సిటీబ్యూరో, జనవరి 25 (నమస్తే తెలంగాణ) : ప్రయాణికుల రద్దీని దృష్టిలో ఉంచుకుని ప్రతి 2 నిమిషాలకో మెట్రో రైలు నడిపేలా అధికారులు చర్యలు తీసుకుంటున్నారు. కరోనాకు ముందు మెట్రో రైలులో 4 లక్షల మందికి పైగా ప్రతి రోజు ప్రయాణించగా, ప్రస్తుతం ప్రతి రోజు 4.5లక్షల మందికి పైగానే ప్రయాణం చేస్తున్నారు. మెట్రో ప్రయాణికుల డిమాండ్లను పరిగణనలోకి తీసుకొని హైదరాబాద్ మెట్రో రైలు ఎండీ ఎన్వీఎస్ రెడ్డి, ఎల్ అండ్ టీ మెట్రో ఉన్నతాధికారులతో చర్చించారు. ప్రస్తుతం రద్దీ వేళల్లో 3 నిమిషాలకో మెట్రో రైలు నడుస్తుండగా, దాన్ని 2 నిమిషాలకో రైలును నడిపేలా చర్యలు తీసుకోవాలని సూచించారు. మూడు మెట్రో కారిడార్లలో ఎక్కువగా ఐటీ కారిడార్ వెళ్లే నాగోల్-రాయదుర్గంతో పాటు ఎల్బీనగర్-మియాపూర్ మార్గం రద్దీ అధికంగా ఉంటుందని ఎల్ అండ్ టీ మెట్రో అధికారులకు సూచించారు.
ముఖ్యంగా అమీర్పేట నుంచి హైటెక్ సిటీ వెళ్లే మార్గంలో ఉదయం 9 గంటల నుంచి 11 గంటల వరకు, తిరిగి సాయంత్రం 4 నుంచి రాత్రి 7 గంటల మధ్య రద్దీ ఎక్కువగా ఉంటోంది. ఈ పరిధిలో షార్ట్ లూప్ సర్వీసులను నడపాలని సూచించారు. షార్ట్ లూప్ విధానంలో ప్రతి 3 నిమిషాలకు ఒక రైలును నడుపుతుండగా, దాన్ని మరింత తగ్గించి ప్రతి 2 నిమిషాలకో రైలును నడపడంతో రద్దీని నియత్రించవచ్చని మెట్రో అధికారులు భావిస్తున్నారు. ఇప్పటికిప్పుడు 3 కోచ్ల స్థానంలో అదనంగా కోచ్లను పెంచే అవకాశం లేకపోవడంతో ఫ్రీక్వెన్సీని తగ్గించి ఖచ్చితమైన సమయ పాలనతో రైళ్లను నడిపేందుకు చర్యలు తీసుకుంటున్నారు.