అగ్రరాజ్యం అమెరికా కీలక నిర్ణయం తీసుకుంది. 12 నుంచి 15 సంవత్సరాల వయసున్న చిన్నారులకు ఫైజర్ వ్యాక్సిన్ బూస్టర్ డోస్ అందించేందుకు అనుమతించింది. రెండు డోసుల తర్వాత బూస్టర్ డోసు తీసుకోవడానికి మధ్య కనీసం 5 నెలల గ్యాప్ ఉండాలని చెప్పింది. ఇంతకుముందు ఇది ఆరు నెలలుగా ఉండేది.
ఈ నిడివిని తగ్గిస్తూ తాజాగా యూఎస్ సీడీసీ నిర్ణయం తీసుకున్నాయి. బూస్టర్ డోసు తీసుకుంటే ఒమిక్రాన్, డెల్టా వేరియంట్ల నుంచి మెరుగైన రక్షణ లభిస్తుందని యూకే, సౌతాఫ్రికాల్లోని డేటా చెప్తోందని సీడీసీ తెలిపింది. రెండు డోసుల వ్యాక్సిన్ తీసుకుంటే ఒమిక్రాన్ నుంచి 35 శాతం రక్షణ లభిస్తోందని, అదే బూస్టర్ డోస్ తీసుకుంటే ఇది 75 శాతానికి పెరుగుతోందని వివరించింది.
అందుకే 12-15 సంవత్సరాల వయసు పిల్లలకు కూడా బూస్టర్ డోస్ ఇవ్వాలని నిర్ణయించింది. అదే విధంగా 5-12 సంవత్సరాల వయసున్న చిన్నారుల్లో రోగనిరోధక శక్తి బాగా సన్నగిల్లిన వారికి కూడా ఫైజర్ టీకా బూస్టర్ డోస్ ఇవ్వడానికి గ్రీన్ సిగ్నల్ ఇచ్చింది.