IL-76 Aircraft: చ‌రిత్ర సృష్టించిన ఐఎల్‌-76 విమానం.. న్యోమా ఎయిర్‌ఫీల్డ్‌లో ల్యాండింగ్‌

IL-76 Aircraft: ఐఎల్‌-76ఎండీ వ్యూహాత్మ‌క ర‌వాణా విమానం చ‌రిత్ర సృష్టించింది. అత్యంత విజ‌య‌వంతంగా న్యోమా ఎయిర్‌ఫీల్డ్‌లో ల్యాండ్ అయ్యింది. ప్ర‌పంచంలోనే అత్యంత ఎత్తైన ఆల్టిట్యూడ్‌లో న్యోమా ర‌న్‌వే ఉన్న‌ది.

న్యూఢిల్లీ: భార‌తీయ వైమానిక ద‌ళానికి చెందిన ఐఎల్‌-76ఎండీ వ్యూహాత్మ‌క ర‌వాణా విమానం(IL-76 Aircraft) చ‌రిత్ర సృష్టించింది. అత్యంత విజ‌య‌వంతంగా న్యోమా ఎయిర్‌ఫీల్డ్‌లో ల్యాండ్ అయ్యింది. ప్ర‌పంచంలోనే అత్యంత ఎత్తైన ఆల్టిట్యూడ్‌లో ఈ విమానం ల్యాండ్ కావ‌డం కొత్త మొలురాయిగా నిలిచింది. ఐఎల్-76 విమానానికి చెందిన నైపుణ్యం, ప్రిసిష‌న్‌, సిబ్బంది ప్ర‌ద‌ర్శించిన ప్రొఫెష‌న‌లిజం అమోఘ‌మ‌ని ఐఏఎఫ్ త‌న స్టేట్మెంట్‌లో తెలిపింది. ద‌క్షిణ లాడాఖ్‌లో.. వాస్త‌వాదీన రేఖ‌కు 40 కిలోమీట‌ర్ల దూరంలో న్యోమా ఎయిర్‌ఫీల్డ్‌ను కొత్త‌గా నిర్మించారు. గ‌త ఏడాదే దీని నిర్మాణం పూర్తి అయ్యింది. గ‌తంలో ఈ ప్రాంతానికి ఏఎన్-32, హెలికాప్ట‌ర్ల ద్వారా ర‌వాణా సాగించేవారు. ఇప్పుడు ఫైట‌ర్ విమానాల‌ను కూడా ఆప‌రేట్ చేసే స్థాయిలో న్యోమా ఎయిర్‌ఫీల్డ్ త‌యారైన‌ట్లు ఐఏఎఫ్ త‌న ప్ర‌క‌ట‌న‌లో తెలిపింది.

భార‌తీయ వ్యూహాత్మ‌క వైమానిక సామ‌ర్థ్యంలో కొత్త మైలురాయి లిఖించిన‌ట్లు అవుతుంద‌ని ఐఏఎఫ్ చెప్పింది. 1980 మ‌ధ్య ద‌శ‌కంలో ఐఎల్‌-76 ర‌వాణా విమానాలు భార‌తీయ వైమానిక ద‌ళంలో చేరాయి. హెవీ లిఫ్టింగ్‌లో కొత్త చ‌రిత్ర సృష్టించాయి. ఈ విమానాలు 45 ట‌న్నుల బ‌రువును మోయ‌గ‌ల‌వు. ల‌డాఖ్‌తో పాటు ఈశాన్య రాష్ట్రాల‌కు యుద్ధ ట్యాంకులు, యుద్ద వాహ‌నాలు, అతిభారీ ఎక్విప్మెంట్‌ను ఈ విమానం త‌ర‌లించ‌గ‌ల‌దు. లేహ్‌తో పాటు తోసి ప్రాంతాల‌కు లాజిస్టిక్ మిష‌న్‌లో భాగంగా ఐఎల్-76 విమానాలు వెళ్తుంటాయి.

న్యోమా ఎయిర్‌ఫీల్డ్ స‌ముద్ర మ‌ట్టానికి సుమారు 10 వేల ఫీట్ల ఎత్తులో ఉన్న‌ది. సియాచిన్‌లో ఆప‌రేష‌న్స్ చేప‌ట్టేందుకు ఈ ఎయిర్‌ఫీల్డ్ కీల‌కంకానున్న‌ది. బోర్డ‌ర్ రోడ్స్ ఆర్గ‌నైజేష‌న్ కు చెందిన ప్రాజెక్టు హిమాంక్‌లో భాగంగా 3 కిలోమీట‌ర్ల పొడువైన కాంక్రీట్ ర‌న్‌వేను న్యోమాలో నిర్మించారు.అయితే ఇక్క‌డ ఉన్న అతిశీత‌ల వాతావ‌ర‌ణాన్ని త‌ట్టుకునే రీతిలో దీన్ని నిర్మించారు.