Visit:
Arkandla | శంకరపట్నం, సెప్టెంబర్ 24 : వర్షం కురిసిందంటే చాలు. శంకరపట్నం మానకొండూరు, మండలాల గ్రామస్తుల్లో ఆందోళన మొదలవుతుంది. భారీ వర్షాలకు ఆర్కండ్ల వాగు పొంగిపొర్లడంతో లోలెవల్ వంతెనపై నుంచి వరద నీరు ప్రవహించి రాకపోకలు నిలిచిపోతున్నాయి. దీంతో గ్రామస్తులు అత్యవసర పనుల కోసం బయటకు వెళ్లాలన్నా.. ఇతర ప్రాంతాల నుంచి గ్రామానికి రావాలన్నా.. తీవ్ర ఇబ్బందులు ఎదుర్కోవాల్సిన పరిస్థితి.
వర్షాకాలంలో తరచూ ఇదే పరిస్థితి ఎదురవుతున్నా సమస్యకు శాశ్వత పరిష్కారం లభించలేదని స్థానికులు ఆవేదన వ్యక్తం చేస్తున్నారు. ముఖ్యంగా అనారోగ్యంతో ఉన్నవారిని ఆస్పత్రికి తరలించే సమయంలో ఇబ్బందులు తీవ్రంగా ఉంటున్నాయని వాపోతున్నారు. అర్కండ్ల వాగుపై హైలెవల్ వంతెన నిర్మిస్తేనే సమస్యకు శాశ్వత పరిష్కారం లభిస్తుందని అర్కండ్ల సర్పంచ్ నేదురు పవన్ పేర్కొన్నారు. ప్రజల ఇబ్బందులను దృష్టిలో ఉంచుకుని ప్రభుత్వం వెంటనే స్పందించి వంతెన నిర్మాణానికి చర్యలు తీసుకోవాలని కోరారు.
