Shehbaz Sharif | పాక్‌ తదుపరి ప్రధానిగా షెహబాజ్‌!

Shehbaz Sharif | సార్వత్రిక ఎన్నికల్లో ఏ పార్టీకీ పూర్తి మెజార్టీ రాకపోవటంతో.. పాకిస్థాన్‌లో ప్రధాన పార్టీలన్నీ ఒక కూటమిగా ఏర్పడటానికి సిద్ధమయ్యాయి. నవాజ్‌ షరీఫ్‌ ప్రధాని అవుతారని అందరూ భావించగా, మంగళవారం అర్ధరాత్రి అనూహ్యంగా ఆయన సోదరుడు షెహబాజ్‌ షరీఫ్‌ పేరు తెరపైకి వచ్చింది.

• నవాజ్‌ షరీఫ్‌ పార్టీకి బిలావల్‌ భుట్టో మద్దతు

సంకీర్ణ ప్రభుత్వాన్ని ఏర్పాటు చేయనున్నామని ఆసిఫ్‌ అలీ జర్దారీ, షెహబాజ్‌ షరీఫ్‌ సంయుక్తంగా ప్రకటించారు. దేశాన్ని ఆర్థిక సంక్షోభం నుంచి బయటపడేయటమే తమ సంకీర్ణ కూటమి ప్రధాన లక్ష్యమని ప్రకటించారు. జాతీయ అసెంబ్లీలో ప్రభుత్వాన్ని ఏర్పాటుచేయాలంటే 169మంది సభ్యుల మద్దతు అవసరం. ఇదిలా ఉండగా, ఈ ఎన్నికల్లో తమ పార్టీ మద్దతుతో స్వతంత్రులు అత్యధిక స్థానాలు గెలుచుకున్నారని, తమకు 180మంది సభ్యుల మద్దతుందని ఇమ్రాన్‌ఖాన్‌కు చెందిన పీటీఐ ప్రకటించింది.