క్యూర్‌తో స్వయంప్రతిపత్తికి గండి

తెలంగాణ ప్రభుత్వం ఇటీవల విడుదల చేసిన కోర్‌ అర్బన్‌ రీజియన్‌ (ఇంటిగ్రేటెడ్‌ గవర్నెన్స్‌) బిల్లు- 2026 ముసాయిదా ప్రజల ప్రయోజనాలను, స్థానిక సంస్థల స్వయంప్రతిపత్తిని దెబ్బతీసేలా ఉందంటూ అర్బన్‌ డెవలప్‌మెంట్‌ ఫోరం తీవ్ర అభ్యంతరం వ్యక్తం చేసింది. ఈ మేరకు ఫోరం కన్వీనర్‌ ఎం.శ్రీనివాస్‌ బుధవారం రాష్ట్ర మున్సిపల్‌ అడ్మినిస్ట్రేషన్‌ అండ్‌ అర్బన్‌ డెవలప్‌మెంట్‌ శాఖకు లేఖ రాశారు.

• ఏటా 5% పెరగనున్న నీటి, సీవరేజ్‌ చార్జీలు
• బిల్లు ముసాయిదాపై అర్బన్‌ డెవలప్‌మెంట్‌ ఫోరం అభ్యంతరం

సిటీబ్యూరో, జూలై 22 (నమస్తే తెలంగాణ): తెలంగాణ ప్రభుత్వం ఇటీవల విడుదల చేసిన కోర్‌ అర్బన్‌ రీజియన్‌ (ఇంటిగ్రేటెడ్‌ గవర్నెన్స్‌) బిల్లు- 2026 ముసాయిదా ప్రజల ప్రయోజనాలను, స్థానిక సంస్థల స్వయంప్రతిపత్తిని దెబ్బతీసేలా ఉందంటూ అర్బన్‌ డెవలప్‌మెంట్‌ ఫోరం తీవ్ర అభ్యంతరం వ్యక్తం చేసింది. ఈ మేరకు ఫోరం కన్వీనర్‌ ఎం.శ్రీనివాస్‌ బుధవారం రాష్ట్ర మున్సిపల్‌ అడ్మినిస్ట్రేషన్‌ అండ్‌ అర్బన్‌ డెవలప్‌మెంట్‌ శాఖకు లేఖ రాశారు. 271 పేజీల సుదీర్ఘ ముసాయిదాపై సమగ్ర చర్చ జరగడానికి అభిప్రాయ సేకరణ గడువును మరో 60 రోజులు పొడిగించాలని ఆయన విజ్ఞప్తి చేశారు.

ప్రధాన అభ్యంతరాలు ఇవీ..

• స్థానిక సంస్థల అధికారాలకు కోత- 74వ రాజ్యాంగ సవరణ మున్సిపాలిటీలకు కల్పించిన స్వయంప్రతిపత్తిని ఈ బిల్లు బలహీనపరుస్తోంది. పాలనాపరమైన అధికారాలన్నీ రాష్ట్ర ప్రభుత్వం వద్దే కేంద్రీకృతమయ్యేలా నిబంధనలు ఉన్నాయి.
• ప్రజాప్రతినిధులకు దకని ప్రాతినిధ్యం – రీజియన్‌ స్థాయిలో కీలక నిర్ణయాలు తీసుకునే అపెక్స్‌ గవర్నెన్స్‌ కౌన్సిల్‌, ఎగ్జిక్యూటివ్‌ కమిటీలలో మేయర్లు, డిప్యూటీ మేయర్లు, కార్పొరేటర్లకు ఎలాంటి స్థానం కల్పించకపోవడం ప్రజాస్వామ్య సూత్రాలకు విరుద్ధం.
• ఆస్తి పన్నుల వాత- ఆస్తి పన్ను విధానాన్ని యాన్యువల్‌ రెంటల్‌ వాల్యూ నుంచి క్యాపిటల్‌ వాల్యూకు మార్చడం వల్ల పట్టణ ప్రజలు, ముఖ్యంగా మధ్యతరగతి వర్గాలపై పన్ను భారం తీవ్రంగా పెరిగే ప్రమాదం ఉంది.
• ఏటా 5% నీటి చార్జీల పెంపు – సెక్షన్‌ 237 ప్రకారం ప్రతి ఏటా నీటి సరఫరా, మరుగునీటి (సీవరేజ్‌) పన్నులను ఆటోమేటిక్‌గా 5% చొప్పున పెంచే నిబంధన సామాన్య ప్రజలపై మోయలేని భారంగా మారనుంది.
• వార్డు కమిటీల నిర్వీర్యం – రాజ్యాంగబద్ధంగా ఏర్పాటు చేయాల్సిన వార్డు కమిటీలకు బడ్జెట్‌ రూపకల్పనలోగానీ, నిధుల వినియోగంలోగానీ ఎలాంటి నిర్ణయాధికారాలు ఇవ్వకపోవడం వలన ప్రజా భాగస్వామ్యం లోపిస్తున్నది.
• ఆదాయార్జనే ధ్యేయంగా పెనాల్టీలు: అక్రమ నిర్మాణాలపై 300% వరకు పెనాల్టీలు విధించే నిబంధన అక్రమాలను అరికట్టడానికి కాకుండా, కేవలం ప్రభుత్వ ఆదాయాన్ని పెంచుకోవడానికి మాత్రమే ఉపయోగపడేలా ఉంది.

గడువు పెంచాలి
271 పేజీలకు పైగా ఉన్న ఈ సుదీర్ఘ బిల్లును అధ్యయనం చేసి అభిప్రాయాలు తెలియజేయడానికి ప్రభుత్వం ఇచ్చిన 20 రోజుల సమయం ఏమాత్రం సరిపోదని శ్రీనివాస్‌ తెలిపారు. ప్రజలు, ప్రజాప్రతినిధులు, పట్టణ నిపుణులు విసృ్తతంగా చర్చించేందుకు అభిప్రాయ సేకరణ గడువును కనీసం మరో 60 రోజులు పొడిగించాలని డిమాండ్‌ చేశారు. స్థానిక సంస్థల స్వయంప్రతిపత్తిని కాపాడేలా, ప్రజలపై భారాలు తగ్గించేలా బిల్లులో తగిన సవరణలు చేయాలని అర్బన్‌ డెవలప్‌మెంట్‌ ఫోరం కన్వీనర్‌ శ్రీనివాస్‌ విజ్ఞప్తి చేశారు.