బారికేడ్లను ఎత్తుకెళ్లిన దొంగలు

ఇటీవల జరిగిన ఎన్నికల సమయంలో ట్రాఫిక్‌ నియంత్రణ కోసం ఏర్పాటు చేసిన బారికేడ్లను గుర్తు తెలియని వ్యక్తులు ఎత్తుకెళ్లిన సంఘటన జీడిమెట్ల పోలీస్‌ స్టేషన్‌ పరిధిలో చోటు చేసుకున్నది.

జీడిమెట్ల, డిసెంబర్‌ 5 : ఇటీవల జరిగిన ఎన్నికల సమయంలో ట్రాఫిక్‌ నియంత్రణ కోసం ఏర్పాటు చేసిన బారికేడ్లను గుర్తు తెలియని వ్యక్తులు ఎత్తుకెళ్లిన సంఘటన జీడిమెట్ల పోలీస్‌ స్టేషన్‌ పరిధిలో చోటు చేసుకున్నది. జీడిమెట్ల సీఐ ఎం.పవన్‌ తెలిపిన వివరాల ప్రకారం.. అసెంబ్లీ ఎన్నికల నిమిత్తం కుత్బుల్లాపూర్‌ మున్సిపల్‌ చౌరస్తాలో ట్రాఫిక్‌ నియంత్రణ కోసం జీడిమెట్ల ట్రాఫిక్‌ పోలీసులు బారికేడ్లను ఏర్పాటు చేశారు.

ఎన్నికల ప్రక్రియ అనంతరం వాటిని తరలించేందుకు ట్రాఫిక్‌ పోలీసులు వచ్చి అక్కడ చూసేసరికి బారికేడ్లు కనిపించకపోవడంతో షాక్‌కు గురయ్యారు. ట్రాఫిక్‌ ఉన్నతాధికారుల ఆదేశాల మేరకు జీడిమెట్ల ట్రాఫిక్‌ పోలీసులు జీడిమెట్ల పోలీస్‌స్టేషన్‌లో ఫిర్యాదు చేశారు. కాగా ఈ బారికేడ్లను గుర్తు తెలియని వ్యక్తులు ఆటోలో తరలించినట్లు పోలీసులు గుర్తించారు. ట్రాఫిక్‌ పోలీసుల ఫిర్యాదు మేరకు జీడిమెట్ల పోలీసులు కేసు నమోదు చేసి దర్యాప్తు చేస్తున్నారు.