Visit:
Kim Jong-un : ఉత్తర కొరియా (North Korea) అధినేత కిమ్ జోంగ్ ఉన్ (Kim Jong-un) తమ దేశ సైనిక సామర్థ్యాన్ని మరింత పెంచే దిశగా కీలక ఆదేశాలు జారీచేశారు. తమ ఫిరంగి దళాలు (ఆర్టిలరీ) అత్యంత కేంద్రీకృత, విధ్వంసకర సామర్థ్యాలను కలిగి ఉండాలని ఆయన పిలుపునిచ్చారు. ఈ వారంలో బుధవారం నుంచి శుక్రవారం వరకు ఆయన పలు కీలక ఆయుధ కర్మాగారాలను సందర్శించారు. ఈ పర్యటన వివరాలను ఉత్తర కొరియా అధికారిక మీడియా (Media) వెల్లడించింది.
కొరియన్ సెంట్రల్ న్యూస్ ఏజెన్సీ (కేసీఎన్ఏ)’ కథనం ప్రకారం.. రూలింగ్ వర్కర్స్ పార్టీ సెంట్రల్ మిలిటరీ కమిషన్ వైస్ ఛైర్మన్ పాక్ జోంగ్ చోన్తో సహా పలువురు ఉన్నతాధికారులు కిమ్ వెంట ఉన్నారు. ఈ సందర్భంగా కిమ్ మాట్లాడుతూ.. “యుద్ధాన్ని నిరోధించడం, యుద్ధంలో పోరాడటం అనే రెండు కీలక బాధ్యతలను మన ఆర్టిలరీ సమర్థంగా నిర్వర్తించాలి. దీని కోసం అత్యంత విధ్వంసకర, బహుముఖ దాడి సామర్థ్యాన్ని కలిగి ఉండాలి” అని స్పష్టంచేశారు.
ప్రపంచంలోనే అత్యంత శక్తిమంతమైన సైన్యాన్ని నిర్మించాలనే పార్టీ వ్యూహాత్మక విధానంలో ఆయుధ పరిశ్రమ కీలకపాత్ర పోషించాలని కిమ్ ఉద్ఘాటించారు. దాడి, రక్షణ ఆయుధాలలో కృత్రిమ మేథ (ఏఐ) స్థాయిని పెంచడం, ఫిరంగి ఆయుధాల ఆటోమేషన్, ఉత్పత్తి సామర్థ్యాన్ని మెరుగుపరచడం వంటి విధానపరమైన పనులను ఆయన నిర్దేశించారు. కిమ్ 600 ఎంఎం, 240 ఎంఎం మల్టిపుల్ రాకెట్ లాంచర్లు, డ్రోన్లను ఉత్పత్తిచేసే ఫ్యాక్టరీలను సందర్శించి ఉండవచ్చని సియోల్కు చెందిన కొరియా డిఫెన్స్ అండ్ సెక్యూరిటీ ఫోరమ్ సెక్రటరీ జనరల్ షిన్ జోంగ్-వూ విశ్లేషించారు.
కాగా దక్షిణకొరియా, అమెరికా, జపాన్ దేశాలు ఇటీవల నిర్వహించిన త్రైపాక్షిక సైనిక విన్యాసాలకు ప్రతిస్పందనగా సెప్టెంబర్ 14న ఉత్తర కొరియా క్షిపణి, ఫిరంగి దళాలతో భారీ ఫైర్పవర్ విన్యాసాన్ని నిర్వహించింది. ఈ విన్యాసంలో కొత్త రకం అటాక్ డ్రోన్లు, టాక్టికల్ క్రూయిజ్ క్షిపణులు, భారీ కాలిబర్ రాకెట్ లాంచర్లు, టాక్టికల్ బాలిస్టిక్ క్షిపణులను ప్రయోగించారు. ఈ ఆయుధాలన్నీ తమ లక్ష్యాలను 100 శాతం కచ్చితత్వంతో ఛేదించాయని ఉత్తర కొరియా ప్రకటించుకుంది.
