ఇరాన్‌లో కొనసాగుతున్న నిరసనలు.. అయతుల్లా పూర్వీకుల ఇంటికి నిప్పు

30 ఏళ్లుగా మ్యూజియంగా ఉన్న ఇస్లామిక్ రిపబ్లిక్ వ్యవస్థాపకుడు అయతుల్లా రుహోల్లా ఖొమేని జన్మించిన పూర్వీకుల ఇంటికి ఆందోళనకారులు నిప్పుపెట్టారు.

టెహ్రాన్‌: ఇరాన్‌లో హిజాబ్‌కు వ్యతిరేకంగా నిరసనలు కొనసాగుతున్నాయి. తాజాగా ఇస్లామిక్ రిపబ్లిక్ వ్యవస్థాపకుడు అయతుల్లా రుహోల్లా ఖొమేని జన్మించిన పూర్వీకుల ఇంటికి నిరసనకారులు నిప్పుపెట్టారు. ఖొమేని నగరంలో శుక్రవారం ఈ సంఘటన జరిగింది. రెండు నెలల కిందట బహిరంగ ప్రాంతంలో హిజాబ్‌ ధరించనందుకు 22 ఏళ్ల మహసా అమిని అనే యువతిని ఆ దేశ నైతిక పోలీసులు అరెస్ట్‌ చేశారు. వారి చిత్రహింసలు భరించలేని ఆ యువతి కోమాలోకి వెళ్లి మరణించింది. ఈ సంఘటనపై ఇరాన్‌లోని ముస్లిం మహిళలు ఆగ్రహం వ్యక్తం చేశారు. కఠినమైన మతాధికారుల పాలనకు వ్యతిరేకంగా గళమెత్తుతున్నారు. నాటి నుంచి ఆ దేశంలో నిరసనలు కొనసాగుతున్నాయి.

కాగా, గురువారం నాటి అల్లర్లలో ఐదుగురు భద్రతా సిబ్బంది మరణించినట్లు ఇరాన్‌ అధికార మీడియా పేర్కొంది. అయితే భద్రతా సిబ్బంది కాల్పుల్లో చనిపోయిన పలువురు ఇరాన్‌ యువకుల మృతదేహాలకు శుక్రవారం అంత్యక్రియలు నిర్వహించినట్లు వార్తలు వెలువడ్డాయి. ఈ నేపథ్యంలో ఆ దేశంలో మరోసారి నిరసనలు వెల్లువెత్తాయి. 30 ఏళ్లుగా మ్యూజియంగా ఉన్న ఇస్లామిక్ రిపబ్లిక్ వ్యవస్థాపకుడు అయతుల్లా రుహోల్లా ఖొమేని జన్మించిన పూర్వీకుల ఇంటికి ఆందోళనకారులు నిప్పుపెట్టారు. ఈ వీడియో క్లిప్‌లు సోషల్‌ మీడియాలో వైరల్‌ అయ్యాయి.

https://twitter.com/StepanGronk/status/1593809431120162822?ref_src=twsrc%5Etfw%7Ctwcamp%5Etweetembed%7Ctwterm%5E1593809431120162822%7Ctwgr%5E408d5b9f231c162e9603d532bacd2d7646b55165%7Ctwcon%5Es1_c10&ref_url=https%3A%2F%2Fwww.ndtv.com%2Fworld-news%2Fvideo-protesters-in-iran-set-fire-to-ayatollah-khomeinis-ancestral-home-3534878