ఆపదలో అనుసంధాన కర్తలు

• టెక్నాలజీ మీద అవగాహన లేనివారికి భరోసా
• కరోనా వ్యాక్సిన్‌ నుంచి ఆస్పత్రి పడక లభ్యం వరకు..
• కాల్‌ చేస్తే చాలు..ఆహారం, మందులు ఇంటికే..
• ఆదర్శంగా ఐటీ అండ్‌ ఎంటర్‌ప్రెన్యూర్‌ ఫోరం
• వాట్సాప్‌ వేదికగా కొవిడ్‌ సర్వీస్‌ గ్రూప్‌లు
• గ్రూపుల్లో హైదరాబాద్‌ నుంచి లండన్‌ వరకు వైద్యులు

సిటీబ్యూరో, జూన్‌ 2 (నమస్తే తెలంగాణ) : కరోనాతో మనుషుల మధ్య బంధాలు మాయమాయ్యాయి. ఎవరితో మాట్లాడాలన్నా, ఎవరిని ముట్టుకోవాలన్నా ఒక్కటే భయం. ఎక్కడ కరోనా సోకుతుందోనన్న ఆందోళనే. ఆధునిక సమాజంలో కరోనా మీద కాస్త అవగాహన ఉన్నా మహమ్మారి సోకితే ఎక్కడ చికిత్స తీసుకోవాలి ? ఏ ఆస్పత్రిలో బెడ్లు ఖాళీగా ఉన్నాయి ? మరి రక్తం అవసరం ఉంటే ? కరోనా తగ్గిన తర్వాత ప్లాస్మా కావాలంటే ? వ్యాక్సిన్‌ ఎలా బుకింగ్‌ చేసుకోవాలి ? అన్నదానిపై చాలామందికి అవగాహన లేదు. కరోనా నిర్ధారణ నుంచి చికిత్స వరకు అంతా ఆన్‌లైన్‌లోనే. మరీ అందరికీ ఇంటర్నెట్‌ వాడకంపై అవగాహన ఉంటుందా? లేని వారి పరిస్థితి ఏమిటి ? వారికి సమాచారం ఎలా తెలియాలి? డాక్టర్లను ఆన్‌లైన్‌లో సంప్రదించాలంటే ఎలా? పోస్ట్‌ కొవిడ్‌ లక్షణాలు ఎలా ఉంటాయి? ఇలాంటి అన్ని ప్రశ్నలకు సమాధానమిస్తున్నది ఐటీ అండ్‌ ఎంటర్‌ప్రెన్యూర్‌ ఫోరం. 10 మంది సభ్యులతో ఏర్పడిన ఈ ఫోరం కొవిడ్‌కు సంబంధించిన ప్రతీ అంశం మీద సేవలందిస్తున్నది. హైదరాబాద్‌, ఢిల్లీ, ముంబయి, లండన్‌ వైద్యులతో వాట్సప్‌ గ్రూప్‌ ఏర్పాటు చేసింది.

ఇలా సంప్రదించండి

ఆపదలో ఉన్నవారు, డాక్టర్‌ సేవలు అవసరం ఉన్నవారు 8463912345 నంబర్‌కు ఫోన్‌ చేస్తే చాలు వారికి కావాల్సిన సహాయం అందుతుంది. ఆహారం అవసరమున్నా ఇంటికి భోజనం అందేలా టెక్నాలజీ వినియోగంతో దాతలను వెతికిపెడుతారు. ప్రధానంగా వ్యాక్సిన్‌ కోసం, ఆస్పత్రుల్లో బెడ్ల కోసం అధికంగా సంప్రదిస్తున్నారు.

నా కొడుకు మాటలే ప్రేరణ

నా భార్యకు కరోనా సోకింది. ఆ సమయంలో నేను, నా కొడుకు చరణ్‌(5) హోటల్‌లో ఉన్నాం. ‘డాడీ మనం అమ్మకు దూరంగా ఎందుకు ఉన్నాం? అమ్మకు ఆరోగ్యం బాగులేకపోతే ఎవరు చూసుకుంటారు? అని ప్రశ్నించాడు. ఆ మాటలు నన్ను చాలా ప్రభావితం చేశాయి. చాలామంది కొవిడ్‌తో బాధపడుతుంటారు. వారికి దైర్యం, సేవ అందించే వారు కావాలని భావించాను. అందుకే మా ఫోరంతో ఇలాంటి సేవా కార్యక్రమాలు ప్రారంభించాం. ఎవరికి అవసరమున్నా ఫుడ్‌ నుంచి వ్యాక్సిన్‌ వరకు సాయమందేలా చూస్తున్నాం. – శ్రీధర్‌ మెరుగు, ఫౌండర్‌, ఐటీ అండ్‌ ఎంటర్‌ప్రెన్యూర్‌ ఫోరం

ఐటీ ఉద్యోగుల పాత్ర కీలకం

ఆపద సమయంలో ప్రతిఒక్కరూ అండగా ఉండాలి. ఏదో రకంగా సాయం చేయాలి. కొవిడ్‌ ప్రస్తుతం భయానక పరిస్థితులను సృష్టించింది. ఐటీ ఉద్యోగులు తమకు తోచిన విధంగా సాయం అందిస్తున్నారు. ప్రస్తుతమంతా టెక్నాలజీ ఆధారిత సేవలే ఉన్నాయి. వాటిపై అవగాహన ఉన్నవారు ఇతరులను గైడ్‌ చేయాలి. వైద్యులు, సైకాలజిస్టులు, రక్త, ప్లాస్మా, ఆహార దాతలు ఉన్నారు. ఒక్క ఫోన్‌ చేస్తే చాలు అవసరమైన సాయం అందిస్తాం. – బిను, సభ్యురాలు

ఏమిటీ సేవలు..

• ప్రస్తుతం వ్యాక్సిన్‌ ప్రక్రియ చురుగ్గా సాగుతున్నది. కొవిన్‌ వెబ్‌సైట్‌లో బుక్‌ చేసుకుంటేనే వ్యాక్సిన్‌ దొరుకుతుంది. ఇలాంటి పరిస్థితుల్లో వ్యాక్సిన్‌ బుక్‌ చేసుకోవడం చాలామందికి అవగాహన ఉండకపోవచ్చు. అలాంటి వారు ఫోరాన్ని సంప్రదిస్తే వారే వ్యాక్సిన్‌ బుక్‌ చేస్తారు. ఎలా బుక్‌ చేయాలో కూడా సూచిస్తారు. ఏ ఆసుపత్రిలో ఏ వ్యాక్సిన్‌ అందుబాటులో ఉందో తెలియజేస్తున్నారు.
• కొవిడ్‌ బాధితులకు ఉచితంగా వైద్యులతో కన్సల్టేషన్‌ ఇప్పిస్తున్నారు. అన్ని రకాల అనారోగ్య సమస్యలకు పరిష్కారాలు చూపిస్తున్నారు. ప్రముఖ వైద్యులతో వాట్సప్‌ గ్రూపులు ఏర్పాటు చేసి అందులో అవసరమున్న వారిని చేర్చి వారికి సాంత్వన కలిగిస్తున్నారు.
• దేశంలో అన్ని ప్రముఖ నగరాల్లో బెడ్ల ఖాళీల వివరాలను ఎప్పటికప్పుడు తెలియజేస్తారు. ఇందుకోసం దేశవ్యాప్తంగా ఐటీ ఉద్యోగులు ఈ ఫోరంలో సభ్యులుగా ఉన్నారు. రక్తం, ప్లాస్మా, రెమిడెసివర్‌ ఇతర ఇంజక్షన్ల వివరాలు కూడా తెలియజేస్తారు. అవసరమున్న వారికి డోనర్లను సమకూర్చుతారు. ఇప్పటివరకు వెయ్యిమందికి పైగా సేవలందించారు.
• ఈ గ్రూపులో ప్రముఖ వైద్యులు మోహిని, చక్రపాణి, కార్తిక్‌, రాహుల్‌, రఘురాం, సుచరిత, మురళీకృష్ణలు ఉచితంగా వైద్య సేవలందిస్తున్నారు. అవసరమైతే నేరుగా బాధితులకు సూచనలు చేస్తారు.