నల్లసముద్రంపై అణుప్రయోగం.. సంచలన నిర్ణయం దిశగా పుతిన్‌!

అణు బాంబును పరీక్షించేందుకు రష్యా అధ్యక్షుడు వ్లాదిమిర్‌ పుతిన్‌ సిద్ధమవుతున్నారా? నాటో, ఉక్రెయిన్‌కు భయం పుట్టించేందుకు సంచలన నిర్ణయం తీసుకోబోతున్నారా? అంటే అవుననే సంకేతాలు వస్తున్నాయి.

• ఫలితంగా సునామీ వచ్చే ప్రమాదం
• విషవాయువుతో నిండనున్న సముద్రం
• సరిహద్దు దేశాల గుండెల్లో బుగులు

మాస్కో, అక్టోబర్‌ 20: అణు బాంబును పరీక్షించేందుకు రష్యా అధ్యక్షుడు వ్లాదిమిర్‌ పుతిన్‌ సిద్ధమవుతున్నారా? నాటో, ఉక్రెయిన్‌కు భయం పుట్టించేందుకు సంచలన నిర్ణయం తీసుకోబోతున్నారా? అంటే అవుననే సంకేతాలు వస్తున్నాయి. తన బలాన్ని ప్రదర్శించేందుకు పుతిన్‌ నల్ల సముద్రంలో అణు బాంబును పరీక్షించే అవకాశాలున్నాయని పలు నివేదికలు చెప్తున్నాయి. తన సత్తాను నిరూపించుకొనేందుకు భూ ఉపరితలంపై గానీ, నల్ల సముద్రంలోగానీ పుతిన్‌ అణు బాంబు పరీక్ష చేసే అవకాశాలున్నాయని విశ్లేషకులు పేర్కొంటున్నారు.

ఎందుకీ నిర్ణయం?

ఉక్రెయిన్‌తో జరుగుతున్న యుద్ధంలో అనుకొన్నట్టుగా రష్యా పైచేయి సాధించటం లేదు. పైగా, ఆక్రమిత ప్రాంతాలను తిరిగి స్వాధీనం చేసుకోవటానికి ఉక్రెయిన్‌ దళాలు వీరోచితంగా పోరాడుతున్నాయి. ప్రస్తుతం ఈ ప్రాంతాలవైపు ఆ దళాలు దూసుకొస్తున్నాయి. ఇలాంటప్పుడు పుతిన్‌ తీసుకొనే అసాధారణ నిర్ణయం ఒక్కటే.. అదే అణుబాంబు దాడి. ఈ నిర్ణయం తీసుకొంటే పెను విపత్తు తథ్యం. అణుబాంబు ప్రయోగించే సమయం ఆసన్నమైందని ఇప్పటికే పుతిన్‌ ప్రకటించారు కూడా. తాను దేనికీ వెనుకాడను అని చెప్పుకోవటానికే నల్లసముద్రంలో ఈ పరీక్షకు పుతిన్‌ సిద్ధమవుతున్నారని నిపుణులు చెప్తున్నారు.

ఏయే దేశాలు ప్రభావితం అవుతాయంటే..

రష్యా న్యూక్లియర్‌ బాంబును పరీక్షిస్తే 1990 అక్టోబర్‌ 24 తర్వాత ఇదే తొలిసారి అవుతుంది. నల్ల సముద్రంలో పుతిన్‌ అణు బాంబును పరీక్షిస్తే తీరప్రాంతాన్ని కలిగిన రష్యా, ఉక్రెయిన్‌, జార్జియా, తుర్కియే, బల్గేరియా, రొమేనియా తీవ్రంగా ప్రభావితం అవుతాయి. సముద్రంపై గానీ, సముద్రం అడుగున గానీ, నిర్మానుష్య ద్వీపంలో గానీ పుతిన్‌ న్యూక్లియర్‌ బాంబు పరీక్షలు చేసే అవకాశాలున్నాయని నిపుణులు చెప్తున్నారు.

పుతిన్‌కు ఉన్న అణుబాంబు పరీక్ష ఎంపికలు

• రష్యా ఉపరితలం నుంచి నల్ల సముద్రంలోకి అణు క్షిపణులను ప్రయోగించే అవకాశం.
• సబ్‌మరైన్‌ నుంచి మిస్సైన్‌ను పరీక్షించే చాన్స్‌.
• నల్ల సముద్రంలోని స్నేక్‌ ఐలాండ్‌ (ఉక్రెయిన్‌ ఆధీనంలో ఉన్నది)లో అణు బాంబు పడేలా ప్రయోగించే అవకాశం లేకపోలేదు.
• బెల్గోరాడ్‌ సబ్‌మరైన్‌ నుంచి పోసేడాన్‌ న్యూక్లియర్‌ డ్రోన్‌ ప్రయోగించే అవకాశం.
• యుద్ధ విమానంతోనూ న్యూక్లియర్‌ క్రూజ్‌ మిస్సైన్‌ను నల్లసముద్రంలోకి పరీక్షించే చాన్స్‌.
• అణుబాంబు పరీక్ష పర్యవసానాలు: సముద్రంలో అణుబాంబును పరీక్షిస్తే సునామీ వచ్చే ప్రమాదం ఉన్నదని, నీటిలో హైడ్రోజన్‌సల్ఫైడ్‌ గాఢత పెరుగుతుందని నిపుణులు తెలిపారు.

రష్యా వద్ద ఉన్న అణు సంపత్తి:

• రష్యా వద్ద 6,257 న్యూక్లియర్‌ ఆయుధాలున్నాయి.
• యాక్టివ్‌ మోడ్‌లో ఉన్నవి 1,458
• అందుబాటులో ఉన్నవి 3,039
• పనిచేయకుండా ఉన్నవి 1,760