Rasamayi Balakishan | కమీషన్లపై ఉన్న సోయి కరువుపై లేదు.. మానకొండూరు మాజీ ఎమ్మెల్యే రసమయి బాలకిషన్‌

రాష్ట్రమంతా కరువు కాటకాలతో అల్లాడుతుంటే ప్రభుత్వం పంటలు వేయొద్దని డిక్లరేషన్లు కోరుతూ కరువు జాబితాలో కొన్ని మండలాలనే చేర్చడం ఏంటని, పాలకులకు కమీషన్లపై ఉన్న సోయి కరువుపై లేదని మానకొండూరు మాజీ ఎమ్మెల్యే రసమయి బాలకిషన్ ప్రభుత్వంపై ధ్వజమెత్తారు.

• నియోజకవర్గంలోని అన్ని మండలాలను కరువు జాబితాలో చేర్చాలని డిమాండ్‌

Rasamayi Balakishan | తిమ్మాపూర్, అక్టోబర్ 31 : రాష్ట్రమంతా కరువు కాటకాలతో అల్లాడుతుంటే ప్రభుత్వం పంటలు వేయొద్దని డిక్లరేషన్లు కోరుతూ కరువు జాబితాలో కొన్ని మండలాలనే చేర్చడం ఏంటని, పాలకులకు కమీషన్లపై ఉన్న సోయి కరువుపై లేదని మానకొండూరు మాజీ ఎమ్మెల్యే రసమయి బాలకిషన్ ప్రభుత్వంపై ధ్వజమెత్తారు. కరువుతో పంటలు వేయద్దు అన్నప్పుడు అన్ని మండలాలు కరువు జాబితాలో చేర్చాలి అని డిమాండ్ చేశారు. తిమ్మాపూర్ మండల కేంద్రంలో ఆయన శనివారం విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ ఎల్నినో ప్రభావం ఉంటుందని తెలిసి కూడా పైనుండి వస్తున్న నీళ్లను ఎత్తిపోయకుండా జాప్యం చేసి ఇప్పుడు పంటలు వేయద్దని కోరుతున్నారని ఆగ్రహం వ్యక్తం చేశారు.

గత 10 ఏళ్ల కాలంలో కాలమైనా కాకపోయినా ఎండల్లో సైతం కాలువల్లో నీళ్లు పరుగులు పెట్టాయని గుర్తు చేశారు. ఎలాంటి ముందస్తు ఆలోచన లేని మానకొండూరు ఎమ్మెల్యే కవ్వపంల్లి సత్యనారాయణ కనీసం నియోజకవర్గంలోని మండలాలను కరువు జాబితాలో చేర్చుకోలేని దుర్భరమైన పరిస్థితుల్లో ఉన్నారని మండిపడ్డారు. నియోజకవర్గంలో రాష్ట్రానికి నీళ్లు అందించే ప్రముఖ ప్రాజెక్టులు ఉన్నా కూడా కరువు లేకుండా చేయలేకపోతున్నారని ధ్వజమెత్తారు. నియోజకవర్గంలోని కరువును ప్రభుత్వం దృష్టికి తీసుకెళ్లలేని దౌర్భాగ్యంలో ఆయన ఉన్నారని ఎద్దేవా చేశారు. నియోజకవర్గాన్ని గాలికి వదిలేసి కమీషన్ల కక్కుర్తిలో గాలికి వదిలేసారని ఆగ్రహం వ్యక్తం చేశారు. కరువు మండలాల్లో చేర్చకపోతే ఎమ్మెల్యేని బాధ్యత వహించాలని, వారం రోజుల్లో జాబితాలో చేర్చకపోతే ఎమ్మెల్యే క్యాంప్ ఆఫీస్ ను ముట్టడిస్తామని హెచ్చరించారు.