Google Maps | కొందరు స్మార్ట్ఫోన్లో గూగుల్ మ్యాప్స్ను ఓపెన్ చేసుకుంటారు. గుడ్డిగా అది ఏ రూట్ చెబితే ఆ రూట్లో వెళ్తుంటారు. కానీ.. ఒక్కోసారి గూగుల్ కూడా పొరపాటు చేయొచ్చు. అలా చాలా సార్లు గూగుల్ను నమ్మి మోసపోయిన వాళ్లు ఉన్నారు. గూగుల్ మ్యాప్స్ ద్వారా వెళ్లాల్సిన ప్రాంతానికి కాకుండా ఎక్కడికో వెళ్లిపోయామని.. దారి తప్పామని.. ఇంకా కొందరైతే డెడ్ ఎండ్కు చేరుకున్నాక కూడా గూగుల్ మ్యాప్స్లో రూట్ చూపిస్తోందని.. ఇలా పలు రకాలుగా బుక్ అయిన వాళ్లు ఉన్నారు.
తాజాగా ఓ వ్యక్తిని ఏకంగా మామిడి చెట్టు మధ్యలో నుంచి వెళ్లాలంటూ రూట్ చూపించిందట మ్యాప్స్లో. దీంతో ఆ వ్యక్తి షాక్ అవడమే కాదు.. అనవసరంగా తన ఫ్యామిలీ మెంబర్స్తో తిట్లు కూడా తినాల్సి వచ్చిందట. ఈ ఘటన వెస్ట్ ఆఫ్రికాలోని ఘనా దేశంలో చోటు చేసుకుంది.
తన ఫ్యామిలీతో ఆల్ఫ్రెడ్ అనే ఓ వ్యక్తి కారులో వేరే చోటుకు వెళ్తున్నాడు. తనకు రూట్ తెలియకపోవడంతో గూగుల్ మ్యాప్స్ ఓపెన్ చేశాడు. గూగుల్ మ్యాప్స్ సాయంతో కారును తీసుకెళ్తున్నాడు. ఇంతలో మెయిన్ రోడ్డు నుంచి రూట్ మారింది. వేరే రూట్ చూపించింది మ్యాప్స్.
సరే అని కారును మ్యాప్స్ చూపించిన రూట్కు తిప్పాడు. చివరకు అది ఏకంగా ఓ మామిడి చెట్టు దగ్గరికి తీసుకెళ్లింది. మ్యాప్స్ను రూట్ అడిగితే.. మామిడి చెట్టు మధ్యలో నుంచి వెళ్లి టర్న్ లెఫ్ట్ అంటూ చూపించింది. దీంతో ఏం చేయాలో అర్థం కాలేదు ఆల్ఫ్రెడ్కు. ఆ మామిడి చెట్టు తర్వాత అక్కడ రూటే లేదట. దీంతో తన కుటుంబ సభ్యులతోనూ తిట్లు తినాల్సి వచ్చిందని.. గూగుల్ మ్యాప్స్ను నమ్మకున్నందుకు తనకు బాగానే శాస్తి జరిగిందని ట్విట్లు చేశాడు. ఆ ట్వీట్లు ప్రస్తుతం సోషల్ మీడియాలో వైరల్ అవుతున్నాయి. బాబు.. నీకే కాదు.. మాకూ చాలాసార్లు ఇటువంటి అనుభవం ఎదురైంది.. అంటూ నెటిజన్లు తమ అనుభవాలను కూడా ట్వీట్ చేశారు.