పండుగ వేళ..ప్రమాదాల మోత

నగరంలో దీపావళి పండుగ వేడుకల్లో అపశృతి చోటుచేసుకుంది. పటాకులు కాల్చే సమయంలో పలువురు గాయపడ్డారు.

November 10, 2026 / 03:30 AM IST

పండుగ పూట.. విషాదం
74 మందికి కాలిన గాయాలు వారిలో 17 మంది చిన్నారులు
పలు చోట్ల అగ్ని ప్రమాదాలు
నల్లకుంట పీఎస్‌ పరిధిలో పటాకులు పేలి పది బైకులు ధ్వంసం

మెహిదీపట్నం/సుల్తాన్‌బజార్‌/ సికింద్రాబాద్‌, నవంబర్‌ 9: నగరంలో దీపావళి పండుగ వేడుకల్లో అపశృతి చోటుచేసుకుంది. పటాకులు కాల్చే సమయంలో పలువురు గాయపడ్డారు.74 మంది కాలిన గాయాలకు గురవ్వగా, అందులో 17 మంది చిన్నారులు ఉన్నట్లు సరోజినీ కంటి దవాఖాన వర్గాలు వెల్లడించాయి. కండ్లకు తీవ్ర కాలిన గాయాలకు గురైన 12 మందికి చికిత్స అందిస్తున్నట్లు వైద్యులు తెలిపారు. ముగ్గురు చిన్నారులను నిలోఫర్‌ దవాఖానకు, ఒకరిని ఉస్మానియా దవాఖానకు తరలించినట్లు సరోజినీ దవాఖాన వర్గాలు వెల్లడించాయి. అలాగే పలు చోట్ల చోటు చేసుకున్న అగ్ని ప్రమాదాల్లో భారీ ఆస్తి నష్టం జరిగింది.

సిటీలో పలుచోట్ల పటాకులు పేలి అగ్ని ప్రమాదాలు.. పలువురికి గాయాలు, భారీగా ఆస్తినష్టం

దీపావళి పండుగ వేళ నగరంలో విషాదకర ఘటనలు చోటుచేసుకున్నాయి. పటాకులు కాల్చే సమయంలో జాగ్రత్తలు పాటించాలని అధికారులు ప్రభుత్వం ఎంత అవగాహన కల్పిస్తున్నా పట్టించుకోకపోవడంతో ప్రమాదాలు నిత్యకృత్యం అయిపోతున్నాయి. కొన్నిచోట్ల పటాకులు పడి స్క్రాప్‌ గోదాముల్లో మంటలు ఎగిసిపడగా..మరికొన్నిచోట్ల బైక్‌లకు నిప్పంటుకోవడంతో అగ్నికి ఆహుతయ్యాయి. నగరవ్యాప్తంగా దాదాపు 74 మందికి పైగా పటాకులు కాల్చే సమయంలో కంటి గాయాలవ్వడంతో సరోజిని దేవి కంటి ఆస్పత్రిలో చికిత్స పొందుతున్నారు. అయితే అందులో 17 మంది చిన్నారులు ఉండటం ఆందోళన కల్గిస్తోంది.

జీడిమెట్లలో స్క్రాప్‌ దుకాణంలో..

కుత్బుల్లాపూర్‌, నవంబర్‌ 9: జీడిమెట్ల విలేజ్‌లోని ఓ ప్లాస్టిక్‌ స్క్రాప్‌ దుకాణంలో ఆదివారం రాత్రి భారీ అగ్నిప్రమాదం చోటు చేసుకుంది. స్థానికులు తెలిపిన వివరాల ప్రకారం.. జీడిమెట్ల విలేజ్‌లోని గజానన అపార్ట్‌మెంట్‌వాసులు కాల్చిన పటాకుల నుంచి ఎగిసిపడిన నిప్పురవ్వలు ఎదురుగా ఉన్న స్క్రాప్‌ దుకాణంలో పడి నిమిషాల వ్యవధిలోనే మంటలు వ్యాపించాయి. అగ్నిమాపక సిబ్బంది మంటలను అదుపు చేశారు.

ఎలాంటి ప్రాణనష్టం జరగకపోవడంతో అందరూ ఊపీరిపీల్చుకున్నారు.జనవాసాల నడుమ ఎలాంటి అనుమతులు, కనీస అగ్నిమాపక రక్షణ చర్యలు లేకుండా గత కొంతకాలంగా నిబంధనలకు ఈ స్క్రాప్‌ దుకాణాన్ని నడుతున్నట్లు స్థానికులు తెలిపారు. బాధ్యులపై చర్యలు తీసుకోవాలని డిమాండ్‌ చేస్తున్నారు.

పటాకుల నిప్పు రవ్వలు పడి..

దీపావళి వేడుకల వేళ.. పలు చోట్ల అగ్నిప్రమాదాలు చోటు చేసుకున్నాయి. సుల్తాన్‌బజార్‌ పీఎస్‌ పరిధిలోని ఆర్య సమాజ్‌ ఎదురుగా ఉన్న నివాసంలో దీపం కారణంగా మంటలు చెలరేగాయి. సిద్దంబజార్‌లోని రాజధాని మోటార్స్‌పైన ఉన్న టెర్రస్‌ స్క్రాప్‌పై, మరోచోట ఓ భవనం టెర్రస్‌ నిల్వ ఉన్న కాటన్‌ బాక్స్‌లపై, సుల్తాన్‌బజార్‌లోని ఓ ఇంటి టెర్రస్‌పై, కోఠి ఉమెన్స్‌ కళాశాల బస్టాప్‌ వద్ద ఉన్న స్కూప్స్‌ ఐస్‌క్రీమ్‌ గౌడౌన్‌పై టపాసుల నిప్పు రవ్వలు ఎగిరిపడటంతో మంటలు చెలరేగాయి.

అగ్నిమాపక సిబ్బంది హుటాహుటిన ఆయా ప్రాంతాలకు చేరుకొని మంటలను అదుపులోకి తీసుకొచ్చారు. అలాగే సీతాఫల్‌మండిలో ఓ పటాకుల దుకాణంలో అగ్ని ప్రమాదం జరిగి భారీగా మంటలు ఎగిసిపడ్డాయి. నల్లకుంట పోలీస్‌స్టేషన్‌ పరిధిలో టపాసుల నిప్పు రవ్వలు పడి.. పార్కింగ్‌ చేసిన పది బైకులు కాలిపోయాయి. అలాగే కూకట్‌పల్లి ఆస్‌ బెస్టాస్‌ కాలనీలోని పారిశ్రామిక ప్రాంతంలో సోమవారం తెల్లవారుజామున అగ్ని ప్రమాదం జరిగి భారీగా ఆస్తి నష్టం సంభవించింది. ప్రమాదానికి గల కారణాలు తెలియాల్సి ఉంది.

Join Our Whatsapp Channel