డీజేలకు నో పర్మిషన్‌

నూతన సంవత్సర వేడుకలను బాధ్యతాయుతంగా జరుపుకోవాలని రాచకొండ పోలీస్‌ కమిషనర్‌ మహేశ్‌ భగవత్‌ సూచించారు.

• న్యూ ఇయర్‌ వేడుకల్లో అనుమతి లేదు
• తనిఖీల తర్వాతే లోనికి అనుమతించాలి
• లైసెన్స్‌దారుడే అన్నింటికీ బాధ్యుడు
• మార్గదర్శకాలు విడుదల చేసిన రాచకొండ సీపీ మహేశ్‌ భగవత్‌
• గంజాయి, డ్రగ్స్‌ వినియోగిస్తే జైలే సైబరాబాద్‌ సీపీ స్టీఫెన్‌ రవీంద్ర

సిటీబ్యూరో, డిసెంబర్‌ 22 (నమస్తే తెలంగాణ): నూతన సంవత్సర వేడుకలను బాధ్యతాయుతంగా జరుపుకోవాలని రాచకొండ పోలీస్‌ కమిషనర్‌ మహేశ్‌ భగవత్‌ సూచించారు. న్యూ ఇయర్‌ వేడుకల సందర్భంగా రాచకొండ పోలీసు కమిషనరేట్‌ పరిధిలో ఈనెల 31వ తేదీ అర్ధరాత్రి ఒంటి గంట వరకు అనుసరించాల్సిన మార్గదర్శకాలను సీపీ ప్రజలకు వివరించారు.

వేడుకల సందర్భంగా ప్రజలు రోడ్లపై ప్రయాణం చేస్తుంటారని, అతివేగం ప్రమాదకరమనే విషయాన్ని గుర్తించాలన్నారు. మద్యం మత్తులో వాహనాలు నడపవద్దని సూచించారు. డ్రంక్‌ అండ్‌ డ్రైవ్‌ ఉంటుందని, పట్టుబడితే కఠిన చర్యలు ఉంటాయన్నారు. ఈవెంట్‌ వేదికల వద్ద ట్రాఫిక్‌ నిర్వహణ కోసం ప్రైవేట్‌ సెక్యూరిటీని ఏర్పాటు చేసుకోవాలని, ప్రవేశ ద్వారం వద్ద అందరిని తనిఖీ చేసిన తర్వాతే లోనికి అనుమతించాలని సూచించారు.

ఈ నిబంధనలు పాటించాలి..

• బహిరంగ ప్రదేశాల్లో డీజేలకు అనుమతి లేదు. 45 డిసెబుల్స్‌ కంటే తక్కువ స్థాయిలో శబ్ధం వచ్చేలా నిబంధనలు పాటించాలి. మ్యూజికల్‌ ఈవెంట్‌లో శబ్ధం ఆ ప్రాంగణం దాటి బయటకు వినిపించవద్దు. ధ్వని కాలుష్యంపై ఫిర్యాదు వస్తే వెంటనే చర్యలు తీసుకుంటాం.
• అసభ్యత, అశ్లీల దుస్తులు ధరించడం, అశ్లీల నృత్యాలు ఎట్టి పరిస్థితుల్లోనూ అనుమతించవద్దు.
• జంటల కోసం నిర్వహించే ప్రత్యేక కార్యక్రమాల్లో మైనర్లను అనుమతించవద్దు. నిర్వాహకులు వారి వయస్సును నిర్ధారించుకోవాలి. జంటల కోసం ప్రత్యేక ఎన్‌క్లోజర్లు ఏర్పాటు చేసుకోవాలి.
• గాయకులు, ప్రదర్శకులు గుంపుల్లో కలిసిపోవడానికి సాహసించవద్దు. నిర్వాహకులు అనుమతించవద్దు. ఈవెంట్లు జరిగే ప్రదేశంలోకి వచ్చీపోయే వారు సీసీ టీవీల్లో రికార్డు అయ్యే విధంగా ఏర్పాట్లు చేసుకోవాలి. తప్పని సరిగా రికార్డింగ్‌ సౌకర్యం ఉండాలి.
• తుపాకులు, బాణాసంచా, అగ్నిప్రమాదాలు.. ఇతరత్రా ప్రమాదాలకు కారణమయ్యే వస్తువులను లోపలికి అనుమతించవద్దు. అలాంటివి గుర్తిస్తే వెంటనే స్థానిక పోలీసుల దృష్టికి తీసుకురావాలి.
• ఈవెంట్‌లో పాల్గొనే వారు.. ఆ ప్రాంగణంలో డ్రగ్స్‌, సైకో ట్రోపిక్‌ పదార్థాల వినియోగం నిరోధించాలి. ఆ బాధ్యత నిర్వాహకులపైనే ఉంటుంది.
• రిమోట్‌గా ఉన్న హోమ్‌ స్టేలు, రిసార్ట్స్‌, ప్రైవేట్‌ అపార్టుమెంట్లలో నిర్వహించే వేడుకల్లో ఎవరైనా డ్రగ్స్‌ వాడటం జరిగితే ఆ సమాచారం పోలీసులకు తెలియజేయాలి.
• మద్యం సేవించిన వినియోగదారుల సాయం కోసం డ్రైవర్లు, క్యాబ్‌లు అందుబాటులో ఉండేలా పబ్‌, బార్‌ల యాజమాన్యాలు చర్యలు తీసుకోవాలి.
• తాగి మత్తులో ఉన్న ప్రేక్షకులు ఎవరూ ఆవరణలో గొడవలు, దుష్ప్రవర్తనకు తావు లేకుండా చూసుకోవాలి. ఇందుకు లైసెన్స్‌ దారులే బాధ్యత వహించాలి.
• బార్‌ అండ్‌ రెస్టారెంట్లు, గేటెడ్‌ కమ్యూనిటీలలో లైవ్‌ బ్యాండ్‌ నిర్వహించకూడదు.
• అన్ని పబ్స్‌, వైన్‌షాపులు, బార్‌ అండ్‌ రెస్టారెంట్లు నిర్ణీత సమయం ప్రకారం మూసేయాలి. లైసెన్స్‌ దారుడు టైమ్‌ టూ టైమ్‌ నిబంధనలు పాటించాలి.