వివిధ కోర్సుల పరీక్షా ఫీజు స్వీకరణ

ఉస్మానియా యూనివర్సిటీ, సెప్టెంబర్‌ 7 : ఉస్మానియా యూనివర్సిటీ పరిధిలోని వివిధ కోర్సుల పరీక్షా ఫీజును స్వీకరించనున్నట్లు ఓయూ కంట్రోలర్‌ ఆఫ్‌ ది ఎగ్జామినేషన్స్‌ ప్రొఫెసర్‌ శ్రీరాం వెంకటేశ్‌ ఒక ప్రకటనలో తెలిపారు. బీసీఏ (సీబీసీఎస్‌) ఆరో సెమిస్టర్‌, బీసీఏ(నాన్‌ సీబీసీఎస్‌) మూడో సంవత్సరం రెండో సెమిస్టర్‌ మేకప్‌ పరీక్షా ఫీజును ఈనెల 9వ తేదీలోగా సంబంధిత కళాశాలల్లో చెల్లించవచ్చని చెప్పారు. ఆరేండ్ల ఫార్మ్‌డీ మొదటి, రెం డు, మూడు, నాలుగు, అయిదో సంవత్సరం పరీక్షలతోపాటు మూ డేండ్ల ఫార్మ్‌డీ మొదటి, రెండో సంవత్సరం మెయిన్‌, బ్యాక్‌లాగ్‌ పరీక్ష ఫీజును ఈ నెల 17వ తేదీలోగా సంబంధిత కళాశాలల్లో చెల్లించాలన్నారు. పరీక్ష తేదీల పూర్తి వివరాలను త్వరలోనే వెల్లడిస్తామని ప్రకటించారు. ఇతర వివరాలకు ఓయూ వెబ్‌సైట్‌ www.osmania.ac. inలో చూసుకోవచ్చని సూచించారు.

వివిధ కోర్సుల పరీక్షా తేదీలు..

ఉస్మానియా యూనివర్సిటీ, సెప్టెంబర్‌ 7: ఉస్మానియా యూనివర్సిటీ పరిధిలోని వివిధ కోర్సుల పరీక్షా తేదీలను ఖరారు చేసినట్లు ఓయూ కంట్రోలర్‌ ఆఫ్‌ ది ఎగ్జామినేషన్స్‌ ప్రొఫెసర్‌ శ్రీరాం వెంకటేశ్‌ ఒక ప్రకటనలో తెలిపారు. బీఫార్మసీ (పీసీఐ), బీఫార్మసీ (సీబీసీఎస్‌), బీఫార్మసీ (నాన్‌ సీబీసీఎస్‌) మేకప్‌ పరీక్షలను ఈనెల 14వ తేదీ నుంచి, లా విభాగంలో వివిధ పీజీ డిప్లొమా కోర్సుల మొదటి సెమిస్టర్‌ బ్యాక్‌లాగ్‌, రెండో సెమిస్టర్‌ రెగ్యులర్‌, బ్యాక్‌లాగ్‌ పరీక్షలను ఈనెల 23నుంచి, అన్ని డిగ్రీ కోర్సుల రెండు, నాలుగో సెమిస్టర్ల రెగ్యులర్‌, బ్యాక్‌లాగ్‌ పరీక్షలను ఈ నెల 28 నుంచి నిర్వహించనున్నట్లు పేర్కొన్నారు. ఎంసీఏ ప్రాక్టికల్‌ పరీక్షా తేదీలను మార్చినట్లు పేర్కొన్నారు. ఈ పరీక్షలను ఈనెల 13 నుంచి నిర్వహించనున్నట్లు ప్రకటించారు. పరీక్షా తేదీల పూర్తి వివరాలను ఓయూ వెబ్‌సైట్‌ www.osmania.ac.inలో చూసుకోవచ్చన్నారు.