సర్వర్‌ డౌన్‌

ఉమ్మడి కరీంనగర్‌ జిల్లా పరిధిలోని రిజిస్ట్రేషన్ల కార్యాలయాల్లో మరోసారి సర్వర్‌డౌన్‌ అయింది.

• మూడు గంటలకే ఆఫీసులు క్లోజ్‌
• అంతటా నిలిచిపోయిన రిజిస్ట్రేషన్‌ సేవలు
• ఉదయం 11 నుంచి 3 గంటల దాకా ఎదురుచూపులు
• కార్యాలయాల వద్ద పడిగాపులు
• చేసేదేమీ లేక వెనుదిరిగిన క్రయ, విక్రయదారులు

కరీంనగర్‌ కలెక్టరేట్‌/ తిమ్మాపూర్‌/ గంగాధర, జూలై 11 : ఉమ్మడి కరీంనగర్‌ జిల్లా పరిధిలోని రిజిస్ట్రేషన్ల కార్యాలయాల్లో మరోసారి సర్వర్‌డౌన్‌ అయింది. దీంతో రిజిస్ట్రేషన్ల ప్రక్రియ నిలిచిపోయింది. స్లాట్‌ బుక్‌ చేసుకున్న కొనుగోలుదారులు తమపేర పట్టా చేసుకునేందుకు విక్రయదారులతో కలిసి రాగా, సర్వర్‌ సమస్య తలెత్తింది. దీంతో క్రయ, విక్రయదారులు ఉదయం 11 నుంచి మధ్యాహ్నం 3 గంటల దాకా వేచి చూడాల్సి వచ్చింది.

సమస్య ఎప్పుడు పరిష్కారమవుతుందా..? అధికారులు ఎప్పుడు తమ పేర్లు పిలుస్తారా..? అని స్లాట్‌ బుక్‌ చేసుకున్న వారంతా కార్యాలయాల నుంచి కదలకుండా ఉండిపోయారు. మధ్యాహ్న భోజనం సైతం చేయకుండా వేచి చూశారు. కార్యాలయ పనివేళలు ఇంకా కొద్దిసేపే ఉండగా, ఇక సర్వర్‌ సమస్య పరిష్కారమయ్యే పరిస్థితి లేక నిరాశతో వెనుదిరిగారు. రాష్ట్రవ్యాప్తంగా ఈ సమస్య తలెత్తగా, దీనిని పరిష్కరించడంలో హైదరాబాద్‌ స్థాయిలో ఇబ్బందులు ఎదురైనట్టు జిల్లా అధికారులు పేర్కొన్నారు.

సర్వర్‌లో నెలకొన్న సాంకేతిక ఇబ్బందులతో ఈకేవైసీ ఆధార్‌ లింకప్‌ కాకపోవడం, క్రయ, విక్రయదారులు, సాక్షుల ఫొటోలు కంప్యూటర్‌లో నిక్షిప్తమయ్యే అవకాశాలు లేక రిజిస్ట్రేషన్లు నిలిచిపోయినట్టు తెలిపారు. కాగా, తరచుగా జరుగుతున్న అంతరాయంతో రిజిస్ట్రేషన్‌దారులు అనేక ఇబ్బందులు పడుతున్నారని క్రయ, విక్రయదారులు ఆవేదన చెందారు. గత ప్రభుత్వ హయాంలో ఇలాంటి సమస్య ఎదురైతే, గంటల వ్యవధిలోనే సరిచేసి రిజిస్ట్రేషన్లు పునరుద్ధరించేవారని గుర్తు చేశారు. ప్రస్తుత ప్రభుత్వం పట్టించుకోకుండా నిర్లక్ష్యం చేస్తున్నదని మండిపడ్డారు.

• కరీంనగర్‌ జిల్లా కేంద్రంలో నిత్యం 50కి పైగానే రిజిస్ట్రేషన్లు జరుగుతుంటాయి. నగరంలోని వివిధ కాలనీల్లో భూములు, భవనాలు, ఇతర స్థిరాస్థులు కొనుగోలు చేసిన వారికోసం,కలెక్టరేట్‌ వెనుక భాగంలోని సబ్‌రిజిస్ట్రార్‌ కార్యాలయంలో రిజిస్ట్రేషన్‌ కార్యకలాపాలు నిర్వహిస్తుంటారు. గురువారం సేవలు నిలిచిపోవడంతో క్రయ, విక్రయదారులు ఇబ్బందులు పడ్డారు.
• తిమ్మాపూర్‌ సబ్‌ రిజిస్ట్రార్‌ కార్యాలయంలో ఈకేవైసీ పనిచేయకపోవడంతో రిజిస్ట్రేషన్లు ఆగిపోయాయి. ఉదయం 11.15 గంటల వరకు పనిచేసిన సర్వర్‌ అకస్మాత్తుగా పనిచేయకపోవడంతో సేవాదారులు సాయంత్రం వరకు వేచి చూసి తిరిగి ఇంటికి వెళ్లిపోయారు. సబ్‌ రిజిస్ట్రార్‌ రాజేశ్‌ను వివరణ కోరగా సమస్య రాష్ట్ర వ్యాప్తంగా ఉందని చెప్పారు.
• గంగాధర సబ్‌ రిజిస్ట్రార్‌ కార్యాలయంలోనూ రిజిస్ట్రేషన్‌ సేవలు నిలిచి పోవడంతో ప్రజలు ఇబ్బంది పడ్డారు. మధ్యాహ్నం 12 గంటల సమయంలో ఈకేవైసీ సమస్యతో రిజిస్ట్రేషన్‌ సేవలకు అంతరాయం ఏర్పడింది. సాయంత్రం వరకు కూడా పరిష్కారం రాకపోవడంతో రిజిస్ట్రేషన్‌ కోసం వచ్చిన వారు నిరాశగా వెనుదిరిగారు. సుదూర ప్రాంతాలను నుంచి వచ్చామని, రోజంతా వృథా అయిందని ఆవేదన చెందారు. కాగా ప్రభుత్వం రిజిస్ట్రేషన్‌ చార్జీలు పెంచుతున్నట్టు పుకార్లు రావడంతో రిజిస్ట్రేషన్‌ కోసం వచ్చిన వారు ఒకింత ఆందోళనకు గురయ్యారు.
• జగిత్యాల జిల్లాలోని అన్ని రిజిస్ట్రేషన్‌ కార్యాలయాల్లో రిజిస్ట్రేషన్లు నిలిచిపోయాయి. క్రయవిక్రయదారులకు సంబందించిన ఆధార్‌ బయోమెట్రిక్‌ తీసుకునే సమయంలో సాంకేతిక సమస్యలు తలెత్తాయి. దీంతో బయోమెట్రిక్‌ విధానం పనిచేయలేదు. జగిత్యాల, మెట్‌పెల్లి, కోరుట్ల, మల్యాలలోని రిజిస్ట్రేషన్‌ కార్యాలయాలల్లో రిజిస్ట్రేషన్ల ప్రక్రియ పూర్తిగా నిలిచిపోయింది. రిజిస్ట్రేషన్లకు వచ్చిన క్రయవిక్రయదారులు బయోమెట్రిక్‌ ఎప్పుడు పనిచేస్తుందా..? అంటూ సాయంత్రం వరకు నిరీక్షించారు.

తహసీల్‌ ఆఫీసుల్లోనూ అదే దుస్థితి

మానకొండూర్‌, జూలై 11 : మరోవైపు తహసీల్‌ ఆఫీసుల్లోనూ సర్వర్‌ డౌన్‌ కావడంతో రైతులు ఇబ్బంది పడ్డారు. స్లాట్‌ బుక్‌ చేసుకొని వచ్చిన తర్వాత తీరా రిజిస్ట్రేషన్లు నిలిచిపోవడంతో పొద్దంతా పడిగాపులుగాశారు. బుధవారం ఎండ దంచి కొట్టగా ఇబ్బంది పడ్డారు. మానకొండూర్‌లోని తహసీల్దార్‌ అండ్‌ జాయింట్‌ సబ్‌ రిజిస్ట్రార్‌ కార్యాలయం వద్ద సాయంత్రం వరకు దాదాపు 6 గంటల వరకు చెట్ల కింద చేదతీరారు. సర్వర్‌లో సమస్య తలెత్తడంతోనే రిజిస్ట్రేషన్లు కావడం లేదని అధికారులు తెలియజేశారు.