Traffic jam | దిల్‌సుఖ్‌ న‌గ‌ర్‌లో భారీగా ట్రాఫిక్ జామ్‌.. ఇబ్బంది ప‌డుతున్న ప్ర‌యాణికులు

దిల్‌సుఖ్‌న‌గ‌ర్‌లో(Dilsukhnagar) భారీగా ట్రాఫిక్ జామ్(Traffic jam) ఏర్ప‌డింది. ద‌స‌రా సెల‌వులు ముగియ‌డంతో వివిధ జిల్లాల నుంచి లక్ష‌లాది మంది ప్ర‌జ‌లు న‌గరానికి తిరుగుముఖం ప‌ట్టారు.

హైద‌రాబాద్ : దిల్‌సుఖ్‌న‌గ‌ర్‌లో(Dilsukhnagar) భారీగా ట్రాఫిక్ జామ్(Traffic jam) ఏర్ప‌డింది. ద‌స‌రా సెల‌వులు ముగియ‌డంతో వివిధ జిల్లాల నుంచి లక్ష‌లాది మంది ప్ర‌జ‌లు న‌గరానికి తిరుగుముఖం ప‌ట్టారు. ఈ క్ర‌మంలో ట్యాంక్‌బండ్ ప‌రిస‌ర ప్రాంతాల‌కు నిమిజ్జ‌నానికి దుర్గామాత విగ్ర‌హాలు భారీగా త‌ర‌లిరావ‌డంతో ట్రాఫిక్ జామ్ ఏర్ప‌డింది. ఎల్బీన‌గ‌ర్ న‌గ‌ర్ నుంచి దిల్‌సుఖ్‌న‌గ‌ర్ వైపు ఆర్టీసీ బ‌స్సులు, ప్రైవేట్ వాహ‌నాలు భారీగా నిలిచోయాయి. దీంతో గంట‌లు గంట‌లు ట్రాఫిక్‌లో చిక్కుకోవ‌డంతో ప్ర‌యాణికులు తీవ్ర ఇబ్బందులు ప‌డుతున్నారు. పోలీసులు ట్రాఫిక్‌ను క్ర‌మ‌బ‌ద్దీక‌రించే ప్ర‌య‌త్నం చేస్తున్నారు. కాగా, హైద‌రాబాద్ న‌గ‌రంలో ట్రాఫిక్‌ నిర్వహణ పూర్తిగా అధ్వానంగా మారింది. గతంలో ఎక్కడైనా ట్రాఫిక్‌ జామ్‌ అయితే వెంటనే సిబ్బందితో సహా అధికారులు ఎప్పటికప్పుడు సమన్వయం చేస్తూ ట్రాఫిక్‌ సమస్య తొలగించేవారు.

కానీ ఈ మధ్యకాలంలో ప్రధాన సెంటర్లలో తప్ప అసలు సిబ్బందే ఉండకపోగా.. అధికారులు కనిపించడమే మానేశారు. కేవలం డ్రంక్‌ అండ్‌ డ్రైవ్‌ తనిఖీల సమయంలో తప్ప..ట్రాఫిక్‌ జామ్‌ల సమయంలో అధికారులే ఉండడం లేదు. ట్రాఫిక్‌ పోలీసులు ఉన్నప్పటికీ సెల్‌ఫోన్లతో ఫొటోలు తీయడం, రోడ్డుకు పక్కకు వెళ్లి నిల్చొని ముచ్చట్లు పెట్టడం తప్ప సీరియస్‌గా డ్యూటీ చేయడం లేదు. దీంతో ఫ్రీలెఫ్ట్‌ ఉన్న దగ్గర, సిగ్నల్‌ క్రాసింగ్‌ నివారించలేకపోతున్నారని వాహనదారులు అంటున్నారు. క‌నీసం పండ‌గ‌ల సంద‌ర్భంలోనైనా ప్ర‌యాణికుల‌కు ఇబ్బంది లేకుండా చూడాల‌ని కోరుతున్నారు.