టెహ్రాన్: ఇరాన్ మహిళలు (Iranian Women ) తప్పనిసరిగా హిజాబ్ (Hijab) ధరించాలని ఆ దేశం ఆదేశించింది. దీనిని పాటించని వారిపై కఠిన చర్యలు చేపడుతున్నది. తాజాగా గురువారం జరిగిన ఒక సంఘటనకు సంబంధించిన వీడియో క్లిప్ సోషల్ మీడియాలో వైరల్ అయ్యింది. ఇద్దరు మహిళలు హిజాబ్ ధరించకుండా ఒక షాప్ వద్దకు వెళ్లారు. గమనించిన ఒక వ్యక్తి హడావుడిగా అక్కడకు వచ్చాడు. హిజాబ్ ఎందుకు ధరించలేదని ఆ మహిళలను నిలదీశాడు. వారు నిర్లక్ష్యంగా సమాధానం చెప్పడంతో అతడు ఆగ్రహంతో రగిలిపోయాడు. ఆ షాప్లోని ర్యాక్లో ఉన్న పెద్ద పెరుగు కప్ను తీసుకుని ఆ మహిళల తలపై పోశాడు. దీంతో షాపు వ్యక్తి అతడ్ని ప్రతిఘటించాడు. ఈ వీడియో క్లిప్ సోషల్ మీడియాలో వైరల్ అయ్యింది.
కాగా, ఈ సంఘటనపై ఇరాన్ పోలీసులు స్పందించారు. హిజాబ్ ధరించని ఆ ఇద్దరు మహిళలను అరెస్ట్ చేశారు. అలాగే పబ్లిక్ ఆర్డర్కు విఘాతం కలిగించినందుకు మహిళలపై పెరుగుతో దాడి చేసిన వ్యక్తిని కూడా అరెస్ట్ చేశారు. హిజాబ్ ధరించని మహిళలను షాపులోకి అనుమతించడంతోపాటు ఆ చట్టాన్ని పాటించనందుకు ఆ షాపు యజమానికి నోటీసులు జారీ చేశారు.
మరోవైపు హిజాబ్ ధరించకుండా బహిరంగ ప్రదేశాల్లో కనిపించే మహిళలపై కనికారం లేకుండా చర్యలు తీసుకుంటామని, కఠినంగా శిక్షిస్తామని ఇరాన్ న్యాయవ్యవస్థ చీఫ్ ఇటీవల హెచ్చరించారు. హిజాబ్ చట్టాన్ని తప్పని సరిగా పాటించాలని పేర్కొన్నారు. ఈ చట్టం ప్రకారం ఏడేళ్ల వయస్సున్న బాలికలతో సహా మహిళలంతా బహిరంగ ప్రదేశాల్లో తప్పనిసరిగా హిజాబ్ ధరించాలి. అయితే హిజాబ్ను వ్యతిరేకిస్తున్న ఆ దేశ మహిళలు పెద్ద ఎత్తున నిరసనలు చేపట్టారు.
مشهد، شاندیز
از صفحه یاسر عرب pic.twitter.com/zstrtACMQD— Mehdi Nakhl Ahmadi (مهدی نخل احمدی) (@MehdiNakhl) March 31, 2023