Rajdhani AC bus | రాజధాని బస్సులో ఎమర్జెన్సీ అలారం.. భ‌యంతో ప‌రుగులు తీసిన ప్ర‌యాణికులు

కరీంనగర్ నుండి హైదరాబాద్ వెళ్తున్న ఆర్టీసీ రాజధాని ఏసీ బస్సులో ఎమర్జెన్సీ అలారం రావడంతో డ్రైవర్ అప్రమత్తమై తిమ్మాపూర్ శివారులో బస్సును నిలిపారు.

తిమ్మాపూర్,నవంబర్12 : కరీంనగర్ నుండి హైదరాబాద్ వెళ్తున్న ఆర్టీసీ రాజధాని ఏసీ బస్సులో ఎమర్జెన్సీ అలారం రావడంతో డ్రైవర్ అప్రమత్తమై తిమ్మాపూర్ శివారులో బస్సును నిలిపారు. గురువారం ఉదయం 8 గంటల సమయంలో హైదరాబాద్ వెళ్తున్న బస్సులో అలారం వచ్చింది. దీంతో డ్రైవర్ ను అలెర్ట్ చేసి, ప్రయాణికులు భయంతో దిగిపోయారు. అలారం ఎంతకూ ఆగకపోవడంతో ప్రయాణికులు భయాందోలకు గురయ్యారు. ఇటీవల ఎలక్ట్రికల్ బస్సుల్లో ప్రమాదాల నేపథ్యంలో డీజిల్ బస్సులో కూడా అలారం రావడంతో ప్రయాణికులకు అర్థం కాక ఆందోళన చెందారు.

అయితే బస్సు బ్రేక్ డౌన్ కావడంతో మరో బస్సును ఏర్పాటు చేసేందుకు అధికారులు త్వరగా స్పందించలేదని ప్రయాణికులు ఆరోపించారు. ఇందులో ఎయిర్పోర్టుకు వెళ్లేవారు ఉండడంతో ఫ్లైట్ మిస్ అయితే ఎవరు బాధ్యులని ప్రశ్నించారు. అనంతరం వచ్చిన బస్సులో హైదరాబాద్ వెళ్లారు.