అద్భుత కరీంనగర్‌ ఆవిష్కృతం

సీఎం కేసీఆర్‌ అందిస్తున్న ప్రోత్సాహంతో కరీంనగర్‌ అద్భుత జిల్లాగా మారబోతున్నదని రాష్ట్ర బీసీ సంక్షేమం, పౌర సరఫరాల శాఖ మంత్రి గంగుల కమలాకర్‌ స్పష్టం చేశారు. మంగళవారం జిల్లా కేంద్రంలోని పోలీస్‌ పరేడ్‌ గ్రౌండ్‌లో ఆయన జాతీయ జెండాను ఆవిష్కరించారు. అనంతరం పోలీసుల గౌరవ వందనం స్వీకరించి, జిల్లా ప్రజలనుద్దేశించి ప్రసంగించారు.

• మెరుగుపడ్డ గ్రామీణుల జీవన ప్రమాణాలు
• సమపాళ్లలో అభివృద్ధి, సంక్షేమం
• దేశానికే తలమానికంగా తెలంగాణ
• సీఎం కేసీఆర్‌ ప్రోత్సాహంతోనే జిల్లా అభివృద్ధి
• స్వాతంత్య్ర దినోత్సవంలో మంత్రి గంగుల కమలాకర్‌

కరీంనగర్‌, ఆగస్టు 15 (నమస్తే తెలంగాణ) :సీఎం కేసీఆర్‌ అందిస్తున్న ప్రోత్సాహంతో కరీంనగర్‌ అద్భుత జిల్లాగా మారబోతున్నదని రాష్ట్ర బీసీ సంక్షేమం, పౌర సరఫరాల శాఖ మంత్రి గంగుల కమలాకర్‌ స్పష్టం చేశారు. మంగళవారం జిల్లా కేంద్రంలోని పోలీస్‌ పరేడ్‌ గ్రౌండ్‌లో ఆయన జాతీయ జెండాను ఆవిష్కరించారు. అనంతరం పోలీసుల గౌరవ వందనం స్వీకరించి, జిల్లా ప్రజలనుద్దేశించి ప్రసంగించారు. ఆయన మాటల్లోనే.. సీఎం హామీ పథకం కింద వచ్చిన రూ.342 కోట్ల నుంచి రూ.210 కోట్లతో నగరంలోని ప్రధాన, అంతర్గత రోడ్లు, డ్రైనేజీలు, తాగు నీటి పైప్‌ లైన్లు వసుకున్నాం. పార్కులు, మార్కెట్లు, శ్మశాన వాటికలు వంటి పనులు చేపట్టాం. మిగిలిన పనులు పురోగతిలో ఉన్నాయి. నగరంలో స్మార్ట్‌ సిటీ కింద చౌరస్తాలను ఆధునీకరించాం. రూ.18 కోట్లతో సెంట్రిల్‌ లైటింగ్‌ ఏర్పాటు చేశాం. మానేరు రివర్‌ ఫ్రంట్‌ పనులు పూర్తయితే నగరానికి ప్రపంచ స్థాయిలో గుర్తింపు వస్తుంది. ఈ పనులు ఇప్పటికే 25 శాతం పూర్తయ్యాయి. మిగతావి శరవేగంగా జరగుతున్నాయి. ప్రపంచంలోని సియోల్‌, చైనాలో మొదటి రెండు ఫౌంటేన్లకు ధీటుగా కరీంనగర్‌లో మూడో ఫౌంటేన్‌ ఏర్పాటు చేస్తున్నాం. ప్రజల భద్రత మా బాధ్యతగా తలచి కరీంనగర్‌ను భావితరగాలకు ఒక సేఫ్‌ నగరంగా అందించాలనే లక్ష్యంతో ముందుకు పోతున్నాం.

మన పథకాలు దేశానికే తలమానికం
తెలంగాణ ప్రభుత్వం దేశానికే తలమానికంగా ఉండే విధంగా అనేక పథకాలు అమలు చేస్తోంది. సీఎం కేసీఆర్‌ ముందుచూపుతో సాగు నీటి ప్రాజెక్టులు తెచ్చి ప్రతి ఎకరాకు సాగు నీరు అందిస్తున్నారు. రైతులకు వ్యవసాయానికి 24 గంటల ఉచిత విద్యుత్‌, రైతుబంధు, రైతు బీమా వంటి పథకాలను అమలు చేస్తూ వారిని ఆర్థికంగా బలోపేతం చేశారు. ఈ సీజన్‌లో 8,072 మంది రైతులకు రూ.2.12 కోట్ల విలువైన పచ్చిరొట్ట విత్తనాలు పంపిణీ చేశాం. ఈ సీజన్‌లో రైతులకు కావాల్సిన ఎరువులు అందుబాటులో ఉంచాం. ఈ వానకాలంలో రైతుబంధు కింద 1,77,762 మంది ఖాతాల్లో రూ.143.94 కోట్ల ఆర్థిక సహాయాన్ని అందించాం. వివిధ కారణాలతో చనిపోయిన 423 మంది రైతులకు రైతుబీమా కింద రూ.21.15 కోట్లు అందించాం. 759 ఎకరాల్లో ఆయిల్‌ పాం సాగును ప్రోత్సహిస్తున్నాం. గ్రామీణ ప్రాంతాల ప్రజల జీవన ప్రమాణాలు మెరుగుపర్చడమే లక్ష్యంగా అనేక పథకాలను సీఎం కేసీఆర్‌ అమలు చేస్తున్నారు.

• కులవృత్తులు, చేతివృత్తుల వారికి ప్రోత్సాహాన్ని అందించి వృత్తి నైపుణ్యాలను మెరుగుపర్చే లక్ష్యంతో బీసీలకు రూ.లక్ష ఆర్థిక సహాయాన్ని అందుబాటులోకి తెచ్చా రు. బీసీ కార్పొరేషన్‌ ద్వారా అమలవుతున్న బీసీ చేయూత పథకం కింద జిల్లాలో 19,096 మంది ఇప్పటి వరకు దరఖాస్తు చేసుకుంటే 15,040 మందిని అర్హులుగా గుర్తించాం. 52 మందికి ఆర్థిక సాయం అందించాం. ఈ పథకం నిరంతరం కొనసాగుతుంది.
• పేదల సొంతింటి కలను సాకారం చేసేందుకు రాష్ట్ర ప్రభుత్వం గృహలక్ష్మి పథకాన్ని ప్రవేశ పెట్టింది. ఇల్లు కట్టుకోవడానికి సొంతంగా స్థలం ఉంటె రూ.3 లక్షల ఆర్థిక సహాయం అందిస్తాం. మొదటి దశలో కరీంనగర్‌కు 3 వేలు, చొప్పదండికి 1,650, హుజూరాబాద్‌కు 2,600, మానకొండూర్‌కు 2 వేలు, హుస్నాబాద్‌లోని చిగురుమామిడి, సైదాపూర్‌ మండలాలకు 1,250 చొప్పున మొత్తం 10,500 మందికి ఆర్థిక సహాయం అందించబోతున్నాం.
• కల్యాణలక్ష్మి, షాదీముబారక్‌ పథకాల కింద పేదంటి ఆడపిల్లల పెండ్లిళ్లకు రూ.1,00,116 ఆర్థిక సహాయాన్ని అందిస్తున్నాం. ఈ పథకాల కింద 2022-23, 2023-24 ఆర్థిక సంవత్సరాల్లో 8,333 దరఖాస్తులు రాగా 6,038 మందికి రూ.60.45 కోట్ల ఆర్థిక సహాయాన్ని అందించాం.
• తెలంగాణ మైనార్టీ కార్పొరేషన్‌ ద్వారా అర్హులైన వారికి రూ.లక్ష ఆర్థిక సహాయం అందిస్తున్నాం. జిల్లాలో 120 మంది దరఖాస్తులు చేసుకోగా 19 మందికి ఆర్థిక సహాయం అందించాం.
• దళితబంధు పథకం కింద దళితులు ఎంచుకున్న పథకాలను అందించి వారు ఉన్న స్థానం నుంచి ఉన్నత స్థానానికి ఎదిగే విధంగా ప్రోత్సహిస్తున్నాం. బ్యాంకులతో నిమిత్తం లేకుండా ఒక్కో దళిత కుటుంబానికి రూ.10 లక్షల చొప్పున ఆర్థిక సహాయాన్ని అందిస్తున్నాం. సీఎం కేసీఆర్‌ చొరవతో హుజూరాబాద్‌ను పైలెట్‌ ప్రాజెక్టుగా తీసుకుని 18,021 దళిత కుటుంబాలకు రూ.1,784 కోట్లు అందించాం. అన్ని నియోజకవర్గాల్లోనూ ఇలాగే దళితులను ఆర్థికంగా ప్రోత్సహిస్తున్నాం. దీంతో దళితులు పారిశ్రామిక వేత్తలుగా, వ్యాపారులుగా రాణిస్తున్నారు.
• చేనేత కార్మికుల జీవితాల్లో వెలుగులు నింపేందుకు రాష్ట్ర ప్రభుత్వం ప్రాధాన్యత ఇస్తోంది. నేతన్నలకు అవసరమైన నూలు, రసాయనాల కొనుగోళ్లపై 40 శాతం రాయితీ ఇస్తున్నాం. నేతన్నకు చేయూత పథకం కింద రూ.3.52 కోట్లు చేనేత ప్రారిశ్రామికుల ఖాతాల్లో జమచేశాం. నేత కార్మికుడు ఎలాగైనా చనిపోతే వారి కుటుంబానికి నేతన్న బీమా పథకం కింద రూ.5 లక్షల ఆర్థిక సహాయం అందిస్తున్నాం. జిల్లాలోని 19 చేనేత పారిశ్రామిక సహకార సంఘాలకు క్యాష్‌ క్రెడిట్‌ కింద సహకార బ్యాంకు ద్వారా ఈ ఆర్థిక సంవత్సరానికి రూ.3.63 కోట్లు మంజూరు చేశాం. 50 శాతం సబ్సిడీతో మరమగ్గాలకు విద్యుత్‌ సరఫరా చేస్తున్నాం.
• మత్స్య పారిశ్రామికుల సంక్షేమానికి రాష్ట్ర ప్రభుత్వం కృషి చేస్తోంది. చేపల పెంపకానికి అవసరమయ్యే పెట్టుబడిని ప్రభుత్వమే భరిస్తోంది. ఈ ఆర్థిక సంవత్సరంలో 2.29 కోట్ల చేప పిల్లలు విడుల చేయడం లక్ష్యం కాగా, 772 చెరువుల్లో 2.05 కోట్ల విత్తనాలు విడుదల చేశాం. 23.17 లక్షల చేప పిల్లలు విడుదల చేయాల్సి ఉండగా 13.78 లక్షలు విడుదల చేశాం. మత్స్యకారులు మణించినట్లయితే రూ.5 లక్షలు, అంగవైకల్యం ఏర్పడితే రూ.2.50 లక్షలు అందిస్తున్నాం.
• పశు సంవర్ధక శాఖ ద్వారా రెండో విడత గొర్రెల పంపిణీని ప్రారంభించాం. 9,466 మంది లబ్ధిదారులకు అందించాల్సి ఉన్నది. హుజూరాబాద్‌ నియోజకవర్గంలోని నాలుగు మండలాల్లో దళితబంధు పథకం కింద రెండో విడుతలో 51 మంది లబ్ధిదారులకు 204 పాడి గేదెలు అందించాం. ఎస్సీ, ఎస్టీ, బీసీ రైతులకు 163 పాడి పశువులను సరఫరా చేశాం. 4 సంచార పశువైద్య శాలలతో రైతుల ఇంటికి వెళ్లి పశువులకు వైద్య సేవలు అందిస్తున్నాం.
• కార్పొరేట్‌కు ధీటుగా ప్రభుత్వ వైద్యం అందుతోంది. పేద రోగులు ప్రైవేటు దవాఖాన్లకు వెళ్లకుండా 24 గంటల వైద్య సేవలను అందుబాటులోకి తెచ్చాం. ఈ ఏడాది ఇప్పటి వరకు ప్రభుత్వ దవాఖానాల్లో 11,579 ప్రసవాలు జరిగాయి. 54,443 కేసీఆర్‌ కిట్లు ఇచ్చాం. ఆడ శిశువు పుడితే రూ.13 వేలు, మగ శిశువు పుడితే రూ.12 వేలు అందిస్తున్నాం. ఇప్పటి వరకు 1,21,282 మందికి రూ.38.46 కోట్లు అందించాం. జిల్లాకు ప్రభుత్వ మెడికల్‌ కళాశాల మంజూరైంది. ఇందుకు రూ.150 కోట్లు మంజూరయ్యాయి. 100 మెడికల్‌ సీట్లతో తరగతులు ప్రారంభిస్తాం. జిల్లా ప్రభుత్వ దవాఖానలో 134 రకాల పరీక్షలు నిర్వహించే విధంగా టీ హబ్‌ను ప్రారంభించుకున్నాం. జిల్లాలో మహిళలకు ప్రత్యేకంగా వైద్య సేవలు అందించేందుకు ఆరోగ్య మహిళా కేంద్రాలు ఏర్పాటు చేశాం. మహిళల్లో తలెత్తుతున్న అనీమియా ముక్త్‌ కరీంనగర్‌ జిల్లాగా తీర్చిదిద్దేందుకు కృషి చేస్తున్నాం.
• పేదల ఆకలి తీర్చేందుకు జిల్లాలో 2,78,388 కుటుంబాలకు ఆహార భద్రత, అంత్యోదయ, అన్నపూర్ణ కార్డులు జారీ చేశాం. 68,488 ప్రభుత్వ పాఠశాలల్లో విద్యార్థులకు 394.019 మెట్రిక్‌ టన్నుల సన్న బియ్యం సరఫరా చేస్తున్నాం. పౌర సరఫరాల సంస్థ ద్వారా ఈ వర్షకాలంలో 60,609 మంది రైతుల నుంచి 2,96,837.960 మెట్రిక్‌ టన్నుల దాన్యం కొనుగోలు చేసి రూ. 610.80 కోట్లు రైతుల ఖాతాల్లో జమ చేశాం.
• గ్రామీణాభివృద్ధి పథకాలను వివరిస్తూ గత ఆర్థిక సంవత్సరంలో 8,451 స్వయం సహాయక బృందాలకు, రూ.704.11 కోట్ల రుణాలు మంజూరు చేశాం. ఈ ఆర్థిక సంవత్సరంలో ఇప్పటి వరకు 9,924 సంఘాలకు రూ.640.35 కోట్లు అందించాం. ఆధారం లేని వారికి ఆసరా పెన్షన్ల కింద అన్ని కేటగిరీల్లో కలిపి 1,40,973 మందికి ప్రతి నెలా రూ.30.78 కోట్లు అందిస్తున్నాం.
• నీటి పారుదల రంగంలో ఎల్‌ఎండీ జలాశ యం నుంచి గత యాసంగి పంటకు 65. 503 టీఎంసీల సాగు నీటిని విడుదల చేశాం. ఈ వానకాలం పంటకు 38.099 టీఎంసీల నీటిని అందించాలని నిర్ణయించాం.
• రోడ్లు, భవనాలు, పంచాయతీ రాజ్‌ శాఖల ద్వారా రోడ్ల నిర్మాణంతో జిల్లాలోని అన్ని గ్రామాలకు కనెక్టివిటీ పెరిగింది.
• జిల్లాలో ప్రైవేట్‌ పాఠశాలలకు ధీటుగా ప్రభుత్వ విద్య కొనసాగుతోంది. పాఠశాలల్లో ప్రమాణాలు మెరుగుపర్చడానికి ‘మన ఊరు – మన బడి’ కార్యక్రమాన్ని ప్రారంభించాం. గత విద్యాసంవత్సరంలో 10వ తరగతిలో 12,128 మంది విద్యార్థులు పరీక్షలకు హాజరుకాగా 11,532 మంది ఉత్తీర్ణత సాధించారు. ఇందులో రాష్ట్రంలో నాలుగో స్థానంలో నిలిచాం. వివిధ కులాలకు చెందిన 72,685 మంది విద్యార్థులకు రూ.63.55 కోట్లు పంపిణీ చేశాం.” పట్టణ పేదరిక నిర్మూలన ప్రాజెక్టు కింద జరుగుతున్న అభివృద్ధిని కూడా మంత్రి గంగుల వివరించారు. ఈ వేడుకల్లో ఎమ్మెల్యే సుంకె రవిశంకర్‌, జడ్పీ చైర్‌పర్సన్‌ కనుమల్ల విజయ, కలెక్టర్‌ బీ గోపి, సీపీ ఎల్‌ సుబ్బారాయుడు, మేయర్‌ వై సునీల్‌రావు, అదనపు కలెక్టర్‌ లక్ష్మీకిరణ్‌, ప్రఫుల్‌ దేశాయ్‌, ఆర్డీవో మహేశ్‌, ఇతర అధికారులు, ప్రజా ప్రతినిధులు పాల్గొన్నారు.