మందులతో కళ్లకు హాని కలుగకుండా సన్‌గ్లాసెస్‌ వాడాలి. దంతాలపై రంగులు పడకుండా డెంటల్‌ క్యాప్స్‌ వేసుకోవాలి.
• హోలీ వేడుకల్లో మందంపాటి పాత దుస్తులను ధరించాలి.
• ముదురు రంగు దుస్తులు మంచిది. ఫుల్‌హ్యాండ్స్‌ షర్ట్‌, చేతులకు గ్లౌజులు, కాళ్లకు సాక్స్‌ వేసుకోవాలి.
• కళ్లల్లో రంగు పడితే వెంటనే చల్లని నీటితో శుభ్రం చేసుకోవాలి. మంట అనిపిస్తే వైద్యుడిని సంప్రదించాలి.
• తలపై రంగులు పడకుండా క్యాప్‌ పెట్టుకోవాలి. రంగులు చల్లుకోవడం పూర్తయ్యాక గోరువెచ్చని నీటితో స్నానం చేయాలి.

సహజ రంగుల తయారీ ఇలా..

• పసుపు, కుంకుమ, పూలు, పండ్లు వివిధ రకాల పిండిని నీటిలో కలిపి ఉపయోగించుకోవచ్చు.
• మోదుగు పూలను ఉడక బెట్టి సహజ సిద్ధమైన రంగు తయారు చేసుకొని వాడవచ్చు.
• గంధం, ఎర్రమందార, గోగుపూలు, దానిమ్మ తొక్క, టమాట, క్యారెట్‌, పసుపు, సున్నం మిశ్రమం కలిస్తే ఎరుపు రంగు వస్తుంది.
• శనగపిండి, పసుపు మిశ్రమం, బంతి, చామంతి పూల మిశ్రమంతో పసుపురంగు వస్తుంది.
• గోరింటాకు, గుల్‌మొహర్‌ ఆకులు, గోధుమ మొలకలు, పాలకూర, కొత్తిమీర, పుదీనాతో ఆకుపచ్చ రంగు తయారు చేసుకోవచ్చు.
  ఇండిగో ప్లాంట్‌(సిరాచెట్టు)కాయలతో నీలిరంగు తయారు చేసుకోవచ్చు.
• బీట్‌రూట్‌, ఉల్లిపాయ తొక్కల మిశ్రమంతో ముదురు కెంపు రంగు వస్తుంది. పారిజాత పూల కాండాలను ఎండబెట్టి నానబెడితే సింధూరం రంగు వస్తుంది.
• బ్రౌన్‌ కలర్‌ కోసం కాఫీ లేదా టీ పొడి కలిపి వడపోసిన నీళ్లు లేదా మరగపెట్టిన నీళ్లు ఉపయోగించుకోవచ్చు.
• నల్లద్రాక్ష రసం లేదా ఎండబెట్టిన పెద్ద ఉసిరికాయల్ని ఉడికించి రాత్రంతా అలా వదిలేసి మరునాడు నీటిలో కలిపితే నలుపు రంగు తయారవుతుంది.
• ఎర్రచందనాన్ని నీటిలో కలిపి ఎరుపు రంగును పొందవచ్చు.
• గోరింటాకును రుబ్బి పిండిలో కలిపితే ఆకుపచ్చ రంగును తయారు చేసుకోవచ్చు.
• రెండు చెంచాల గంధపు పొడిని లీటర్‌ నీటిలో కలిపి మరగబెడితే ఎరుపు రంగు ద్రావణం తయారు చేసుకోవచ్చు.
• నీలి మందును నీటిలో కలిపితే నీలి రంగు వస్తుంది.
• తులసి, వేప, కలబంద కలిపి నూరి నీటిలో కలిపితే ముదురు ఆకుపచ్చ వర్ణం వస్తుంది.

సహజ రంగులతో ఉపయోగాలు

పసుపుతో చేసిన రంగులు వ్యాధి నిరోధక శక్తిని పెంపొదిస్తాయి. తులసి ఆకులతో చేసిన రంగులు మానసికోల్లాసానికి తోడ్పడుతాయి. శ్వాసక్రియ శక్తిని పెంచుతాయి. కలబంద, వేపాకులు చర్మ వ్యాధులను తగ్గిస్తాయి. దురదల నివారణకు ఉపయోగపడుతాయి. గోరింటాకు శరీర పగుళ్లను నివారిస్తుంది. గంధం పొడి మనసుకు ప్రశాంతత కలిగించడంతోపాటు సువాసన వెదజల్లుతుంది.