హస్తం ఆగమాగం అగ్గిరాజేసిన.. టికెట్‌ ఫర్‌ సేల్‌

కాంగ్రెస్‌ పార్టీ రెండో జాబితా ప్రకటనతో అగ్గి రాజుకున్నది. శనివారం ఉదయం ఆరోపణలతో మొదలైన ఈ వేడి.. సాయంత్రానికి గాంధీభవన్‌ను తాకింది. ఇన్నాళ్లు జెండాలు మోసిన చేతులతోనే గాంధీభవన్‌పై రాళ్లు విసిరారు. టీపీసీసీ అధ్యక్షుడు రేవంత్‌ రెడ్డి కోట్లాది రూపాయలకు ప్యారా చూట్‌ నేతలకు టికెట్లు అమ్ముకున్నాడంటూ ద్వజమెత్తారు.

• జెండాలు మోసిన చేతులతోనే గాంధీభవన్‌పై రాళ్లదాడి
• రేవంత్‌ రెడ్డి ప్లెక్సీలు చింపి.. పార్టీ జెండాలు దహనం
• రణరంగం సృష్టించిన విష్ణు వర్గీయులు
• టికెట్లు అమ్ముకున్నావంటూ.. టీపీసీసీ అధ్యక్షుడిపై ధ్వజమెత్తిన అసంతృప్తులు
• కూకట్‌పల్లిలో పార్టీకి గొట్టిముక్కల రాజీనామా
• ప్రచార రథాలు సిద్ధం చేయించి.. కోట్లు ఖర్చు పెట్టించి.. మోసం చేశారంటూ చిగిరింత దంపతులు ఆగ్రహం
• ఎల్బీనగర్‌, రాజేంద్రనగర్‌, శేరిలింగంపల్లి, ఇబ్రహీంపట్నం, అంబర్‌పేటలోనూ ఇదే పరిస్థితి
• అధిష్టానానికి అల్టిమేటం జారీ చేసిన ఆయా నియోజకవర్గాల ఆశావహులు
• నేడు కార్యకర్తలతో సమావేశమై భవిష్యత్తు కార్యాచరణపై నిర్ణయం
• ఎల్బీనగర్‌లో మధుయాష్కీ నేతల జలక్‌.., మహేశ్వరంలో కేఎల్‌ఆర్‌కు సహాయ నిరాకరణ

కాంగ్రెస్‌ పార్టీ రెండో జాబితా ప్రకటనతో అగ్గి రాజుకున్నది. శనివారం ఉదయం ఆరోపణలతో మొదలైన ఈ వేడి.. సాయంత్రానికి గాంధీభవన్‌ను తాకింది. ఇన్నాళ్లు జెండాలు మోసిన చేతులతోనే గాంధీభవన్‌పై రాళ్లు విసిరారు. టీపీసీసీ అధ్యక్షుడు రేవంత్‌ రెడ్డి కోట్లాది రూపాయలకు ప్యారా చూట్‌ నేతలకు టికెట్లు అమ్ముకున్నాడంటూ ద్వజమెత్తారు. రేవంత్‌ ప్లెక్సీలు చించేయడంతో పాటు పార్టీ జెండాలను తగులబెట్టి రణరంగం సృష్టించారు. పలువురు కాంగ్రెస్‌ పార్టీకి రాజీనామా చేయగా.. మరికొందరు అధిష్ఠానానికి అల్టిమేటం జారీ చేశారు. జూబ్లీహిల్స్‌ నుంచి పీజేఆర్‌ తనయుడు విష్ణువర్ధన్‌రెడ్డి తాను ఎట్టి పరిస్థితుల్లోనూ పోటీలో ఉంటానని తేల్చి చెప్పగా.. కూకట్‌పల్లిలో టికెట్‌ ఆశించిన గొట్టిముక్కల వెంగళరావు కన్నీరు మున్నీరవుతూ పార్టీకి రాజీనామా చేశారు.

మహేశ్వరంలో బడంగ్‌పేట మేయర్‌ చిగిరింత పారిజాత నర్సింహారెడ్డి, మరో నేత దేప భాస్కర్‌రెడ్డిలకు రేవంత్‌ రెడ్డి టికెట్‌ ఆశ చూపి కోట్లు ఖర్చుపెట్టించాడంటూ ఆగ్రహం వ్యక్తం చేశారు. ఇబ్రహీంపట్నం నియోజకవర్గంలో దండెం రాంరెడ్డి అధిష్టానానికి అల్టిమేటం జారీ చేశారు. ఎల్బీనగర్‌, రాజేంద్రనగర్‌, శేరిలింగంపల్లి, అంబర్‌పేటలోనూ ఇదే పరిస్థితి కనిపించింది. ఏది ఏమైనప్పటికీ కాంగ్రెస్‌ టికెట్‌ ఆశించి భంగపడిన నేతలు పార్టీని వదిలే ఆలోచనలో ఉన్నట్లు తెలుస్తున్నది. ఇదిలా ఉండగా ఎల్బీనగర్‌లో అభ్యర్థి మధుయాష్కీ గౌడ్‌కు నియోజకవర్గం నేతలు జలక్‌ ఇచ్చారు. మహేశ్వరం టికెట్‌ కేఎల్‌ఆర్‌కు ఇవ్వగా.. ఇక్కడ కూడా ఆయనకు సహాయ నిరాకరణ మొదలైంది.

– సిటీబ్యూరో ప్రధాన ప్రతినిధి, అక్టోబర్‌ 28 (నమస్తే తెలంగాణ)