Japan population | పిల్లల్ని కనండి.. రూ.3 లక్షలిస్తాం.. పెండ్లైన జంటలకు జపాన్‌ హామీ

Japan population | జపాన్‌లో జనాభా పెరుగుదల నానాటికి తీసికట్టుగా తయారైంది. జనాభా పెరుగుదల కోసం ప్రభుత్వం ప్రోత్సాహక నగదు బహుమతి ఇచ్చేందుకు నిర్ణయించారు. ఈ మొత్తాన్ని ఇప్పుడు రూ.3 లక్షలకు పెంచాలని ప్రతిపాదన సిద్ధం చేశారు.

Japan population | నానాటికి తగ్గిపోతున్న యువత జనాభాపై జపాన్ ప్రభుత్వం చాలా కాలంగా ఆందోళన చెందుతున్నది. పిల్లలను కనేలా ప్రజలను ప్రేరేపించడానికి ప్రభుత్వం అన్ని చర్యలు తీసుకుంటున్నది. పిల్లల్ని కనే జంటకు ఆర్థిక సాయాన్ని గతంలోనే జపాన్‌ ప్రభుత్వం ప్రకటించింది. అయినప్పటికీ ప్రజల ఆలోచనాతీరులో మార్పు రాకపోవడంతో గతంలో ప్రకటించిన మొత్తాన్ని రూ.3 లక్షలకు పెంచింది. ఈ విషయాన్ని జపాన్ టుడే నివేదించింది.

జపాన్‌ టుడే కథనం ప్రకారం, పిల్లలను కనేందుకు ఇచ్చే ప్రోత్సాహక బహుమతి మొత్తాన్ని జపాన్‌ ప్రభుత్వం పెంచనున్నది. జపాన్ ఆరోగ్య మంత్రి కట్సునోబు కటో ప్రధానమంత్రి ఫుమియో కిషిడాతో సమావేశమై గతంలో ప్రకటించిన సహాయాన్ని పెంచాలని ప్రతిపాదించారు. ప్రస్తుతం జపాన్‌లో బిడ్డ పుడితే రూ.2.50 లక్షలకు పైగా ఆర్థిక సహాయం తల్లిదండ్రులకు అందజేస్తున్నారు. ఇప్పుడు దాన్ని రూ.3 లక్షలకు పెంచేందుకు ప్రణాళిక రూపొందించనున్నారు. ఇది 2023 ఆర్థిక సంవత్సరం నుంచి అమలులోకి రానున్నది.

జపాన్ ప్రభుత్వ గణాంకాల ప్రకారం, 2021 లో జపాన్‌లో అత్యల్ప సంఖ్యలో పిల్లలు పుట్టారు. దాంతో ప్రభుత్వం యువత జనాభా పెరుగుదల కోసం చర్యలు తీసుకోవడం ప్రారంభించింది. జనాభా పెరుగుదల ఆవశ్యకతపై పెండ్లైన జంటలకు అవగాహన కల్పించారు. అయినప్పటికీ జనాభా పెరుగుదలలో ఎలాంటి మార్పు రాకపోవడంతో నగదు ప్రోత్సాహకం ఇవ్వాలని అక్కడి ప్రభుత్వం నిర్ణయించింది. రాయిటర్స్ నివేదిక ప్రకారం, గత ఏడాది జపాన్‌లో మొత్తం 8,11,604 మంది పిల్లలు పుట్టగా, ఆ ఏడాదిలో చనిపోయిన వారి సంఖ్య 14 లక్షలకుపైగా ఉన్నది. జపాన్ సంక్షేమ మంత్రిత్వ శాఖ సెప్టెంబర్ 14న విడుదల చేసిన నివేదిక ప్రకారం జపాన్‌లో 100 ఏండ్లు దాటిన వారి సంఖ్య 86 వేలు దాటింది. వీరిలో 88 శాతం మంది మహిళలు ఉన్నారు.