Free condoms | ఫ్రాన్స్‌లో ఉచితంగా కండోమ్‌లు.. అవాంఛిత గర్బధారణను అరికట్టేందుకు ఈ నిర్ణయం

Free condoms | లైంగిక సంబంధ వ్యాధులు ఫ్రాన్స్‌లో పెరిగిపోతున్నాయి. దీంతో ఇక్కడ ఉచితంగా కండోమ్‌లు ఇవ్వాలని మాక్రాన్‌ ప్రభుత్వం నిర్ణయించింది, 18-25 ఏండ్ల వారికి ఉచితంగా కండోమ్‌లు ఇవ్వడం వల్ల అవాంచిత గర్బధారణలు కూడా అరికట్టొచ్చని ప్రభుత్వం భావిస్తున్నది.

Free condoms | వచ్చే ఏడాది జనవరి 1 నుంచి ఫ్రాన్స్‌లో యువతకు కండోమ్‌లు ఇవ్వనున్నారు. 18 నుంచి 25 ఏండ్ల వయసున్న వారికి ఉచితంగా కండోమ్‌లను ఫ్రెంచ్‌ అధ్యక్షుడు ఇమ్మాన్యుయెల్‌ మాక్రాన్‌ ప్రకటించారు. ఫ్రాన్స్‌లో ఎయిడ్స్‌, ఇతర లైంగిక సంక్రమిత వ్యాధుల వ్యాప్తిని నిరోధించడమే లక్ష్యంగా ఫ్రెంచ్‌ ప్రభుత్వం ఈ నిర్ణయం తీసుకున్నది. అలాగే, అవాంఛిత గర్బధారణను అరికట్టేందుకు కూడా ఈ
ఉచిత కండోమ్‌లు దోహదపడతాయని ప్రభుత్వం భావిస్తున్నది.

2030 నాటికి ఫ్రాన్స్‌ను హెచ్‌ఐవి కేసుల రహితంగా మార్చాలని ఇమ్మాన్యుయెల్‌ మాక్రాన్ లక్ష్యంగా పెట్టుకున్నారు. ఫ్రాన్స్‌లో 2020-2021 లో లైంగికంగా సంక్రమించే ఇన్‌ఫెక్షన్ల కేసులు 30 శాతం పెరిగాయి. అయితే 2021 లో దాదాపు 5000 కొత్త హెచ్‌ఐవీ కేసులు నమోదవడం కలవరపెట్టే అంశం. ఇదే సమయంలో పేదరికం కారణంగా చాలా మంది యువతులు, మహిళలు అవాంఛిత గర్భాలను కొనసాగించారు. ఇప్పుడు ఉచితంగా కండోమ్‌లు ఇవ్వాలని ప్రభుత్వం నిర్ణయించడంతో దాదాపు 30 లక్షల మంది బాలికలు, మహిళలు లబ్ధి పొందనున్నారు.

గతంలో 18 ఏండ్లలోపు బాలికలకు మాత్రమే ఉచితంగా గర్బనిరోధక మందులు ఇచ్చేవారు. సెక్స్‌ ఎడ్యుకేషన్‌ విషయంలో ఫ్రాన్స్‌ బాగా వెనకబడి ఉన్నదని చెప్పిన మాక్రాన్‌.. అవగాహన కల్పించేందుకు చర్యలు తీసుకోవాలని అధికారులను ఆదేశించారు. ఫ్రాన్స్‌లో ప్రతి నలుగురిలో ఒకరు కొత్త భాగస్వామితో శృంగారంలో ఉన్నప్పుడు కండోమ్‌లను ఉపయోగించరు లేదా అరుదుగా ఉపయోగిస్తారు.