వాషింగ్టన్, ఆగస్టు 24: అమెరికన్ పార్లమెంట్ నిర్దేశించినట్టుగా 2023 ఆర్థిక సంవత్సరంలో 65 వేల హెచ్-1బీ వీసాల జారీకి సరిపడినన్ని దరఖాస్తులు అందినట్టు ఆ దేశంలోని ఫెడరల్ ఏజెన్సీ ప్రకటించింది. అమెరికాలోని కంపెనీలు ప్రత్యేక నైపుణ్యం అవసరమైన పోస్టుల్లో విదేశీ ఉద్యోగులను నియమించుకొనేందుకు హెచ్-1బీ వీసా వీలుకల్పిస్తుంది. ఇది నాన్-ఇమ్మిగ్రెంట్ వీసా. అమెరికన్ టెక్నాలజీ కంపెనీలు.. ఈ వీసాపై ఆధారపడి ఏటా భారత్, చైనా లాంటి దేశాల నుంచి వేలమంది ఉద్యోగులను నియమించుకొంటున్నాయి. విదేశీ వృత్తి నిపుణుల్లో వర్క్ వీసా తర్వాత హెచ్-1బీ వీసాకే ఎక్కువ ఆదరణ ఉన్నది. అమెరికన్ కాంగ్రెస్ నిర్దేశించిన గరిష్ఠ పరిమితి మేరకు.. 2023లో 65 వేల హెచ్-1బీ వీసాలతోపాటు అడ్వాన్స్డ్ డిగ్రీ మినహాయింపు పథకం కింద మరో 20 వేల హెచ్-1బీ వీసాల జారీకి అవసరమైనన్ని దరఖాస్తులు వచ్చినట్టు యూఎస్ సిటిజన్షిప్ అండ్ ఇమ్మిగ్రేషన్ సర్వీసెస్ (యూఎస్సీఐఎస్) మంగళవారం ఓ ప్రకటనలో వెల్లడించింది.
రిజిస్ట్రెంట్ల (నమోదుదారుల) ఆన్లైన్ ఖాతాలకు ఇప్పటికే నోటిఫికేషన్లు కూడా పంపామని, వీసాలకు ఎంపికకానివారికి ‘నాట్-సెలెక్టెడ్’ అనే సందేశం వస్తుందని పేర్కొన్నది. పరిమితి నుంచి మినహాయింపులున్న పిటిషన్లను మాత్రం స్వీకరించి, ప్రాసెస్ చేస్తామని తెలిపింది. దీంతోపాటు ఇప్పటికే అమెరికాలో పనిచేస్తున్న విదేశీ ఉద్యోగులకు హెచ్-1బీ వీసా గడువు పొడిగింపు, ఉద్యోగ నిబంధనల మార్పు, కొత్త కంపెనీల్లో పనిచేసేందుకు వచ్చిన దరఖాస్తులను ప్రాసెస్ చేస్తామని యూఎస్సీఐఎస్ వివరించింది.
అప్పుడే ఇలాంటి సందేశాలు
అమెరికాలో వచ్చే ఏడాది సెప్టెంబర్ 30తో ముగిసే 2023 ఆర్థిక సంవత్సరంలో హెచ్-1బీ వీసాలకు రెండవ లాటరీ నిర్వహించకపోవచ్చని తెలుస్తున్నది. ఈ వీసాలకు ఎంపిక కానివారికి ‘నాట్-సెలెక్టెడ్’ అనే సందేశాలను పంపుతుడటమే ఇందుకు సంకేతమని ఇమ్మిగ్రేషన్ అధికారులు చెప్తున్నారు. ‘ఈ ఏడాది హెచ్-1బీ వీసాలకు రెండవ లాటరీ నిర్వహించకపోవచ్చు. ఈ వీసాలకు ఎంపికకాని పలువురి ఆన్లైన్ అకౌంట్లకు యూఎస్సీఐఎస్ ‘నాట్-సెలెక్టెడ్’ అనే నోటీసులను పంపుతున్నది. మరిన్ని లాటరీలు నిర్వహించకూడదనుకొన్నప్పుడే ఇలాంటి నోటీసులు పంపుతారు’ అని ‘ఇమ్మిగ్రేషన్.కామ్’ మేనేజింగ్ అటార్నీ రాజీవ్ ఖన్నా తెలిపారు. అయితే దీనిపై యూఎస్సీఐఎస్ నుంచి అధికారికంగా ఎలాంటి ప్రకటనా వెలువడలేదు.