వృథాగా పోతున్న రాంపురం పెద్ద చెరువు నీరు

ఇటీవల కురుస్తున్న వర్షాలతో రాంపురం పెద్ద చెరువు నిండింది. అయితే చెరువు తూముకు సంబంధించిన షట్టర్లు మరమ్మతులు చేయకపోవడంతో విలువైన నీరు వృథాగా బయటకు పోతోంది. రానున్న రోజుల్లో ఎల్‌నినో ప్రభావంతో వర్షాభావ పరిస్థితులు...

– షట్టర్ల మరమ్మతులు చేయించడంలో అధికారుల నిర్లక్ష్యం
– నీటి వృథాపై రైతుల ఆవేద‌న

చుంచుపల్లి, నవంబర్ 04 : ఇటీవల కురుస్తున్న వర్షాలతో రాంపురం పెద్ద చెరువు నిండింది. అయితే చెరువు తూముకు సంబంధించిన షట్టర్లు మరమ్మతులు చేయకపోవడంతో విలువైన నీరు వృథాగా బయటకు పోతోంది. రానున్న రోజుల్లో ఎల్‌నినో ప్రభావంతో వర్షాభావ పరిస్థితులు ఏర్పడే అవకాశం ఉందన్న ఆందోళనల నేపథ్యంలో చెరువులో చేరిన నీటిని జాగ్రత్తగా నిల్వ చేసుకోవాల్సిన సమయంలో ఇలా వృథాగా పోతుండడంపై రైతులు తీవ్ర ఆవేదన వ్యక్తం చేస్తున్నారు.

పట్టించుకోని అధికారులు

రాంపురం పెద్ద చెరువు నీరు వృథాగా పోతుంది, తూము షట్టర్లు మరమ్మతులు చేయించాలని ఇరిగేషన్ శాఖ అధికారులతో పాటు సింగరేణి అధికారులకు పలుమార్లు విన్నవించినప్పటికీ ఇప్పటివరకు ఎలాంటి చర్యలు తీసుకోలేదని రైతులు ఆవేదన వ్యక్తం చేస్తున్నారు. ముందుగానే షట్టర్ల మరమ్మతులు చేపట్టి ఉంటే ప్రస్తుతం చెరువులో చేరిన నీటిని పూర్తిస్థాయిలో నిల్వ చేసుకునే అవకాశం ఉండేదని పేర్కొంటున్నారు.

యాసంగిసాగుకు నీటి కొరత తప్పదా?

ఈ చెరువు ఆయకట్టు కింద సుమారు 200 ఎకరాల వ్యవసాయ భూమి ఉంది. ప్రస్తుతం వృథాగా పోతున్న నీటిని నిల్వ చేసుకోగలిగితే రానున్న రబీ సీజన్‌లో ఆయకట్టు రైతులకు సాగునీటి అవసరాలు తీర్చే అవకాశం ఉండేదని రైతులు చెబుతున్నారు. కానీ అధికారుల నిర్లక్ష్యం కారణంగా విలువైన నీరు వృథాగా పోతుండడంతో ఏం చేయాలో పాలుపోక తలలు పట్టుకుంటున్నారు. ఇప్పటికైనా సంబంధిత ఇరిగేషన్ శాఖ అధికారులు, సింగరేణి యాజమాన్యం స్పందించి పెద్ద చెరువు తూము షట్టర్లకు తక్షణమే మరమ్మతులు చేయించి నీరు వృథాగా పోకుండా చర్యలు తీసుకోవాలని రైతులు కోరుతున్నారు.