పిరమైనా.. ప్రియమైనవే!

వేసవి ముదిరేకొద్దీ హిమక్రీముల మహిమ రెట్టింపు అవుతుంది. ఐస్‌క్రీమ్‌లకు ప్రత్యేకమైన సీజన్‌ లేకపోయినా.. ఎండలు మండేకాలం వీటికి ఆదరణ విపరీతంగా పెరుగుతుంది. ఏడాది పొడవునా సాగే ఐస్‌క్రీమ్‌ విక్రయాలతో పోలిస్తే వేసవిలోనే 60 శాతం అమ్మకాలు సాగుతాయని గణాంకాలు తెలియజేస్తున్నాయి.

వేసవి ముదిరేకొద్దీ హిమక్రీముల మహిమ రెట్టింపు అవుతుంది. ఐస్‌క్రీమ్‌లకు ప్రత్యేకమైన సీజన్‌ లేకపోయినా.. ఎండలు మండేకాలం వీటికి ఆదరణ విపరీతంగా పెరుగుతుంది. ఏడాది పొడవునా సాగే ఐస్‌క్రీమ్‌ విక్రయాలతో పోలిస్తే వేసవిలోనే 60 శాతం అమ్మకాలు సాగుతాయని గణాంకాలు తెలియజేస్తున్నాయి. దీంతో ఎండలు మండే కాలాన్ని తమకు అనుకూలంగా మలచుకోవడానికి ఐస్‌క్రీమ్‌ ఉత్పత్తి సంస్థలు రకరకాల ఫ్లేవర్లు మార్కెట్‌లోకి విడుదల చేస్తుంటాయి. అంతేకాదు ఐస్‌క్రీమ్‌ ప్రియులను ఆకట్టుకోవడానికి భారీస్థాయిలో ప్రచారమూ నిర్వహిస్తుంటాయి.

మదర్‌ డెయిరీ పదిహేను రకాల కొత్త ఫ్లేవర్‌ ఐస్‌క్రీమ్‌లను ఇటీవల లాంచ్‌ చేసింది. హావ్‌మోర్‌ ఐస్‌క్రీమ్‌ సంస్థ గతేడాది ఐపీఎల్‌ విజేత గుజరాత్‌ టైటన్స్‌ జట్టుకు పార్ట్‌నర్‌గా వ్యవహరిస్తున్నది. ఇంతవరకూ బాగానే ఉన్నా.. గతేడాదితో పోలిస్తే హిమక్రీముల ధర భారీగా పెరగడం ఐస్‌క్రీమ్‌ ఆరాధకులకు మింగుడుపడటం లేదు. వీటి ధరలు 15 నుంచి 20 శాతం వరకు పెరిగాయని వాళ్లు పెదవి విరుస్తున్నారు. పాలతోపాటు ఐస్‌క్రీమ్‌ ఉత్పత్తిలో వాడే ముడిసరుకుల ధరలు గణనీయంగా పెరగడంతో రేటు పెంచక తప్పలేదని వ్యాపార సంస్థలు చెబుతున్నాయి! ఈ ముచ్చట ఎలా ఉన్నా.. వేసవి సాయంత్రం ఐస్‌క్రీమ్‌ను ఆస్వాదించడాన్ని విధిగా భావించే వాళ్లు మాత్రం ‘పిరమైనా.. హిమక్రీములు మాకు ప్రియమైనవే!’ అని ముక్తాయింపు ఇస్తున్నారు.